بۋبليك العاش رەت اتر 500 ءتۋرنيرىنىڭ جەڭىمپازى اتاندى

قازاقستاننىڭ ءبىرىنشى، الەمنىڭ 27-راكەتكاسى الەكساندر بۋبليك گەرمانيانىڭ گاللە قالاسىندا ءوتىپ جاتقان ATP 500 ءتۋرنيرىنىڭ جەڭىمپازى اتاندى.
ول فينالدا الەمنىڭ 7-راكەتكاسى، رەسەيلىك اندرەي رۋبلەۆپەن باس جۇلدەنى ساراپقا سالدى.

وسىعان دەيىن بۋبليك جەتى رەت ATP جارىستارىنىڭ فينالىنا شىعىپ، سونىڭ بىرەۋىندە عانا، بىلتىر مونپەلەدە جەڭىمپاز اتانعان ەدى. ال بيىل ول العاش رەت  ATP 500 دەڭگەيىندە فينالعا شىعىپ، جەڭىمپاز اتاندى.

فينالدا بۋبليك ماتچتى برەيكپەن ءساتتى باستاپ، قارسىلاسىن 6:3 ەسەبىمەن ۇتتى.

ەكىنشى پارتيادا ەسەپ 3:2 بولعان كەزدە رەسەيلىك سپورتشى برەيك جاساپ، ەسەپتى 6:3-كە جەتكىزدى.

ءۇشىنشى، شەشۋشى سەتتى بۋبليك ماتچتى تاعى دا برەيكپەن باستادى. ەسەپ 2:0 بولعاندا ول قارسىلاسىنا ەسەپتى تەڭەستىرۋگە مۇمكىندىك بەرگەن جوق. ءۇشىنشى سەتتەگى ەسەپ 6:3 ەسەبىمەن اياقتالدى.

بۇل ماتچ ءبىر جارىم ساعاتقا سوقىلدى. وسى ۋاقىتتا تەننيسشى 21 ەيس جاساپ، 6 برەيك-پوينتتىڭ ەكەۋىن پايدالاندى.

قازاقستان تەننيس فەدەراتسياسىنىڭ پرەزيدەنتى بولات وتەمۇراتوۆ الەكساندر بۋبليكتى جەڭىسىمەن قۇتتىقتادى.

الەكساندر بۋبليكتى تەننيس مانسابىنداعى كەزەكتى جەڭىسىمەن قۇتتىقتايمىن! ول اتر-500-دەگى ءبىرىنشى تيتۋلىن جەڭىپ الدى. الەكساندر ەلىمىزدە تەننيستىڭ دامۋى ءۇشىن ۇلكەن جەڭىسكە جەتىپ، جاس ۇرپاققا ۇلگى كورسەتتى.

فينالعا بارار جولدا مىقتى قارسىلاستارىن ۇتتى. ال فيناالدا بار كۇشىن سالىپ، الەمنىڭ 7-راكەتكاسى اندرەي رۋبلەۆتى جەڭدى. ءبىزدىڭ ەرلەر قۇراماسىنىڭ كوشباسشىسىنا جاڭا تابىستار تىلەيمىن!، دەدى وتەمۇراتوۆ.

داستان كەنجالين،

استانا