SportPress.kz قازاقستان سپورت جاڭالىقتارى
قازاقستاندا الداعى 6 جىلعا جوسپارلانعان سپورت تۇجىرىمداماسى بەكىتىلدى. بۇل تۋرالى مادەنيەت جانە سپورت ءمينيسترى اسحات ورالوۆ ايتتى، دەپ حابارلادى Halyq Uni تىلشىسى.
ول 2023-2029 جىلدارعا ارنالعان دەنە شىنىقتىرۋ مەن سپورتتى دامىتۋدىڭ تۇجىرىمداماسى بەكىتىلگەنىن اتاپ ءوتتى.
وندا ەلىمىزدە وسى سالالاردى دامىتۋدىڭ جاڭا باعىتىن ايقىندادىق، بۇقارالىق سپورتقا، ونىڭ ىشىندە بالالار مەن جاستار اراسىندا، ازاماتتاردىڭ بارلىق ساناتى ءۇشىن دەنە شىنىقتىرۋ جانە سپورتپەن شۇعىلدانۋدىڭ جالپىعا قولجەتىمدىلىگىنە، دەنە شىنىقتىرۋعا، اۋەسقوي جانە كاسىپتىك سپورتقا تەڭ كوزقاراسقا، جوعارى جەتىستىكتەر سپورتىن جانە بەيىمدەلگىش سپورتتى دامىتۋعا باسا نازار اۋداردىق، — مينيستر.
ونىڭ ايتۋىنشا، 2029 جىلعا دەيىن جىل سايىن ەلىمىز بويىنشا 20 مىڭنان اسا سپورتتىق-بۇقارالىق ءىس-شارا وتۋگە ءتيىس، ال اۋىلدارداعى سپورت نۇسقاۋشىلارىنىڭ سانى 4 مىڭعا دەيىن وسەدى. مەكتەپتەر مەن جوعارى وقۋ ورىندارىنىڭ جانىنان تۇراقتى نەگىزدە جۇمىس ىستەيتىن سپورت كلۋبتارى مەن كوماندالار قۇرىلادى. ولاردىڭ اراسىندا اۋداندىق، وبلىستىق جانە رەسپۋبليكالىق جارىستار وتەدى.
ۇلتتىق سپورت تۇرلەرىن ناسيحاتتاۋعا سپورتتىق-بۇقارالىق ءىس-شارالاردى دامىتۋعا ەرەكشە ءمان بەرىلەدى.
مىسالى، ەلىمىزدە V دۇنيەجۇزىلىك كوشپەندىلەر ويىندارى وتەدى. قازاقستاننىڭ سولتۇستىك وڭىرلەرىندە ۇلتتىق سپورت تۇرلەرىن دامىتۋعا ەرەكشە نازار اۋدارىلادى، — دەدى اسحات ورالوۆ.
سونداي-اق جاڭا سپورت نىساندارى سالىنىپ، ەسكى عيماراتتار كۇردەلى جوندەۋدەن وتەدى.
113 جاڭا سپورت نىسانىن سالۋ، 20-سىن جاڭارتۋ جانە جۇمىس ىستەپ تۇرعان 6 سپورت نىسانىن قايتا جاراقتاندىرۋ جۇمىسى جالعاسادى. اۋىلداردا شاعىن بيۋدجەتتى سپورت قۇرىلىستارىنا جانە مودۋلدىك ۇلگىدەگى از شىعىندى، تەز سالىناتىن سپورت كەشەندەرىنە باسىمدىق بەرىلەدى. سونداي-اق مينيسترلىك جۇمىس ىستەپ تۇرعان دەنە شىنىقتىرۋ-ساۋىقتىرۋ جانە سپورت عيماراتتارىنا تۇگەندەۋ جۇرگىزەدى. بيزنەستى سپورتتىق ينفراقۇرىلىم سالۋعا ىنتالاندىرۋ جونىندەگى شارالار ازىرلەنەتىن بولادى. مىسالى، نىساندى سالۋ شىعىندارىنىڭ ءبىر بولىگىن وتەۋ، — دەدى ول.
مينيستر وليمپيادالىق رەزەرۆتى دايىنداۋ ءۇشىن قازاقستان بويىنشا جاتتىعۋ ورتالىقتارى قۇرىلاتىنىن اتاپ ءوتتى.
