قاراعاندى وبلىسى قول دوبىنان ءوز اتاعىن قورعاپ قالدى

قاراعاندى قالاسىندا قول دوبىنان ەرلەر اراسىندا VI جازعى سپارتاكياداسى مارەسىنە جەتتى، دەپ حابارلادى مادەنيەت جانە سپورت مينيسترلىگىءنىڭ سپورتتى دامىتۋ ديرەكتسياسى.

ءبىر اپتا بويى كەنشىلەر استاناسىندا 6 ءوڭىردىڭ كومانداسى ءوزارا (استانا، شىمكەنت قالاسى، قاراعاندى، ماڭعىستاۋ، اقتوبە جانە الماتى وبلىسى) اينالمالى جۇيە بويىنشا مىقتىنى انىقتادى.

شەشۋشى تۋردا بىردەن قاراعاندى، اقتوبە مەن شىمكەنت گاندبولشىلارى باس جۇلدەدەن دامەلى بولدى. جارىس قوجايىنى استانا قالاسىنىڭ كومانداسىن ۇتىپ (38-30)، ۇپاي سانىن 8-گە جەتكىزدى. وسىدان كەيىن شىمكەنت قالاسى اقتوبە وبلىسىنىڭ جاساعىن 33:22 ەسەبىمەن جەڭدى. وسىلايشا، 3 كوماندا دا بىردەي 8 ۇپايدان جينادى.

جۇلدەگەرلەر دوپ ايىرماشىلىعى بويىنشا عانا انىقتالدى. قاراعاندى وبلىسى جەڭىمپاز اتانسا (57-53)، شىمكەنت قالاسى كۇمىس (56-55)، اقتوبە وبلىسى (51-56) قولا مەدالگە يە بولدى.

وسىعان دەيىنگى V جازعى سپارتاكيادا قاراعاندى قالاسىندا وتكەن. سول كەزدە 4 كوماندانىڭ اراسىندا (قاراعاندى، استانا، پاۆلودار مەن اتىراۋ) كەنشىلەر چەمپيون اتانعان. استانا قالاسى كۇمىس، پاۆلودار وبلىسى قولا العان. بيىلعى جارىستىڭ دەڭگەيى ءبىر ساتى بولسا دا كوتەرىلگەن. سوڭعى تۋردا 3 كوماندانىڭ بىردەي ۇپاي جيناپ، تەڭ ءتۇسۋى سونىڭ كورسەتكىشى، — دەدى استانا قالاسى كومانداسىنىڭ جاتتىقتىرۋشىسى ۆلاديمير بەرەزين.

نەبارى ەكى رەت جەڭىسكە جەتكەن ەلوردالىقتار بۇل جولى 4-ورىنمەن شەكتەلدى. جازعى سپارتاكياداعا قاتىسىپ جاتقان جاڭا وبلىستىڭ ءبىرى الماتى بەسىنشى، ال ماڭعىستاۋ وبلىسى التىنشى ساتىدان كورىندى.

ءبىز قولا مەدالدى مىسە تۇتتىق. قالاعانىمىز باس جۇلدە ەدى. شىمكەنت قالاسىمەن ناشار وينادىق. اسىرەسە، العاشقى اينالىمدا. تىم كوپ گول سوققىزىپ العان سوڭ ايىرماشىلىق كوبەيىپ كەتتى. نەگە بۇلاي بولعانىن بىلمەيمىن. دەمەك، ءالى دايىندىقتى كۇشەيتىپ، تاعى جۇمىس ىستەۋ كەرەك. ەندى ۇلتتىق قۇرامامەن ازيا ويىندارىنا دايىندىق كۇتىپ تۇر. قۇرامانىڭ جۋىردا جاساقتالعانىنا قاراماستان جاقسى ناتيجە كورسەتۋگە بارىمىزدى سالامىز، — دەدى اقتوبە كومانداسىندا وينايتىن ۇلتتىق قۇرامانىڭ قاقپاشىسى اسىلحان نابيەۆ.

قازاقستان ەرلەر قۇراماسى الدا قىتايداعى ازيادا مەن قاتار استاناسىندا وتەتىن پاريج وليمپياداسىنىڭ ىرىكتەۋ تۋرنيرىنە قاتىسادى.

شامكەن بايىربەك،

استانا