قازاق ءجۋرناليسى توكيو مارافونىنا قاتىستى

جۋرناليست ءارى كاسىپكەر ەرەنعايىپ قۋاتاي ۇلى جاپونيانىڭ استاناسى – توكيو قالاسىندا وتكەن مارافونعا قاتىستى.

ول مارافوندا مارەگە 2 ساعات 54 مينۋت، 25 سەكۋندتتا جەتتى. ورتا تەمپى 4:05 بولدى. ال مارافوننىڭ ءوزى 42.2 شاقىرىمعا سوزىلدى. ەرەنعايىپ قۋاتاي ۇلىنىڭ ايتۋىنشا، جاپونياداعى جۇگىرۋ جارىسىنا ول وكشە جاراقاتى ەندى جازىلا باستاعاندا قاتىسقان. بۇل جاراقاتتى چيكاگو مارافونىندا العان. ءسويتىپ، ەكى اي دايىندالىپ، دارىگەردىڭ رۇقساتىمەن جارىسقا قاتىسۋعا بەل بۋعان.

قازان ايىندا چيكاگو مارافونىنان كەيىن سول جاق وكشە اۋىرا باستادى. جەلتوقساننىڭ باسىندا مرت ناتيجەسىنە قاراعان دوكتور «سىزگە جۇگىرۋگە بولمايدى، وكشە سۇيەكتە جارىقشاق بار» دەگەندە اسپان توڭكەرىلىپ جەرگە تۇسكەندەي بولدى.

ەدەل-جەدەل ەكى ايلىق ەم-دومنان كەيىن دارىگەر جۇگىرۋگە رۇقسات بەردى. ونىڭ وزىندە ءبىر اي قاتتى جۇگىرىپ وكشەگە سالماق سالماۋدى ەسكەرتتى. ەكى-اق اي قالعان توكيو مارافون بولسا كۇن سايىن جاقىن. اقپاننان باستاپ كۇنىنە ەكى رەت جۇگىرىپ دايىندالۋعا تۋرا كەلدى.

ۋاقىت از. مۇنداي دايىندىقپەن جاقسى ناتيجەگە جەتۋ نەعايبىل. مارافون جۇگىرۋ ءۇشىن كەم دەگەندە 4 اي ۇزدىكسىز دايىندالۋ كەرەك.

سونىمەن توكيودا چيكاگو 2:51:10 ناتيجەسىن جاڭارتۋ دەگەن اۋەلگى ماقسات وزگەردى. تەك sub 3 جاساۋ، ياكي 3 ساعاتقا تولتىرماي فينيشكە جەتۋ كوزدەلدى. سولاي دا بولدى.

جاراقاتى ەندى جازىلىپ كەلە جاتقان وكشەدەن قورعالاپ مارافوننىڭ العاشقى جارتىسىن (21.1كم) الىپ-ۇشپاي باياۋ جۇگىردىم.

2:54:25 ۋاقىتىمەن مارەگە جەتتىم. ورتا تەمپ 4:05، — دەدى ەرەنعايىپ قۋاتاي ۇلى.

بۇل — ونىڭ ءۇشىنشى مەيجور مارافونى. ەندى ول 3 مەيجورگە جۇگىرۋدى جوسپارلاپ وتىر. ونىڭ ايتۋىنشا، توكيودا التى بىردەي قازاقستاندىق التىنشى مەيجورىن جۇگىرىپ قۋانىشقا كەنەلدى. وسى كۇنگە دەيىن ەلىمىزدە ءالى ەشكىم الەمدەگى التى ايىرىقشا مارافون جۇگىرگەن جوق. ولار توكيونى بىرنەشە جىل كۇتىپ، ماقساتتارىنا كەشە جەتتى. ەندى قازاقستاندا التى مەيجور (بوستون، چيكاگو، نيۋ-يورك، بەرلين، لوندون، توكيو) جۇگىرگەن التى ادام بار.

داستان كەنجالين،

استانا