وندا جىل بويى جەتەكشى سپورتشىلار دا، باسىم سپورت تۇرلەرى بويىنشا بارلىق دارىندى سپورتشىلار دا دايىندالادى. بۇل ورتالىقتاردا جۇمىس ىستەۋگە عىلىمي قىزمەتكەرلەر دە تارتىلادى. ال وبلىستاردىڭ جانە رەسپۋبليكالىق ماڭىزى بار قالالاردىڭ قۇراما كوماندالارىن دايىنداۋ ءۇشىن قازاقستاننىڭ بارلىق وڭىرىندە استانانىڭ ۇلگىسىمەن وليمپيادالىق جانە وليمپيادالىق ەمەس تۇرلەر بويىنشا سپورتتى دامىتۋ ديرەكتسياسىن قۇرۋ جوسپارلانىپ وتىر، — دەدى ۆەدومستۆو باسشىسى.
سونىمەن قاتار وليمپيادا ويىندارىنا سپورتشىلاردى دايىنداۋ جۇمىسى كۇشەيەدى.
«جاتتىقتىرۋشى-وقىتۋشىلارعا سپورتشىلاردىڭ جوعارى ناتيجەلەرى جانە ولاردى سپورتتىق دايىندىقتىڭ كەلەسى كەزەڭىنە بەرگەنى ءۇشىن ىنتالاندىرۋ تولەمدەرى ەنگىزىلەدى. بۇل جاس تالانتتاردىڭ العا جىلجۋىنا كومەكتەسەدى، ال ماماندارعا قوسىمشا موتيۆاتسيا بەرەدى.
الداعى جازعى جانە قىسقى وليمپياداعا دايىندىق ماقساتىندا «پاريج-2024» جانە «ميلان-2026» باعدارلامالارى ىسكە اسىرىلادى، ولاردىڭ شەڭبەرىندە ءبىز سپورتشىلارعا جان-جاقتى قولداۋ كورسەتەمىز، — دەدى اسحات ورالوۆ.
سپورتتىق مەديتسينانى دامىتۋعا ەرەكشە كوڭىل بولىنەدى.
ەلىمىزدە سپورتشىلاردى وڭالتۋعا جانە قالپىنا كەلتىرۋگە ارنالعان وڭىرلىك دارىگەرلىك-دەنە شىنىقتىرۋ ديسپانسەرلەرىنىڭ بولىمشەلەرىن اشۋ بويىنشا جۇمىس جالعاسادى. سپورتتىق مەديتسينا ورتالىعىن كەزەڭ-كەزەڭىمەن جاڭعىرتۋ جانە ۇلتتىق قۇرامالاردى مەديتسينالىق-بيولوگيالىق قامتاماسىز ەتۋ ساپاسىن جاقسارتامىز. جاس سپورتشىلار جاعدايىندا ولاردىڭ جاس، فيزيولوگيالىق جانە پسيحولوگيالىق ەرەكشەلىكتەرى ەسكەرىلەدى، — دەدى مينيستر.
2025 جىلى سپورت مەكەمەلەرى، كوماندالار قۇرامى، جاتتىقتىرۋشىلار، تورەشىلەر جانە سپورتتىق ءىس-شارالار تۋرالى مالىمەتتەر جيناۋعا ارنالعان E-Sport ۇلتتىق تسيفرلىق پلاتفورماسىن ەنگىزىلەدى.
جوبانىڭ ماقساتى – سپورتشىلاردىڭ، جاتتىقتىرۋشىلاردىڭ، تورەشىلەر مەن ادىسكەرلەردىڭ قىزمەتىنە مونيتورينگ جۇرگىزۋ، كاسىبي سپورتشىلار مەن جاتتىقتىرۋشىلاردى دايارلاۋ جۇيەسىن دامىتۋ، كادرلار تاپشىلىعىن ەڭسەرۋ، سونداي-اق سپورت سالاسىنداعى مەملەكەتتىك قىزمەتتەردى اۆتوماتتاندىرۋ، — دەدى مينيسترلىكتىڭ باسشىسى.
