SportPress.kz Qazaqstan sport jańalyqtary
Reseılik fýtbolshy, «Hımkı» klýbynyń jartylaı qorǵaýshysy Aleksandr Zýev elimizdiń azamattyǵyn alyp, ulttyq qurama komandada oınaǵysy kelip júr. Bul týraly sport24.ru habarlady.
Al SportRadar.kz-tiń habarlaýynsha, ol elimizde turaqty turý úshin qujat alýǵa áreket etip jatyr. Eger Zýev tıisti qujatty alatyn bolsa, onda Qazaqstannyń ulttyq quramasynda oınaýy ábden múmkin.
Osy máselege baılanysty ulttyq quramanyń bas jattyqtyrýshysy Magomed Adıev óz pikirin bildirdi.
Onyń aıtýynsha, Zýevtiń ulttyq quramada oınaıtyny týraly aıtýǵa áli erte. Eger Zýev azamattyq alyp, kók tólqujatty kórsetse, onda qurama komandamen aqyldasyp, oılanýǵa bolady.
Men Aleksandrdyń azamattyq alǵysy keletinin estidim. Eger ol barlyq qujattaryn alyp, bárin rettese, onda oılanyp kóremiz. Qazir onyń qujaty joq. Sondyqtan ony másele etip, talqylaýdyń keregi joq. Biz ár nárseni ulttyq quramanyń oıynshylarymen aqyldasyp sheshemiz. Biraq sońǵy sózdi men aıtamyn. Bas jattyqtyrýshy bolǵan soń, sheshimdi ózim qabyldaımyn. Bizdiń kıim aýystyratyn bólmemizde oıynshylarmen jaqsy túsinistik qalyptasqan. Sondyqtan jaqsy atmosferanyń, jaqsy aýranyń shyrqyn buzǵym kelmeıdi. Ázirshe Zýev Qazaqstan azamaty emes. Sondyqtan ol quramasy oıynshysy bola almaıdy. Eger kók pasporty daıyn bolsa, kóremiz, – dedi Adıev.
Bas jattyqtyrýshynyń aıtýynsha, jalpy, qazir bir ǵana Zýev emes, Reseıdiń kóptegen fýtbolshylary Qazaqstannyń azamattyǵyn alyp, ulttyq quramada oınaǵysy kelip júr.
Al Aleksandr Zýev 1996 jyly Qostanaıda týǵan. Bala kezinde «Tobyl» klýbynyń balalar mektebinde jattyqqan. Keıin Reseıge kóship ketken. 2013 jyly 17 jasqa deıingi fýtbolshylar arasynda ótken Eýropa chempıonatyn jeńip alǵan. 2016 – 2017 jyldardaǵy fýtbol maýsymynda Máskeýdiń «Spartak» jasaǵynyń quramynda Reseı chempıony atanǵan. Sodan keıin «Rýbın» (Qazan), «Rostov» (Rostov na Doný), «Krylıa Sovetov» (Samara) komandalarynda oınaǵan. Sońǵy kezde Máskeýdiń túbindegi Hımkı qalasynyń «Hımkı» klýbynda dop teýip júr.
Dastan KENJALIN,
ASTANA
