بەلسەندىلەر تۇركياعا كومەككە قول ۇشىن بەرىپ جاتىر

بەلگىلى كاسىپكەر، جۋرناليست ارمان شوراەۆ باستاعان ازاماتتار تۇركيادا ءزىلزالادان زارداپ شەككەندەرگە قول ۇشىن بەرءىپ، كومەكتەسۋدى باستاپ كەتتى. بۇل تۋرالى قوعام بەلسەندىسى Facebook-تە كومەك بەرەمىن دەگەن ازاماتتارعا قاراتا ۇندەۋ جاريالادى.

تۇركياداعى الاپات جەر سىلكىنىسىنەن ۇيلەر قيراپ، ءبىراز كىسى وپات بولدى. امان قالعان تۋىسقان تۇرىك اعايىندارىمىز شيتتەي بالا-شاعاسىمەن اشىق الاڭداردا، سۋىق دالادا ءجۇر. بوي جىلىتۋعا، ۇيگە كىرۋدەن قورقىپ وتىر.

وسى ساتتە، قازاق جۇرتى بولىپ، جۇزدەگەن كيىز ءۇي جىبەرسەك.

سۇيەگى جەڭىل، قۇلامايتىن كيىز ءۇي – ءزىلزالادان جۇرەگى شايلىعىپ قالعان بۇقارا پسيحيكاسىنا قاۋىپسىزدىك كوڭىل كۇي بەرەدى.

ەڭ باستىسى، اتا جۇرتتان كەلگەن كومەكتى سەزىنەر ەدى. الىستا بولساق تا، تۋىسقان جۇرتتى جالعىز قالدىرمايتىنىمىزدى سەزىنەر ەدى.

«تۇركياعا 100 كيىز ءۇي» ناۋقانىن باستايىق. بۇل شارۋانى نۇربەك بەكباۋ ەكەۋمىز موينىمىزعا الدىق.

رەكۆيزيتىم: 4400430196216649

كاسپي: 87021605457، — دەدى ارمان شوراەۆ.

كاسىپكەر مەن ءجۋرناليستىڭ ۇندەۋى قوعام تاراپىنان قولداۋعا يە بولىپ، تۇركيا ازاماتتارىنا كومەكتەسەمىن دەگەن ەلدىڭ قاتارى كوبەيىپ جاتىر.

نۇربەك بەكباۋدىڭ ايتۋىنشا، قازىردىڭ وزىندە 5 ملن تەڭگەدەن ازداپ استى.

ءزىلزالادان زارداپ شەككەن تۇرىك اعايىندارعا كيىز ءۇي جىبەرەيىك، دەپ ناۋقان اشىپ ەدىك. قايىرىمدىلىققا ۇزدىكسىز ءتۇسىپ جاتىر. ءدال قازىر — 5 ملن تەڭگەدەن ازداپ استى. ءار جارتى كۇن سايىن ەسەپ بەرىپ تۇرامىن.

كيىز ءۇي جاسايتىن تسەحپەن كەلىستىك. ازىرگە سەگىز قاناتتى 3 كيىز ۇيگە تاپسىرىس بەرسەك دەيمىن. ءبىر كيىز ءۇي تولىق كومپلەكت 3 ملن تەڭگەدەن ەكەن.

سۇيەگى تەمىردەن جاسالعاندارى دا بار. ولار ارزان. بىراق تەك قاڭقاسى جانە سىرتىن جابار كيىزى عانا بار. قانشا قاراجات جينالادى، سوعان قاتىستى كورەمىز، — دەدى ول.

بۇگىن مەملەكەت باسشىسى قاسىم-جومارت توقاەۆ تا ۇكىمەتكە تۇركياعا شۇعىل كومەك رەتىندە 1 ملن دوللار ءبولۋدى تاپسىرعان بولاتىن.

داستان كەنجالين،

استانا