SportPress.kz قازاقستان سپورت جاڭالىقتارى
جاقىندا الماتىدا وتكەن «تەنگري ۋلترا» مارافونعا قاتىسقان 41 جاستاعى ازامات مارەگە ساناۋلى مەتر قالعاندا قايتىس بولعان ەدى. ول وسىمەن جارىسقا ءتورتىنشى رەت قاتىسقان كورىنەدى. قايتىس بولعان ازامات دەنساۋلىعىنا قاتىستى شاعىم ايتپاپتى.
وسى وقيعاعا بايلانىستى 24.kz مارافوندى ۇيىمداستىرۋشىلار مەن دارىگەرلەردىڭ جۇگىرۋ جارىسىنا قاتىسقان ازامات تۋرالى پىكىرلەرىن جاريالادى.
دارىگەرلەردىڭ ايتۋىنشا، مارافون تالاپتارىن كۇشەيتۋ قاجەت. سەبەبى، جىل سايىن جۇگىرۋ جارىسىندا كەمىندە ءبىر ادامنىڭ قايتىس بولاتىنى الاڭداتادى.
الماتىداعى «تەنگري ۋلترا» مارافونىن ۇيىمداستىرۋشىلار بولسا، «جارىسقا قاتىسۋشىنىڭ دەنساۋلىعى الدىن الا تەكسەرىلە مە؟» دەگەن سۇراققا جاۋاپ بەرۋدەن باس تارتتى. بىراق الەۋمەتتىك جەلىدەگى پاراقشاسىندا ماسەلەنىڭ ءمان-جايىن ءتۇسىندىرىپ، مارقۇمنىڭ وتباسىنا كوڭىل ايتتى.
مارافوندى ۇيىمداستىرۋشىلاردىڭ ءبىرىنىڭ ايتۋىنشا، قايتىس بولعان ازاماتقا جارىستا كەزەكشىلىكتە تۇرعان ينتەنسيۆتى تەراپيا بريگاداسى بىردەن العاشقى كومەك كورسەتتى. الايدا قۇتقارىپ قالا المادى.
استانا قالاسى اكىمدىگىنىڭ سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ ءبولىم باسشىسى اجار مۋسۋلامبەكوۆا مارافونعا تەك رۇۇقسات قاعازى بار ادامدار عانا جىبەرىلەتىنىن ايتتى.
ءار ءىس-شارانىڭ وزىندىك ەرەجەسى، ياعني رەگلامەنتى بولادى. سول رەگلامەنت بويىنشا ءاربىر قاتىسۋشى دەنساۋلىعى جارامدى تۋرالى دارىگەردىڭ ءمورى بار قاعاز اكەلەدى. سول قاعاز ارقىلى عانا تىركەلە الادى. دەنساۋلىعى جارامسىز بولسا، ءبىز ونى قابىلداي المايمىز. تىركەۋدەن وتپەيدى. استانا قالاسىندا بۇل جاعىنان تالاپ قاتاڭ، — دەدى ول.
ال مارافونشىلاردىڭ پىكىرىنشە، جۇگىرۋ جارىسىنا قاتىسقىسى كەلەتىن ادام ەڭ باستىسى جاتتىعۋ جاساۋ قاجەت. ياعني، مارافونعا بىرنەشە اي دايىندالۋ كەرەك. مىسالى، جەڭىل اتلەتيكا جاتتىقتىرۋشىسى ايگۇل ارجانيكوۆا ىستامبۇل مارافونىنا كوپ ادام قاتىسقانىن، ول جەردە ەشقانداي انىقتاما سۇراماعانىن، تەك جاۋاپكەرشىلىك تۋرالى قاعازعا قول قويعاندارىن ايتتى.
سوندىقتان مارافونعا بىرنەشە اي دايىندالۋ كەرەك. جاتتىقپاساڭىز، ءوزىڭىزدىڭ دەنساۋلىعىڭىزعا قاۋىپ تونەدى. اسىرەسە، ۋاقىتپەن جارىسقاندا قيىن، — دەدى ول.
سول سياقتى اۋەسقوي سپورتشى ساۋلە كەمەلوۆا دا مارافونعا اسا جاۋاپكەرشىلىكپەن قاتىسۋ كەرەكتىگىن ەسكەرتتى. ونىڭ ايتۋىنشا، بار كانىنى جارىستى ۇيىمداستىرۋشىلارعا ارتۋعا بولمايدى. بۇل قاتە پىكرى.
ءبىز ۇنەمى قول قويامىز. ەگەر قول قويماساق قاتىسۋشىنىڭ نومەرى بەرىلمەيدى. بارلىق جارىستىڭ الدىندا «ءوز دەنساۋلىعىم ءۇشىن ءوزىم جاۋاپ بەرەمىن» دەپ، قۇجاتقا قول قوياسىڭ. ۇيىمداستىرۋشىعا عانا كىنا ارتۋعا بولمايدى. دەنساۋلىعى مىقتى ادامنىڭ ءوزى قۇلاپ جاتادى. مۇمكىن ول جايسىز ۇيىقتاعان شىعار، مۇمكىن باسقا دا سترەسستىك جاعدايدا بولعان شىعار، — دەدى ول.
ال دارىگەرلەردىڭ ايتۋىنشا، جارىسقا قاتىساتىن كەز كەلگەن ادام ارنايى تەكسەرۋدەن ءوتۋى قاجەت.
قايىرعالي كونەەۆ ەسىمدى كارديولوگتىڭ پىكىرىنشە، ءار ادام مارافونعا قاتىناسامىن دەسە، مىندەتتى تۇردە دارىگەرگە بارىپ، جۇرەگىن تەكسەرتىپ، اناليزدەرىن تاپسىرىپ، دارىگەرگە ءوزى بارۋى كەرەك. مارافونعا قاتىساتىن ادام دەنساۋلىعىنا جاۋاپكەرشىلىگىن ءوزى الۋى كەرەك. ارينە، ادام ءوز ءومىرى ءۇشىن الدىمەن ءوزى جاۋاپتى، — دەدى دارىگەر.
قورىتا ايتقاندا، ەلىمىزدە ۇيىمدامستىرىلاتىن مارافونداردان جىل سايىن ءبىر اۋلەتتىڭ وتباسى قارا جامىلىپ جاتادى. بۇل الدىمەن دارىگەرلەر مەن سپورتشىلار ايتقانداي، جارىسقا قاتىساتىن ادامنىڭ جاۋاپكەرشىلىگىنە بايلانىستى.
داستان كەنجالين،
استانا
