ەلدىڭ نامىسىن قولدان بەرمەيمىز – رىباكينا

استانادا تەننيستەن بيللي دجين كينگ كۋبوگى (Billie Jean King Cup) ءۇشىن ىرىكتەۋ كەزەڭىنە قاتىساتىن قازاقستان مەن پولشا كوماندالارىنىڭ ماتچى الدىندا جەرەبە تارتىلىپ، ودان كەيىن قوس ەل قۇرامالارىنىڭ قاتىسۋىمەن بريفينگ ءوتتى. وعان قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ پەن ەكى ەلدىڭ تەننيسشىلەرى قاتىستى.

جەرەبە تارتۋ راسىمىندە بەلگىلى بولعانداي، ەرتەڭ بولاتىن جەكەلەي كەزدەسۋدە يۋليا پۋتينتسەۆا ماگدا لينەتتەمەن، ەلەنا رىباكينا ۆەرونيكا فالكوۆسكامەن كۇش سىناسادى. كەلەسى كۇنى تەننيسشىلەر قارسىلاستارىمەن الماسادى. ودان كەيىن جۇپتىق سىندا اننا دانيلينا مەن گوزال اينيتدينوۆا ۆەرونيكا فالكوۆسكا مەن اليتسيا روسولسكايامەن وينايتىن بولادى. وسى ماتچتا قازاقستان جەڭىسكە جەتكەن جاعدايدا ءوز تاريحىندا ەكىنشى رەت الەم چەمپيوناتىنىڭ فينالدىق كەزەڭىنە شىعادى.

ءباسپاسوز ءماسليحاتىندا پولشا قۇراماسىنىڭ وكىلدەرى قازاقستاننىڭ وتە قيىن قارسىلاس بولاتىنىن، ونىڭ قۇرامىندا تاجىريبەلى دە وتە قولايسىز قارسىلاستاردىڭ بار ەكەنىن ايتتى.

قازاقستاننىڭ ساپىندا ۋيمبلدون-2022 ءتۋرنيرىنىڭ چەمپيونى ەلەنا رىباكينا، توپىراق توسەنىشىندە تاماشا وينايتىن يۋليا پۋتينتسەۆا بار. وعان جۇپتىق سىننىڭ شەبەرى، Australian Open ءتۋرنيرىنىڭ ءفيناليسى اننا دانيلينانى دا قوسۋعا بولادى.

قازاقستان ءوز الاڭىندا وينايتىندىقتان، باسىمدىققا يە. بىراق ءبىز وسى ماتچقا ويداعىداي دايىندالىپ، جەڭىس ءۇشىن بارىمىزدى سالامىز، — دەدى پولشا كومانداسىنىڭ ليدەرى ماگدا لينەتت.

وسىدان كەيىن قازاقستان قۇراماسى باق وكىلدەرىنىڭ سۇراقتارىنا جاۋاپ بەرىپ، الداعى ويىن تۋرالى ويلارىن ايتتى. كەزدەسۋدە وسى ماتچقا قاتىسۋعا شەتەلدەن كەلگەن قازاقستاننىڭ جەكەلەگەن سىنداعى ءبىرىنشى جانە الەمنىڭ جەتىنشى راكەتكاسى ەلەنا رىباكينا دا بولدى. ول سەيسەنبى كۇنى ەلگە كەلگەن بەتتە كوماندالاستارىمەن بىرگە Beeline Arena ۇلتتىق تەننيس ورتالىعىندا توپىراق توسەنىشىندەگى كورتتا الداعى باسەكەگە دايىندىقتى باستاپ كەتكەن بولاتىن.

جيىندا قازاقستان قۇراماسىنىڭ كاپيتانى ياروسلاۆا شۆەدوۆا مەن ەلەنا رىباكينا، كوماندانىڭ باسقا دا مۇشەلەرى پولشامەن ويىنعا دايىندىقتىڭ ءتيىستى دەڭگەيدە بولعانىن، 14-15 ساۋىردە ۇلتتىق قۇراما قارسىلاستارىن جەڭۋ ءۇشىن بارىن سالىپ ونەر كورسەتەتىنىن اتاپ ءوتتى.

14 ساۋىردە جەكەلەي سىندا ەكى ويىن وتسە، 15-ىندە ەكى جەكەلەي، ءبىر جۇپتىق كەزدەسۋ جوسپارلانعان. ءبىز ۇيدە وينايمىز. جانكۇيەرلەردىڭ قولداۋىن كۇتەمىز. بۇل كەزدەسۋلەر قازاقستان قۇراماسىنا وڭاي بولمايدى، – دەدى ياروسلاۆا شۆەدوۆا.

ونىڭ ايتۋىنشا، پولشا – كوماندالىق ويىندا جاقسى ويىن ورنەگىن كورسەتەتىن قۇراما. سوندىقتان كومانداعا قارسىلاسىن قالپاقپەن ۇرىپ الامىز دەپ بوساڭسىپ ويناۋدىڭ قاجەتى جوق. ولار ماتچقا تىڭعىلىقتى دايىندالعان. سوندا دا قاتەلىك جىبەرمەي ويناۋى كەرەك.

