شاۆكات راحمونوۆ پەن حامزات چيماەۆ جەلىدە داۋلاسىپ قالدى

UFC-ءدىڭ فايتەرلەرى شاۆكات راحمونوۆ پەن حامزات چيماەۆ Instagram الەۋمەتتىك جەلىسىندە ءبىر-ءبىرىن كەكەتىپ، سوزگە كەلىپ قالدى. ونىڭ سوڭى داۋعا ۇلاستى.

اۋەلى راحمونوۆ پاراقشاسىندا قاسقىر تەرىسىنىڭ ۇستىندە وتىرىپ تۇسكەن فوتوسۋرەتىن جاريالاپ، «بىرەۋلەر ءوزىن قاسقىرمىن دەسە… قاسقىرلار مىنە، وزدەرىڭىز كورىپ وتىرعاندارىڭىزداي ءبىزدىڭ اياعىمىزدىڭ استىمىزدا» دەپ بەلگىلى UFC-ءدىڭ فايتەرى، شۆەتسيادا تۇراتىن ۇلتى شەشەن حامزات چيۆاەۆقا قاتىستى جازبا قالدىردى. بۇعان ءوزىن «Borz» دەپ اتايتىن فايتەر جاۋاپ رەتىندە سۋرەت جاريالادى. «Borz» شەشەن تىلىندە «قاسقىر» دەپ اۋدارىلادى.

ءومىر بويى ءشيبورى بولىپ جۇرگەنگە قاراعاندا، ءوزىن قاسقىر دەپ ساناۋ ۇلكەن ابىروي، – دەپ جازدى چيماەۆ.

كەيىن شاۆكات راحمونوۆ جازباسىن ءوشىرىپ تاستادى. ونىڭ جازباسى 137 مىڭ لايك جينادى. بىراق فوتوسۋرەتىن ادەيى قالدىردى. ال چيماەۆ كوپ ۇزاماي ەت جەپ جاتقان قاسقىردىڭ ۆيدەوسىن جاريالادى.

وسىدان كەيىن  فايتەرلەردىڭ جازبالارىن ولاردىڭ جانكۇيەرلەرى دە قولداپ كەتتى. بۇل داۋدى ودان سايىن ۋشىقتىرىپ جىبەردى. سونىڭ ىشىندە راحمونوۆتىڭ جاتتىقتىرۋشىسى سايد ساپاروۆ تا پىكىر قالدىردى.

بىرەۋلەر وزدەرىن «قاسقىرمىز» دەيدى. ال بىرەۋلەر سول «قاسقىرلارعا» اڭعا شىعادى، — دەپ جازدى ول.

كەيبىرى مۇنى راحمونوۆ پەن چيماەۆ اراسىنداعى جەكپە-جەك الدىنداعى ترەش-توك دەپ اتادى.

قازىر UFC-ءدىڭ ديۆيزيونىندا چيماەۆ ءۇشىنشى ورىندا تۇرسا، راحمونوۆ التىنشى ورىنعا ورنالاسقان. شەشەن فايتەرى 12 رەت جەڭىسكە جەتسە، قازاق فايتەرى 17 رەت قارسىلاسىن ۇتقان. ەكەۋى دە ءالى بىردە-ءبىر رەت جەڭىلگەن جوق.

 

داستان كەنجالين،

استانا