SportPress.kz قازاقستان سپورت جاڭالىقتارى
قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ ەۋروپا چەمپيوناتىنا ىرىكتەۋ كەزەڭىندەگى سان-مارينومەن ماتچتىڭ الدىندا باق وكىلدەرىنىڭ سۇراقتارىنا جاۋاپ بەردى.
– ماگومەد مۇسا ۇلى، سان-مارينو مەن سولتۇستىك يرلانديا قۇرامالارىمەن ويىنداردىڭ اراسىندا ءۇش كۇن عانا ءۇزىلىس بولادى. ۋاقىت تىعىز ەكەن، ءۇزىلىس قىسقا. ەكى كوماندانىڭ دا دەڭگەيى بىردەي ەمەس. بۇل ەلدەرمەن ءبىزدىڭ كوماندا قاي قۇرامدا شىعادى؟ كوماندانىڭ قۇرامى وزگەرە مە؟
– ءبىز قارسىلاسپەن قالاي وينايتىنىمىزدى جوسپارلايمىز. ۇنەمى جادىمىزدا ۇستايتىن جوسپارلى وزگەرىستەر بار. بىراق ويىندا ءارتۇرلى جاعدايلار بولادى. سان-مارينومەن ويىننان كەيىن ءبىزدىڭ قۇرامدا وزگەرىستەر بولۋى مۇمكىن. سونى ويلاپ ءجۇرمىن.
– قازاقستان قۇراماسى سىرتتاعى كەزدەسۋلەردە سيرەك فاۆوريت سانالادى. سان-ماريونومەن ماچتا فاۆوريت ەكەنبىز. كوماندا قارسىلاستى جەڭە الا ما؟
– قازاقستان قۇراماسىنا فاۆوريت دەگەن باعا بەرىلىپ جاتسا، نەگە قۋانباسقا؟ قۋانىپ وتىرمىن. بىراق ەشقاشان بوساڭسۋعا بولمايدى. ويتكەنى، ول ەشتەڭەنى بىلدىرمەيدى. فاۆوريت بولعانىڭ ءۇشىن ۇپاي بەرىلمەيدى. بارلىعىن جاسىل الاڭداعى ويىن شەشەدى.
– الداعى ويىندا ابات ايىمبەتوۆتىڭ ورنىنا كىم شىعادى؟
– ويىننىڭ جوسپارىن جاسادىق. ەندى ماتچتى كۇتەيىك. كەيبىر ويىنشىلارعا قاتىستى سۇراقتار بار. ءبىز سوڭعى جاتتىعۋدان كەيىن ەكى پوزيتسيانى شەشەمىز.
– ارمان كەڭەسوۆ پەن الىبەك قاسىمنىڭ الداعى ويىندارعا شىعا ما؟
– قۇراما كوماندادا باسەكەلەستىك بار. سوندىقتان ولارعا وڭاي ەمەس. مەن كومانداداعى ويىنشىلاردىڭ بارىنە سەنەمىن. بىراق مۇمكىندىكتەرى قانشالىقتى ەكەنىن ناقتى بىلمەيمىن. ويىن بارلىعىن كورسەتەدى. كەيدە جوسپاردان تىس شەشىمدەر قابىلدانادى. ويلاماعان فۋتبولشى الاڭعا شىعاتىن جاعدايلار دا بولادى.
– زاينۋتدينوۆكە رەسەي كۋبوگىنىڭ فينالى قيىن بولعان سياقتى. باحتيەر الداعى ماتچتاردا وزىنە كەلە مە؟
– مەن ايتقان فۋتبولشىلاردىڭ ءبىرى – زاينۋتدينوۆ. ول ءوزىن ازداپ جايسىز سەزىنىپ ءجۇر. باحا – ءوز ەلىنىڭ جانە ۇلتتىق قۇرامانىڭ ناعىز پاتريوتى. تسسكا ويىنشىسى رەتىندە الداعى ويىنعا قاتىسقىسى كەلەتىنىن ايتتى. الايدا ونىڭ الاڭعا شىعاتىنىن-شىقپايتىنىن ءالى ايتا المايمىن. سان-ماريوندان كەيىن سولتۇستىك يرلانديامەن ويىن بولادى. ەندى كورەمىز. ءدال قازىر ءبارىن ايتا المايمىن. قازىر باحيتەر قۇرامامەن جاتتىعۋ جاساپ ءجۇر. بۇگىن شەشىم قابىلدايمىز.
– ماگومەد مۇسا ۇلى، ءوزىڭىز بىلەسىز، جاقىندا اباي وڭىرىندە ورتتەن كەيىن حالىقتىڭ كوڭىل-كۇيى بولماي ءجۇر دەۋگە بولادى. وسىنداي كەزدە ۇلتتىق قۇراما ەكى ويىندا جەڭىسكە جەتىپ، ەلىمىزگە قۋانىش سىيلاي الا ما؟
– ءيا، ارينە، ءبىز اباي وبلىسىندا بولعان، جالپى ەلىمىزدە بولىپ جاتقان وقيعالاردىڭ بارىنەن حاباردارمىز. بارلىعىن جاقسى تۇسىنەمىز. كومانداداعى جىگىتتەر دە بىلەدى. قيىن جاعدايعا تاپ بولعان جاندارعا الاڭداپ، قولدان كەلگەنشە كومەك كورسەتكىمىز كەلەدى. بۇل تۋرالى فەدەراتسيا پرەزيدەنتىمەن دە سويلەستىم. ءورت سوندىرۋشىلەر مەن ءوز ومىرلەرىن قاتەرگە تىككەن بارشا جاندارعا العىسىمىزدى بىلدىرەمىز. ولارعا كۇش-قۋات تىلەيمىن! قيىن جاعدايدىڭ ءبارى ارتتا قالادى دەپ ۇمىتتەنەمىن.