ال رىباكينا بۇگىن پرەزيدەنتپەن كەزدەسۋدىڭ وتە جاقسى وتكەنىن، مەملەكەت باسشىسى وعان ساعات پەن ورامال بەرگەنىن، بۇعان دەيىن قاتىسقان تۋرنيرلەردە ەلدىڭ نامىسى ءۇشىن قولىنان كەلگەن جاعدايدىڭ ءبارىن جاساعانىن، وسى جولى دا ايانىپ قالمايتىنىن ايتتى.

قازىر الەمدە مىقتى تەننيسشىلەر كوپ. بارلىق ەلدەر سپورتشىلارىنا لايىقتى جاعداي جاساپ كەلەدى. ءبىزدىڭ ەلدە دە قولىنا راكەتكا ۇستاعان ازاماتتارعا تەننيسپەن ويناۋعا، جارىستارعا قاتىسۋعا ءتيىستى دەڭگەيدە قولداۋ كورسەتىلىپ جاتىر. مەنى وتباسىم دا ۇنەمى قولداپ كەلەدى. ارينە، جەڭىسپەن بىرگە جەڭىلىس تە قاتار جۇرەدى. بۇرىن ۇتىلىپ قالعاندا تەننيستى تاستاپ كەتەمىن دەگەن دە ويلار بولعان. الايدا ءتۋرنيردىڭ فينالىنا شىققاندا العا ماقسات قويىپ، كۇش-قۋات الىپ، جارىستى جالعاسىرا بەرەمىن. پولشامەن ويىنعا كەلسەم، بۇل ماتچتىڭ قىزىقتى جانە تارتىستى بولاتىنى ءسوزسىز. قارسىلاستارىمىز وسال سپورتشىلار ەمەس. ولار شاما كەلسە، جەڭىس ءۇشىن ويناۋعا تىرىسادى. بىراق ءبىزدىڭ قىزدار ولارعا مۇمكىندىك بەرمەيدى دەپ ويلايمىن. ءوزىم ويىنعا جاقسى دايىندالدىم، — دەدى ول.

ەلەنا رىباكينا ايەلدەر تەننيسى قاۋىمداستىعىنىڭ (WTA) جاڭارتىلعان رەيتينگىندە بۇرىنعىشا تىزىمدەگى جەتىنشى ورنىن ساقتاپ قالدى. ال WTA چەمپيوندىق كەستەسىندە ول ەكىنشى ساتىدا تۇر. سونداي-اق پولشامەن ماتچقا قاتىساتىن يۋليا پۋتينتسەۆا الەمدىك رەيتينگتە 47-دەن 45-كە كوتەرىلدى.

جۇپتىق سىندا قازاقستاننىڭ ءبىرىنشى راكەتكاسى اننا دانيلينا 26-ورنىن ساقتاپ قالسا، جانەل رۇستەموۆا 972-ساتىعا شىقتى.

سونىمەن بىرگە جىبەك قۇلامباەۆا، گوزال اينيتدينوۆا مەن ارۋجان ساعىندىقوۆا دا رەيتينگتەگى كورسەتكىشتەرىن جاقسارتتى. بۇل قىزدار دا ەرتەڭ بولاتىن ماتچقا قاتىسادى.

ال ەلەنا رىباكينا سوڭعى كەزدە تەننيستەگى ناتيجەلەرىن جاقسارتىپ كەلەدى. مىسالى، ول جاقىندا اقش-تىڭ مايامي شتاتىندا وتكەن WTA 1000 ءتۋرنيرىنىڭ فينالىندا چەحيالىق پەترا كۆيتوۆادان جەڭىلگەنىنە قاراماستان، الەمدىك تەننيستىڭ تاريحىندا رەكورد جاسادى. ول WTA 1000 ساناتىنداعى ءبىر تۋرنيردە 70-كە جۋىق ەيس جاساعان العاشقى تەننيسشى اتاندى.

رىباكينا اننا كالينسكايامەن ماتچتا 14، پاۋلا بادوسامەن ويىندا 12، ەليزە مەرتەنسپەن جانە مارتينا ترەۆيزانمەن كەزدەسۋدە 10، دجەسسيكا پەگۋلامەن باسەكەدە 11 جانە پەترا كۆيتوۆامەن فينالدا 12 ەيس جاسادى. تەننيسشىنىڭ ماياميدەگى تۋرنيردە جاساعان ەيستەرىنىڭ جالپى سانى 69 بولدى. بۇعان دەيىن بىردە-ءبىر تەننيسشى مۇنداي جەتىستىككە جەتپەگەن. سونداي-اق ەلەنا رىباكينا فينالدا 650 رەيتينگتىك ۇپايعا يە بولدى.

 

 

داستان كەنجالين،

فوتو: ءىلياس وماروۆ،

استانا