بوكس: ءتورتىنشى كۇنگى كورسەتكىش – ءبىر جەڭىس، ءبىر جەڭىلىس

تاشكەنتتە ءوتىپ جاتقان بوكستان الەم چەمپيوناتىنىڭ ءتورتىنشى كۇنى ءبىزدىڭ ءبىر اتلەت جەڭىسكە جەتىپ، تاعى ءبىر سپورتشى جەڭىلىس تاپتى. بۇل تۋرالى rast.kz حابارلادى.

بۇگىن 48، 51، 63،5 كەلىلەرگە دەيىنگى جانە 92 كەلىدەن اۋىر سالماقتارداعى اتلەتتەر ءوزارا كۇش سىناستى.

كۇندىزگى سەسسيادا شارشى الاڭعا شىققان 63،5 كيلوعا دەيىنگى سالماقتاعى ءساناتالى تولتاەۆ ماۆريكيلىك ريچارنو كولين لۋيسپەن قولعاپ ءتۇيىستىردى. وكىنىشكە قاراي، بۇل جەكپە-جەكتە بەلسەندىلىك تانىتقان افريكالىق جىگىت جەڭىستى تارتىپ اكەتتى. تارتىستى وتكەن باسەكەنىڭ قورىتىندىسىندا تورەشىلەر سولاي دەپ شەشتى.

وسىمەن، قازاقستان قۇراماسى ساپىنان ەكىنشى بىلعارى قولعاپ شەبەرى جارىس جولىنان شىعىپ قالىپ وتىر. كەشە مۇنداي ساتسىزدىككە 60 كەلىگە دەيىنگى سالماقتاعى تالعات سىرىمبەتوۆ ۇشىراعان ەدى. بىراق ول ءوزىنىڭ ميلليونداعان وتانداستارىنىڭ كوزقاراسىنشا، ازيا چەمپيونى، يوردانيالىق موحاممەد ابۋ دجادجەدتەن ۇتىلا قويعان جوق. ءبىزدىڭ وعلان سونىڭ الدىنداعى، 1/32 فينالدىق ىرىكتەۋ سايىسىندا تاي ساكدا رۋامتحامدى 5:2 ەسەبىمەن ۇتقان بولاتىن.

ال كەشكى سەسسيانىڭ ەڭ سوڭعى جۇبىندا شايقاستىڭ شاڭىن شىعارعان 92 كەلىدەن اۋىر سالماقتاعى قامشىبەك قوڭقاباەۆ رەسەيلىك الەكسەي درونوۆتان 4:1 ەسەبىمەن باسىم ءتۇستى. جەكپە-جەكتىڭ ءبىرىنشى راۋندىندا ونىڭ قارسىلاسى 3:2 ەسەبىمەن العا شىعىپ كەتتى. سودان كەيىن قامشىبەك شىنىمەن قامشىنى باستى. ءسويتىپ، ەكىنشى راۋندتا-اق تارازى باسىن وزىنە قاراي اۋدارىپ الدى. ال ءۇشىنشى راۋندتا وسى قارقىننان ايىرىلعان جوق، بۇل جولى ءتىپتى ءبىر رەت باسەكەلەسىن نوكداۋنعا ءتۇسىردى.

ەندى قامشىبەك 7 مامىر كۇنى 1/8 فينالدىق شايقاسقا سيريالىق موحامماد ملايەسپەن شىعادى. ودان اسا السا، شيرەك فينالدا مەدالدار اۋىلى ءۇشىن شايقاسادى. سول كەزدە وزبەك باحودير جالولوۆپەن بەتپە-بەت كەلىپ قالۋى مۇمكىن.

بۇل كۇنى باسقا ەلدەردىڭ نامىسىن قورعاپ جۇرگەن تاعى ءۇش قازاق جىگىتى جەڭىسكە جەتتى. اتاپ ايتقاندا، 90 كەلىدەن اۋىر سالماقتاعى قىتايلىق قازاق دانابەك بايعازى كۇندىزگى سەسسيادا 2021 جىلعى الەم چەمپيوناتىنىڭ كۇمىس جۇلدەگەرى، ارميان داۆيد چالوياندى جولدان شىعارىپ تاستاپ، سەنساتسيا جاسادى. وزبەكستان قۇراماسى ساپىنداعى جەرگىلىكتى قازاق، ازيانىڭ 2022 جىلعى چەمپيونى رۋسلان ابدۋللاەۆ 63،5 كەلىگە دەيىنگى سالماقتا يسپانيالىق كوندە ويەەر يبارەچچەنى ءبىرىنشى راۋندا ەكى رەت نوكداۋنعا جىبەردى. سودان كەيىن ونىڭ قارسىلاسىنىڭ سەكۋندانتتارى ورتاعا اق ورامال تاستاپ، شايقاستى توقتاتتىردى.

كەشكى سەسسيادا بۇدان بىرقاتار ۋاقىت بۇرىن باحرەين ازاماتتىعىن العان بۇرىنعى جەرلەسىمىز ازات ماحمەتوۆ 51 كەلىگە دەيىنگى سالماقتا يتاليان الەسسو كاميولانى 4:1 ەسەبىمەن تىزە بۇكتىردى. ول بوكس جولىن جالعاستىرۋ ءۇشىن وسىنداي قادامعا بارعان ەدى.

ەرتەڭ، 5 مامىردا ءۇش جىگىتىمىز شىعادى. سونىڭ ىشىندە 57 كەلىگە دەيىنگى سالماقتاعى سەرىك تەمىرجانوۆ – ماليلىك ابدۋل كاريم باتحيليمەن، 80 كەلىگە دەيىنگى سالماقتاعى نۇربەك ورالباي – ازەربايجان مۋراد اللاحۆەرديەۆپەن، ال 92 كەلىگە دەيىنگى سالماقتاعى ايبەك ورالباي يتاليالىق ازيز اببەس موۋحيدينمەن شايقاسادى. بۇلاردىڭ اراسىندا سەرىك كۇندىزگى سەسسيادا شىقسا، اعايىندى ەگىزدەر نۇربەك پەن ايبەك كەشكى سەسسيادا باقتارىن سىنايدى.

كۇندىزگى سەسسيا – ساعات 13:00-16:00، كەشكى سەسسيا ساعات 18:00-21:00 ارالىعىندا وتەدى.

سول ۋاقىتتاردا Qazsport تەلەارناسىنان تىكەلەي ەفيردە كورسەتىلەدى.