«كىم ىستەگەنىن بىلمەيمىن»: بەيبىت ىستىباەۆ اياعىنىڭ ءتورت جەردەن سىنعانىن ايتتى

«قازاقستان بارىسى» ءتۋرنيرىنىڭ بىرنەشە دۇركىن جەڭىمپازى، قازاق كۇرەسىنەن الەم جانە ازيا چەمپيونى بەيبىت ىستىباەۆ سول اياعىن سىندىرىپ الدى. بۇل تۋرالى ول Uaqyt.info سايتىنا بەرگەن سۇحباتىندا ايتتى. 

بالۋاننىڭ ايتۋىنشا، ول بەس ايدان بەرى اياعىنداعى سىنىقتى ەمدەپ كەلەدى. بەلگىلى بالۋان كوكپاردا جۇرگەندە اياعىن ات قاعىپ كەتكەنىن جاسىرمادى.

«وسىدان بەس اي بۇرىن جامبىل وبلىسىنداعى اۋىلداردىڭ بىرىندە كوكپار بولدى. ويىننىڭ سوڭعى جاعىندا ات سوعىپ، سول اياعىم ءتورت جەردەن سىنىپ كەتتى. ءۇش ادام كوكپارعا تالاسىپ جاتقانبىز. جازىم عوي ەندى… سودان قاسىمداعى دوستارىم كولىككە سالىپ، سىنىقشىعا باردىق. الگى اپا اياعىمدى كورىپ، كۇشىم جەتپەيدى دەدى. ءتورت جەردەن ءبولىنىپ قالعان عوي، بىلق-سىلق ەتىپ، سالبىراپ تۇر. ودان كەيىن اۋرۋحاناعا بارىپ، تاڭعا دەيىن وپەراتسيا جاسادى. 20 كۇن بۇرىن تاعى ءبىر وپەراتسيا جاساتتىم»، — دەدى بەيبىت ىستىباەۆ.

بەيبىتتىڭ ايتۋىنشا، دارىگەرلەر ونىڭ سىنعان سۇيەكتەرىن تەمىرمەن بەكىتىپ بەرگەن. ازىرگە سىنعان ءتورت جەردىڭ ۇشەۋى عانا دۇرىس ورنىعىپتى. ول كۇزدە بولاتىن كوكپار ويىندارىنا ىشتەي دايىندالىپ جۇرگەنىن ايتادى. ال اتپەن قاققان ادامنىڭ كىم ەكەنى سول بويى جۇمباق كۇيىندە قالعان.

«كۇرەستى قويعانىما جەتى جىل بولدى. ال كوكپاردى ەكى اياقتى كەسىپ تاستاعانشا ويناي بەرەمىز عوي. قۇداي قالاسا، كۇزدەگى ويىندارعا دەيىن تولىق اياققا تۇراتىن شىعارمىن دەپ وتىرمىن. كوكپار ءوزى سونداي ويىن عوي، اياق-قولدى سىندىرىپ الۋ ءبىر-اق پاستە. اياعىمدى كىم سىندىرعانىن بىلمەيمىن، ول ادامدى ىزدەگەن دە جوقپىن. ءوزى دە كەشىرىم سۇراپ كەلگەن جوق. مۇمكىن، قورىققان شىعار. ەندى ويىن بولعاننان كەيىن ءتۇرلى جاعداي بولىپ تۇرادى عوي. ەڭ باستىسى — باس امان بولسىن»، — دەدى ىستىباەۆ.