ەلىمىزدە دزيۋدودان الەمدىك Grand Slam ءتۋرنيرى وتەدى

قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسى (IJF) ەلىمىزدە الەمدىك Grand Slam ءتۋرنيرىن وتكىزۋ تۋرالى تورتجىلدىق كەلىسىمشارتقا قول قويدى.

فرانتسيانىڭ پاريج قالاسىندا وتكەن Grand Slam ءتۋرنيرى اياسىندا قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسىنىڭ رەسمي كەزدەسۋى بولدى. كەزدەسۋدە حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مەن قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ ەكىجاقتى كەلىسىمشارتقا قول قويدى.

كەلىسىمشارتقا سايكەس، قازاقستان الەمدىك Grand Slam ءتۋرنيرىن 2023-2026 جىلدار ارالىعىندا وتكىزەدى. تۋرنير استانا مەن الماتىدا «Qazaqstan barysy Grand Slam» اتاۋىمەن وتكىزىلەدى. سونداي-اق، جارىس اياقتالعاننان كەيىن جىل سايىن تۇراقتى تۇردە حالىقارالىق وقۋ-جاتتىعۋ لاگەرى ۇيىمداستىرىلادى.

انىقتاما:

Grand Slam – حالىقارالىق جارىس كۇنتىزبەسىنە سايكەس IJF World Tour اياسىندا وتكىزىلەتىن الەمدىك جارىستار سەرياسى. IJF ەرەجەسى بويىنشا، تۋرنير جەڭىمپازى مەن جۇلدەگەرلەرىنە الەمدىك جانە وليمپيادالىق رەيتينگتەردە ۇپاي ۇلەستىرىلەدى. اتاپ ايتقاندا، 1-ورىنعا 1000، 2-ورىنعا — 700، ال 3-ءشى ورىنعا 500 ۇپايدان بەرىلەدى.

Qazaqstan barysy Grand Slam جارىسىندا دزيۋدوشىلار 2024 جىلى پاريج جانە 2028 جىلى لوس-اندجەلەستە وتەتىن جازعى وليمپيا ويىندارىنا ۇپاي جينايدى.

داستان كەنجالين،

استانا