Belsendiler Túrkııaǵa kómekke qol ushyn berip jatyr

Belgili kásipker, jýrnalıst Arman Shoraev bastaǵan azamattar Túrkııada zilzaladan zardap shekkenderge qol ushyn berip, kómektesýdi bastap ketti. Bul týraly qoǵam belsendisi Facebook-te kómek beremin degen azamattarǵa qarata úndeý jarııalady.

Túrkııadaǵy alapat jer silkinisinen úıler qırap, biraz kisi opat boldy. Aman qalǵan týysqan túrik aǵaıyndarymyz shıtteı bala-shaǵasymen ashyq alańdarda, sýyq dalada júr. Boı jylytýǵa, úıge kirýden qorqyp otyr.

Osy sátte, Qazaq jurty bolyp, júzdegen kıiz úı jibersek.

Súıegi jeńil, qulamaıtyn kıiz úı – zilzaladan júregi shaılyǵyp qalǵan buqara psıhıkasyna qaýipsizdik kóńil kúı beredi.

Eń bastysy, Ata jurttan kelgen kómekti seziner edi. Alysta bolsaq ta, týysqan jurtty jalǵyz qaldyrmaıtynymyzdy seziner edi.

«Túrkııaǵa 100 kıiz úı» naýqanyn bastaıyq. Bul sharýany Nurbek Bekbaý ekeýmiz moınymyzǵa aldyq.

Rekvızıtim: 4400430196216649

Kaspı: 87021605457, — dedi Arman Shoraev.

Kásipker men jýrnalıstiń úndeýi qoǵam tarapynan qoldaýǵa ıe bolyp, Túrkııa azamattaryna kómektesemin degen eldiń qatary kóbeıip jatyr.

Nurbek Bekbaýdyń aıtýynsha, qazirdiń ózinde 5 mln teńgeden azdap asty.

Zilzaladan zardap shekken túrik aǵaıyndarǵa kıiz úı jibereıik, dep naýqan ashyp edik. Qaıyrymdylyqqa úzdiksiz túsip jatyr. Dál qazir — 5 mln teńgeden azdap asty. Ár jarty kún saıyn esep berip turamyn.

Kıiz úı jasaıtyn ehpen kelistik. Ázirge segiz qanatty 3 kıiz úıge tapsyrys bersek deımin. Bir kıiz úı tolyq komplekt 3 mln teńgeden eken.

Súıegi temirden jasalǵandary da bar. Olar arzan. Biraq tek qańqasy jáne syrtyn jabar kıizi ǵana bar. Qansha qarajat jınalady, soǵan qatysty kóremiz, — dedi ol.

Búgin memleket basshysy Qasym-Jomart Toqaev ta Úkimetke Túrkııaǵa shuǵyl kómek retinde 1 mln dollar bólýdi tapsyrǵan bolatyn.

Dastan KENJALIN,

ASTANA