SportPress.kz قازاقستان سپورت جاڭالىقتارى
رەسەيلىك فۋتبولشى، «حيمكي» كلۋبىنىڭ جارتىلاي قورعاۋشىسى الەكساندر زۋەۆ ەلىمىزدىڭ ازاماتتىعىن الىپ، ۇلتتىق قۇراما كوماندادا ويناعىسى كەلىپ ءجۇر. بۇل تۋرالى sport24.ru حابارلادى.
ال سپورترادار.kz-ءتىڭ حابارلاۋىنشا، ول ەلىمىزدە تۇراقتى تۇرۋ ءۇشىن قۇجات الۋعا ارەكەت ەتىپ جاتىر. ەگەر زۋەۆ ءتيىستى قۇجاتتى الاتىن بولسا، وندا قازاقستاننىڭ ۇلتتىق قۇراماسىندا ويناۋى ابدەن مۇمكىن.
وسى ماسەلەگە بايلانىستى ۇلتتىق قۇرامانىڭ باس جاتتىقتىرۋشىسى ماگومەد اديەۆ ءوز پىكىرىن بىلدىردى.
ونىڭ ايتۋىنشا، زۋەۆتىڭ ۇلتتىق قۇرامادا وينايتىنى تۋرالى ايتۋعا ءالى ەرتە. ەگەر زۋەۆ ازاماتتىق الىپ، كوك تولقۇجاتتى كورسەتسە، وندا قۇراما كوماندامەن اقىلداسىپ، ويلانۋعا بولادى.
مەن الەكساندردىڭ ازاماتتىق العىسى كەلەتىنىن ەستىدىم. ەگەر ول بارلىق قۇجاتتارىن الىپ، ءبارىن رەتتەسە، وندا ويلانىپ كورەمىز. قازىر ونىڭ قۇجاتى جوق. سوندىقتان ونى ماسەلە ەتىپ، تالقىلاۋدىڭ كەرەگى جوق. ءبىز ءار نارسەنى ۇلتتىق قۇرامانىڭ ويىنشىلارىمەن اقىلداسىپ شەشەمىز. بىراق سوڭعى ءسوزدى مەن ايتامىن. باس جاتتىقتىرۋشى بولعان سوڭ، شەشىمدى ءوزىم قابىلدايمىن. ءبىزدىڭ كيىم اۋىستىراتىن بولمەمىزدە ويىنشىلارمەن جاقسى تۇسىنىستىك قالىپتاسقان. سوندىقتان جاقسى اتموسفەرانىڭ، جاقسى اۋرانىڭ شىرقىن بۇزعىم كەلمەيدى. ازىرشە زۋەۆ قازاقستان ازاماتى ەمەس. سوندىقتان ول قۇراماسى ويىنشىسى بولا المايدى. ەگەر كوك پاسپورتى دايىن بولسا، كورەمىز، – دەدى اديەۆ.
باس جاتتىقتىرۋشىنىڭ ايتۋىنشا، جالپى، قازىر ءبىر عانا زۋەۆ ەمەس، رەسەيدىڭ كوپتەگەن فۋتبولشىلارى قازاقستاننىڭ ازاماتتىعىن الىپ، ۇلتتىق قۇرامادا ويناعىسى كەلىپ ءجۇر.
ال الەكساندر زۋەۆ 1996 جىلى قوستانايدا تۋعان. بالا كەزىندە «توبىل» كلۋبىنىڭ بالالار مەكتەبىندە جاتتىققان. كەيىن رەسەيگە كوشىپ كەتكەن. 2013 جىلى 17 جاسقا دەيىنگى فۋتبولشىلار اراسىندا وتكەن ەۋروپا چەمپيوناتىن جەڭىپ العان. 2016 – 2017 جىلدارداعى فۋتبول ماۋسىمىندا ماسكەۋدىڭ «سپارتاك» جاساعىنىڭ قۇرامىندا رەسەي چەمپيونى اتانعان. سودان كەيىن «رۋبين» (قازان)، «روستوۆ» (روستوۆ نا دونۋ)، «كرىليا سوۆەتوۆ» (سامارا) كوماندالارىندا ويناعان. سوڭعى كەزدە ماسكەۋدىڭ تۇبىندەگى حيمكي قالاسىنىڭ «حيمكي» كلۋبىندا دوپ تەۋىپ ءجۇر.
داستان كەنجالين،
استانا
