SportPress.kz قازاقستان سپورت جاڭالىقتارى
اۋىر اتلەت دەنيس ۋلانوۆتىڭ مادەنيەت جانە سپورت مينيسترلىگىنە قارسى ءىسى بويىنشا سوت شەشىمى شىقتى.
2016 جىلى برازيليادا وتكەن XXXI جازعى وليمپيالىق ويىنداردا دەنيس ۋلانوۆ 85 كەلىگە دەيىنگى سالماق دارەجەسىندە ءتورتىنشى ورىن العاندا وعان 30 مىڭ دوللار سىياقى تولەنگەن ەدى.
الايدا، دوپينگ داۋىنا بايلانىستى وليمپيادانىڭ قولا جۇلدەسىن يەلەنگەن گ.سينكراياننىڭ سپورتشى شەتتەتىلگەن سوڭ، ءۇشىنشى ورىن رەسمي تۇردە دەنيس ۋلانوۆقا بەرىلگەن بولاتىن. قازىر ول وليمپيادانىڭ قولا جۇلدەگەرى بولىپ سانالادى.
2021 جىلى 9 تامىزدا وليمپياداداعى جۇلدەسىنىڭ كوبەيۋىنە بايلانىستى دەنيس ۋلانوۆ مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنە اقشالاي سىياقى مولشەرىن قايتا قاراۋ تۋرالى سۇراۋ سالدى. ال وليمپيادادا ءۇشىنشى ورىن ءۇشىن 75 مىڭ دوللار قاراستىرىلعان. ءسويتىپ، سپورتشى وزىنە تيەسىلى تاعى 35 مىڭ دوللاردى العىسى كەلگەندە نورماتيۆتىك-قۇقىقتىق اكتىلەر بولماعاندىقتان وعان ءتيىستى سوما تولەنبەگەن.
وسىلايشا. سپورت كوميتەتى 2021 جىلى 20 تامىزدا نەگىزدەردىڭ بولماۋىنا بايلانىستى سپورتشىعا سىياقى مولشەرىن قايتا قاراۋدان باس تارتتى. ال سوت دەنيس ۋلانوۆتىڭ ارىزىن ەسكەرە وتىرىپ، ونىڭ تالابىن ورىنداۋ تۋرالى شەشىم شىعاردى. بىراق، اتالعان ۆەدومستۆو شەشىمگە قارسى شاعىم جاسادى.
اتالعان ءىستى قاراۋ ءبىر جىلدان استام ۋاقىتقا سوزىلدى. سونىڭ ناتيجەسىندە جوعارعى سوتتىڭ اكىمشىلىك ىستەر جونىندەگى سوت القاسى سىياقىنى قايتا قاراۋدان باس تارتۋدى زاڭسىز دەپ تاپتى. ەندى ۋلانوۆ وزىنە تيەسىلى 35 مىڭ دوللاردى الاتىن بولدى.
«نۇر-سۇلتان قالاسىنىڭ مامانداندىرىلعان اۋدانارالىق اكىمشىلىك سوتىنىڭ 2022 جىلعى 10 ناۋرىزداعى شەشىمى، نۇر-سۇلتان قالاسى سوتىنىڭ اكىمشىلىك ىستەر جونىندەگى سوت القاسىنىڭ 2022 جىلعى 31 مامىرداعى وسى ءىس بويىنشا قاۋلىسى كۇشىندە قالسىن. قازاقستان رەسپۋبليكاسى مادەنيەت جانە سپورت مينيسترلىگىنىڭ كاسساتسيالىق شاعىمى قاناعاتتاندىرۋسىز قالدىرىلسىن»، — دەلىنگەن جوعارعى سوتتىڭ قاۋلىسىندا.
داستان كەنجالين،
استانا
