«دينامو» كۋبوگىن قالامگەرلەر كومانداسى جەڭىپ الدى (فوتو، ۆيدەو)

 الماتىداعى «دينامو» ستاديونىندا شاعىن فۋتبولدان تارتىستى ءبىر تاماشا تۋرنير بولىپ ءوتتى.

جارىستىڭ اشىلۋ سالتاناتىننان كەيىن 6 كوماندا ەكى توپقا ءبولىنىپ، ەكى الاڭدا ويىندارىن قىزۋ باستاپ كەتتى.

«ا» توبىندا «قالامگەر»،» قازاق راديوسى»، «دينامو ارداگەرلەرى» كلۋبتارى الاڭعا شىقسا، «ۆ» توبىندا «قازاقستان ۇلتتىق ارناسى»، «الاتاۋ اقپارات» جانە «قر ىشكى ىستەر اكادەمياسى» كوماندالارى تارتىستى ويىندارىن وتكىزدى.

پوليتسيا قىزمەتكەرلەرى مەن باق وكىلدەرى مەرەكەسىنە وراي «دينامو» كۋبوگى ءۇشىن وتكەن دودالى فۋتبول جارىسىندا ءبىزدىڭ «قالامگەر» كومانداسى توپجارىپ باس جۇلدەنى جەڭىپ الدى.

فينالدا «قالامگەر» «قر ىشكى ىستەر اكادەمياسى» كومانداسىنا قارسى ويناپ، 2:0 ەسەبىمەن جەڭىسكە جەتتى. وسىلايشا «دينامو» كۋبوگى بارلىق قارسىلاستارىن ءىرى ەسەپپەن جەڭگەن «قالامگەر» كومانداسىنا تابىس ەتىلدى.

جارىس سوڭىندا جەڭىمپازدار مەن جۇلدەگەرلەر ءتۇرلى نوميناتسيالار بويىنشا باعالى سىيلىقتارمەن ماراپاتتالدى. ءتۋرنيردىڭ ۇزدىك سۇرمەرگەنى اتاعى اللا بۇيىرتىپ، 10 گول سالعان اقىن ورداباي ۇلىنىڭ قانجىعاسىنا بايلاندى. بەلگىلى ارىپتەسىمىز بىلتىر وسى ءتۋرنيردىڭ كۇمىس جۇلدەگەر اتانىپ ەدى. ەندى مىنە، بيىل التىن جۇلدە بۇيىرعان ەكەن.

اللاعا مىڭ شۇكىر دەيمىز. ءتۋرنيردىڭ جۇلدەلى ەكىنشى ورنىن «قر ىشكى ىستەر اكادەمياسى» يەلەنسە، قولا جۇلدە «دينامونىڭ» ارداگەر سپورتشىلارىنا تابىس ەتىلدى.

«سىرلى اياقتىڭ سىرى كەتسە دە سىنى كەتپەيدى»،  دەمەكشى، ارداگەرلەر وتە تاجىربيەلى ساقا فۋتبولشىلاردان قۇرالعان ەدى. ارالالارىندا كەزىندە «قايرات» سەكىلدى ايگىلى كوماندانىڭ جەيدەسىن كيگەن ارعىمباەۆ سىندى ساڭلاقتاردا بار. بۇل تۋرنيردە وزگەدەن ەرەكشە ارداگەرلەرگە قارسى ويناۋ وتە قيىن سوقتى. دەگەنمەندە 4:2 ەسەبىمەن جەڭىسكە جەتكەن ەدىك. ال، سول «دينامونىڭ» ارداگەرلەر قۇراماسى قازاقستان ۇلتىق ارناسىنىڭ كومانداسىمەن 3 ورىن ءۇشىن كەزدەسىپ، ويىننىڭ نەگىزگى ۋاقىتىندا 3:3 ەسەبىمەن تەڭ ءتۇسىپ، پەنالتيدەن ارداگەرلەردىڭ اسىعى الشىسىن ءتۇستى. ءسويتىپ، ءتۋرنيردىڭ قولا جۇلدەسىن جەڭىپ الدى، — دەدى قالام مەن ميكروفوندى قاتار ۇستاپ، ونىمەن قوسا تەڭبىل دوپتى ۇرشىقشا ءيىرىپ جۇگرگەن تالانتتى ارىپتەسىمىز اقىن ورداباي ۇلى.

«قالامگەر» كومانداسىنىڭ ساپىندا تاماشا ويىن كورسەتكەن فۋتبول ارداگەرى ەرلان ءامىروۆ، عالىم، ەرلان، اقمار، ابىلاي، ماقسات سىندى ارىنى مىقتى، شابىسى ەرەك ويىنشىلارعا جانكۇيەرلەر قول سوعىپ، قوشەمەت كورسەتىپ وتىردى. جۇمىلعان جۇدىرىقتاي ىنتىماق بىرلىگى جاراسقان كوماندا ارقاشاندا جەڭىسكە جەتەرى انىق. بۇل جولى ءدال سولاي بولدى. كوماندا ءبىر قولدىڭ سالاسىنداي ادەمى ويىن ورنەگىن كورسەتە ءبىلدى.

اللا وسىنداي جەڭىستى كۇندەردى كوپ قىلسىن! تۋرنيرگە قاتىسۋشىلار وسىنداي تارتىمدى دا تارتىستى جارىستى ۇيىمداستىرۋشى «دينامو» سپورت قوعامى مەن ەلگە تانىمال ارداگەر سپورت ءجۋرناليسى ءالىم اناپيانوۆ اعامىزعا شەكسىز راحمەت ايتىپ جاتتى.

«سپورت دەنساۋلىق كەپىلى»، دەمەكشى، فۋتبول ويناپ جۇگىرىپ، ءومىر قوزعالىسىندا بولعانعا نە جەتسىن!.

داستان كەنجالين،

استانا