جاس تەننيسشىلەر حالىقارالىق ءتۋرنيردىڭ جەڭىمپازى اتاندى

تەننيسشىلەر توميريس نۇرجان مەن ءامىر ومارحانوۆ حالىقارالىق ءتۋرنيردىڭ جەڭىمپازى اتاندى.

توميريس نۇرجان يسپانيانىڭ بارسەلونا قالاسىندا وتكەن Open Banc Sabadell U-14 Champion ءتۋرنيرىن جەڭىپ السا، ءامىر ومارحانوۆ قاراعاندىدا ءتورتىنشى ساناتتاعى ITF Juniors ءتۋرنيرىنىڭ باس جۇلدەسىن يەلەندى.

قازاقستان تەننيس فەدەراتسياسىنىڭ حابارلاۋىنشا، توميريس نۇرجان فينالدا جەرگىلىكتى ويىنشىنى 6:4، 6:2 ەسەبىمەن جەڭگەن. جەڭىمپازعا سىيلىقتى كاتالونيا مەرى تاپسىرىپ، ونىڭ جەڭىسكە دەگەن جىگەرىن اتاپ ءوتىپ، وتانداسىمىزدى قولداۋعا دايىن ەكەندىگىن ايتقان.

وسى جەڭىسىنىڭ ارقاسىندا توميريس نۇرجان سەگىز ۇزدىك تەننيسشىمەن بىرگە ءساۋىر ايىندا بارسەلونادا وتەتىن جارىستا ونەر كورسەتەدى. بۇل دودا ATP 500 تۋرنيرىمەن قاتار وتەدى. توميريس نۇرجان 14-تە. ال 15 جاستاعى ءامىر ومارحانوۆ فينالدا ءىلياس مارات ۇلىن 3:6، 7:5، 6:1 ەسەبىمەن ۇتتى. وسىدان كەيىن ITF Juniors ءتۋرنيرىنىڭ جۇپتىق سىندا ادەمى امانكەلدى رەسەيلىك سوفيا گاپانكوۆامەن بىرگە فينالدا رەسەيلىكتەر زويا لەۆينا مەن اناستاسيا روجكوۆانى تىزە بۇكتىردى.

داستان كەنجالين،

استانا