«Kim istegenin bilmeımin»: Beıbit Ystybaev aıaǵynyń tórt jerden synǵanyn aıtty

«Qazaqstan Barysy» týrnıriniń birneshe dúrkin jeńimpazy, qazaq kúresinen álem jáne Azııa chempıony Beıbit Ystybaev sol aıaǵyn syndyryp aldy. Bul týraly ol Uaqyt.info saıtyna bergen suhbatynda aıtty. 

Balýannyń aıtýynsha, ol bes aıdan beri aıaǵyndaǵy synyqty emdep keledi. Belgili balýan kókparda júrgende aıaǵyn at qaǵyp ketkenin jasyrmady.

«Osydan bes aı buryn Jambyl oblysyndaǵy aýyldardyń birinde kókpar boldy. Oıynnyń sońǵy jaǵynda at soǵyp, sol aıaǵym tórt jerden synyp ketti. Úsh adam kókparǵa talasyp jatqanbyz. Jazym ǵoı endi… Sodan qasymdaǵy dostarym kólikke salyp, synyqshyǵa bardyq. Álgi apa aıaǵymdy kórip, kúshim jetpeıdi dedi. Tórt jerden bólinip qalǵan ǵoı, bylq-sylq etip, salbyrap tur. Odan keıin aýrýhanaǵa baryp, tańǵa deıin operaııa jasady. 20 kún buryn taǵy bir operaııa jasattym», — dedi Beıbit Ystybaev.

Beıbittiń aıtýynsha, dárigerler onyń synǵan súıekterin temirmen bekitip bergen. Ázirge synǵan tórt jerdiń úsheýi ǵana durys ornyǵypty. Ol kúzde bolatyn kókpar oıyndaryna ishteı daıyndalyp júrgenin aıtady. Al atpen qaqqan adamnyń kim ekeni sol boıy jumbaq kúıinde qalǵan.

«Kúresti qoıǵanyma jeti jyl boldy. Al kókpardy eki aıaqty kesip tastaǵansha oınaı beremiz ǵoı. Qudaı qalasa, kúzdegi oıyndarǵa deıin tolyq aıaqqa turatyn shyǵarmyn dep otyrmyn. Kókpar ózi sondaı oıyn ǵoı, aıaq-qoldy syndyryp alý bir-aq páste. Aıaǵymdy kim syndyrǵanyn bilmeımin, ol adamdy izdegen de joqpyn. О́zi de keshirim surap kelgen joq. Múmkin, qoryqqan shyǵar. Endi oıyn bolǵannan keıin túrli jaǵdaı bolyp turady ǵoı. Eń bastysy — bas aman bolsyn», — dedi Ystybaev.