Túrik jattyqtyrýshysy jer silkinisinen otbasyndaǵy 15 adamnan aıyryldy

Túrkııadaǵy jer silkinisinen «Sıvasspor» fýtbol klýbynyń jattyqtyrýshysy Aıhan Tenbeloglý otbasyndaǵy 15 adamnan aıyryldy. Bul týraly ensonhaber saıtyna suhbat bergen túrik komandasynyń bas jattyqtyrýshysy Ryzy Chalymbaı aıtty.

Bul óte qaıǵyly jaǵdaı boldy. Biz Sıvasta zilzala týraly estip, bildik. Sol kúni tańerteń men «Hataıspor» klýbynda isteıtin ózimniń burynǵy kómekshim Shyńǵys Qojaǵa  habarlastym. Ol meniń kómekshim Aıhan Tenbeloglýdyń otbasyndaǵy 15 adamnan aıyrylǵanyn estirtti. Bútin bir otbasy ketipti. Otbasy bolǵanda, 15 adamnan, eń jaqyn adamdarynan aıyrylý degen sumdyq. Alla sabyr bersin, — dedi ol.

Sodan keıin komandanyń bas jattyqtyrýshysyna ulttyq quramanyń eks-fýtbolshysy Volkan Demırel habarlasyp, úıindiniń astynda kóptegen sportshylardyń da qalyp qoıǵanyn aıtqan. Sonyń ishinde áıelderdiń «Hataı» voleıbol klýbynyń 14 sportshysy úıindi astynda qalǵan.

Qolda bar málimetke qaraǵanda, Kahramanmarashtaǵy kúres klýbynyń 30-40 sportshysy da qıraǵan ǵımarattyń astynda qalyp qoıǵan.

Sońǵy derekke qaraǵanda, Túrkııada jer silkinisinen qaza tapqandar sany 3 381 adamǵa jetti. Bul týraly Túrkııanyń tótenshe jaǵdaılar basqarmasy jer silkinisi jáne táýekelderdi azaıtý bóliminiń bas dırektory Orhan Tatar málimdedi.

Zilzaladan 20 426 adam jaralandy, 11 302 ǵımarat zaqymdandy. Onyń ishinde 5 775 ǵımarat qırady.

Dastan KENJALIN,

ASTANA