تۇرىك جاتتىقتىرۋشىسى جەر سىلكىنىسىنەن وتباسىنداعى 15 ادامنان ايىرىلدى

تۇركياداعى جەر سىلكىنىسىنەن «سيۆاسسپور» فۋتبول كلۋبىنىڭ جاتتىقتىرۋشىسى ايحان تەنبەلوگلۋ وتباسىنداعى 15 ادامنان ايىرىلدى. بۇل تۋرالى ensonhaber سايتىنا سۇحبات بەرگەن تۇرىك كومانداسىنىڭ باس جاتتىقتىرۋشىسى رىزى چالىمباي ايتتى.

بۇل وتە قايعىلى جاعداي بولدى. ءبىز سيۆاستا ءزىلزالا تۋرالى ەستىپ، بىلدىك. سول كۇنى تاڭەرتەڭ مەن «حاتايسپور» كلۋبىندا ىستەيتىن ءوزىمنىڭ بۇرىنعى كومەكشىم شىڭعىس قوجاعا  حابارلاستىم. ول مەنىڭ كومەكشىم ايحان تەنبەلوگلۋدىڭ وتباسىنداعى 15 ادامنان ايىرىلعانىن ەستىرتتى. ءبۇتىن ءبىر وتباسى كەتىپتى. وتباسى بولعاندا، 15 ادامنان، ەڭ جاقىن ادامدارىنان ايىرىلۋ دەگەن سۇمدىق. اللا سابىر بەرسىن، — دەدى ول.

سودان كەيىن كوماندانىڭ باس جاتتىقتىرۋشىسىنا ۇلتتىق قۇرامانىڭ ەكس-فۋتبولشىسى ۆولكان دەميرەل حابارلاسىپ، ءۇيىندىنىڭ استىندا كوپتەگەن سپورتشىلاردىڭ دا قالىپ قويعانىن ايتقان. سونىڭ ىشىندە ايەلدەردىڭ «حاتاي» ۆولەيبول كلۋبىنىڭ 14 سپورتشىسى ءۇيىندى استىندا قالعان.

قولدا بار مالىمەتكە قاراعاندا، كاحرامانماراشتاعى كۇرەس كلۋبىنىڭ 30-40 سپورتشىسى دا قيراعان عيماراتتىڭ استىندا قالىپ قويعان.

سوڭعى دەرەككە قاراعاندا، تۇركيادا جەر سىلكىنىسىنەن قازا تاپقاندار سانى 3 381 ادامعا جەتتى. بۇل تۋرالى تۇركيانىڭ توتەنشە جاعدايلار باسقارماسى جەر سىلكىنىسى جانە تاۋەكەلدەردى ازايتۋ ءبولىمىنىڭ باس ديرەكتورى ورحان تاتار مالىمدەدى.

ءزىلزالادان 20 426 ادام جارالاندى، 11 302 عيمارات زاقىمداندى. ونىڭ ىشىندە 5 775 عيمارات قيرادى.

داستان كەنجالين،

استانا