SportPress.kz قازاقستان سپورت جاڭالىقتارى
قازاقستان دزيۋدو فەدەراتسياسى ۇزدىك بالۋاندار مەن جاتتىقتىرۋشىلارعا 20 ملن تەڭگە تابىس ەتتى.
كەزدەسۋدە الەم چەمپيوناتىنىڭ جۇلدەگەرلەرى 4 ملن تەڭگەدەن، ازيا چەمپيونى 2 ملن تەڭگەدەن، قۇرلىقتىق بىرىنشىلىكتىڭ كۇمىس جۇلدەگەرى 700 مىڭ تەڭگە سىياقى الدى. ال قولا جۇلدەگەرلەر جارتى ميلليون تەڭگەدەن جانە جاسوسپىرىمدەر اراسىنداعى الەم چەمپيوناتىنىڭ جۇلدەگەرلەرى 400 مىڭ تەڭگەدەن يەلەندى. اقشالاي سەرتيفيكاتتار قازاقستان قۇراماسىنىڭ جاڭا ماۋسىم قارساڭىندا وتكىزىپ جاتقان وقۋ-جاتتىعۋ جيىنىندا تابىس ەتىلدى.
وسى كۇنى سىياقىلاردى ەلىمىزگە بەلگىلى دزيۋدوشىلار عانا ەمەس، ەرلەر جانە ايەلدەر ۇلتتىق قۇراما كوماندالارىنىڭ باس جاتتىقتىرۋشىلارى نۇربول سۇلەيمەنوۆ پەن ەرلان الپىسباەۆ 700 مىڭ تەڭگە كولەمىندەگى اقشالاي سەرتيفيكاتتارمەن ماراپاتتالدى. بۇگىندە ولاردىڭ باسشىلىعىمەن ەلىمىزدىڭ 120-عا جۋىق دزيۋدوشى گران پري جانە Grand Slam سەريالارىنا، سونداي-اق مامىر ايىندا كاتاردا وتەتىن الەم چەمپيوناتىنا دايىندالۋدا. وسى تۋرنيرلەردە دزيۋدوشىلار كەلەسى جىلى پاريجدە وتەتىن وليمپيا ويىندارىنا ىرىكتەۋ ۇپايلارىن جيناي باستايدى.
سونداي-اق، فەدەراتسيا بالۋانداردى جارىسقا دايىندايتىن جاتتىقتىرۋشىلاردىڭ كەڭەسشىلەرىن، دارىگەرلەردى، ماسساجيستەر مەن ۇلتتىق قۇرامانىڭ مەنەدجەرلەرىن 250 مىڭ تەڭگەدەن 700 مىڭ تەڭگەگە دەيىنگى كولەمدەگى سەرتيفيكاتتارمەن ماراپاتتادى.
قازىر رەسمي دەرەكتەر بويىنشا ەلىمىزدە بارلىعى 85 مىڭعا جۋىق ادام دزيۋدومەن اينالىسادى. دزيۋدودان جاسوسپىرىمدەر، جاستار جانە ەرەسەكتەر اراسىنداعى قازاقستان چەمپيوناتتارىنا ەلىمىزدىڭ تۇكپىر-تۇكپىرىنەن 10 مىڭنان استاپ سپورتشى باس قوسىپ، ءوزارا باق سىناسىپ ءجۇر.
بىلتىرعى جىل دزيۋدوشىلار ءۇشىن ءساتتى اياقتالدى. قازان ايىندا تاشكەنتتە وتكەن الەم چەمپيوناتىندا وتانداستارىمىز ەكى قولا جۇلدەگە يە بولدى. ەلدوس سمەتوۆ ەرلەر اراسىندا 60 كەلىگە دەيىنگى سالماق دارەجەسىندە ءۇشىنشى ورىنعا تابان تىرەسە، ابيبا ابۋجاقىنوۆا ايەلدەر اراسىندا 48 كەلىگە دەيىنگى سالماق دارەجەسىندە قولا جۇلدەنى يەلەندى.
تامىز ايىندا وتكەن قۇرلىقتىق بىرىنشىلىكتە قازاقستان قۇراماسى ەل نامىسىن ابىرويمەن قورعادى. اتاپ ايتقاندا، 73 كەلىگە دەيىنگى سالماقتا دانيار شامشاەۆ جارىس جەڭىمپازى اتاندى. ال 100 كەلىگە دەيىنگى يسلام بوزباەۆ كۇمىس جۇلدە الدى. ديدار حامزا، ماعجان شامشادين، عۇسمان قىرعىزباەۆ، نۇرلىحان شارحان جانە ارۋنا جانگەلدينا ازيا چەمپيوناتىنىڭ قولا جۇلدەسىن قورجىنعا سالعان بولاتىن.
سونىمەن قاتار، كاميلا بەرلىقاش قاراشا ايىندا باكۋدە وتكەن Grand Slamس ەرياسى ءتۋرنيرىنىڭ قولا جۇلدەگەرى اتاندى. ال بوسنيا مەن گەرتسەگوۆينادا جاسوسپىرىمدەر اراسىنداعى الەم چەمپيوناتىندا 50 كەلىگە دەيىنگى جانە 60 كەلىگە دەيىنگى سالماقتا قولا مەدالداردى دياس جولدىباەۆ پەن تالعات ورىنباسار جەڭىپ الدى.
داستان كەنجالين،
استانا