سونداي-اق سپورت دارىگەرلەرىن، پسيحولوگتاردى، ديەتولوگتاردى، نۋتريتسيولوگتاردى، بەيىمدەۋ باعىتىندا دەنە شىنىقتىرۋ جاتتىقتىرۋشىلارىن جانە باسقا دا مامانداردى دايارلاۋعا مەملەكەتتىك ءبىلىم بەرۋ تاپسىرىسىن ۇلعايتۋ ماسەلەسى پىسىقتالادى.
قولدانىستاعى ەرەجەنىڭ ورنىنا سپورتشىنى دايارلاۋدىڭ بارلىق كەزەڭىندە جاتتىقتىرۋشىلار ءۇشىن جوعارى سپورتتىق ناتيجەلەر ءۇشىن بىرجولعى تولەمدەردى ەنگىزۋ جوسپارلانعان. وعان سايكەس، مۇنداي تولەمدەر تەك ءبىرىنشى، جەكە جانە باس جاتتىقتىرۋشىلار ءۇشىن عانا ەسەپتەلەدى.
رەسپۋبليكالىق جانە وڭىرلىك سپورت فەدەراتسيالارى سپورت تورەشىلەرىن دايىندايدى. سونداي-اق حالىقارالىق ارەنادا قازاقستاندىق تورەشىلەر سانىن ارتتىرۋ بويىنشا جۇمىستى كۇشەيتەمىز.
دەنە شىنىقتىرۋ جانە سپورت جونىندەگى رەسپۋبليكالىق وقۋ-ادىستەمەلىك جانە تالداۋ ورتالىعى شەتەلدىك لەكتورلاردى تارتا وتىرىپ، جاتتىقتىرۋشىلار مەن وقىتۋشىلاردىڭ بىلىكتىلىگىن ارتتىرۋ جونىندەگى جۇمىستى جالعاستىرادى، — دەدى اسحات ورالوۆ.
ءىس-شارالار ناتيجەسىندە 2030 جىلعا قاراي دەنە شىنىقتىرۋمەن جانە سپورتپەن جۇيەلى تۇردە اينالىساتىن بالالار مەن جاسوسپىرىمدەردىڭ ۇلەسىن 45%-عا دەيىن، ال سپورتتىق بەلسەندى حالىقتىڭ جالپى ۇلەسىن 50%-عا دەيىن ۇلعايتۋعا، ەرەكشە قاجەتتىلىكتەرى بار ادامدار اراسىندا بۇل كورسەتكىشتى 23%-عا دەيىن ارتتىرۋدى جوسپارلاپ وتىرمىز.
1000 ادامعا سپورتتىق ينفراقۇرىلىممەن قامتاماسىز ەتۋ كورسەتكىشىن 65%-عا دەيىن، ال تىرەك، جاقىن ماڭداعى جانە ستراتەگيالىق اۋىلدىق ەلدى مەكەندەردى سپورتتىق ينفراقۇرىلىممەن قامتۋ 100%-عا دەيىن وسۋگە ءتيىس.
ۇلتتىق سپورت تۇرلەرىمەن اينالىساتىن ازاماتتاردىڭ پايىزى دەنە شىنىقتىرۋ جانە سپورتپەن اينالىساتىنداردىڭ جالپى سانىنىڭ 9،6%-نا دەيىن جەتەدى»، — دەدى مينيستر.
سونداي-اق سپورت شەبەرى مەن حالىقارالىق دارەجەدەگى سپورت شەبەرى نورماتيۆتەرىن ورىنداعان وليمپيادالىق رەزەرۆتەگى مەكتەپ-ينتەرنات-كوللەدجدەر تۇلەكتەرىنىڭ ۇلەسىن 35%-عا دەيىن ارتتىرۋ جوسپاردا بار.
اسحات ورالوۆ حالىقارالىق دەڭگەيدەگى تۋرنيرلەردە جەڭىپ الىنعان مەدالدار سانىن جىلىنا كەم دەگەندە 900 بىرلىككە جەتكىزۋدى كوزدەلىپ وتىرعانىن اتاپ ءوتتى.
ونىڭ ايتۋىنشا، بۇل – ماقساتتار اۋقىمدى ءارى ۇلكەن. دەگەنمەن وعان بىرلەسكەن كۇش-جىگەردىڭ ارقاسىندا قول جەتكىزۋگە بولادى. ول ءۇشىن بۇگىننەن باستاپ بەلسەندى جۇمىس ىستەلىنىپ جاتىر.
داۋرەن ەربولات،
استانا
