چەمپيوندار ليگاسى: «استانا» تبيليسيدە كامبەك جاسادى (ۆيدەو)

استانانىڭ «استانا» فۋتبول كلۋبى چەمپيوندار ليگاسىنىڭ ىرىكتەۋ ءتۋرنيرىنىڭ ءبىرىنشى ساتىسىندا ءتبيليسيدىڭ «دينامو» كومانداسىن سىرت الاڭدا 2:1 ەسەبىمەن جەڭىپ، كەلەسى كەزەڭگە شىقتى.

بۇعان دەيىن 12 شىلدەدە كوماندالاردىڭ استاناداعى العاشقى ماتچى 1:1 ەسەبىمەن تەڭ اياقتالعان ەدى.

كاۆكاز ەلىندەگى ەكىنشى ماتچ ءتبيليسيدىڭ بوريس پايچادزە اتىنداعى ستاديونىندا بولدى. كەڭەس وداعى كەزىندە مۇندا «دينامو» كلۋبى 1964، 1978 جىلدارى ەل چەمپيون اتانعان. 1990 جىلدان بەرى گرۋزيانىڭ چەمپيوناتىن 18 رەت جەڭگەن. سول كەزدەرى وسى الاڭدا دوپ تەپكەن «ديناموشىلار» 1981 جىلى UEFA كۋبوك يەگەرلەرى كۋبوگىنىڭ يەگەرى اتانعان. ءسويتىپ، بۇكىل ەۋروپانىڭ كوماندالارى ساناساتىن كوماندا بولعان.

ال كەشەگى ماتچتا الاڭ يەلەرى چەمپيوندار ليگاسىنىڭ ءبىرىنشى ىرىكتەۋ تۋرنيرىندەگى ەكىنشى ويىنىن كسرو كەزىندەگى «ديناموشىلار» سياقتى جەڭىسكە دەگەن جىگەرمەن باستادى. ماتچتىڭ ءبىرىنشى تايمىندا جەرگىلىكتى كوماندا قوناقتاردىڭ قاقپاسىنا الىستان دا جاقىن جەردەن دە كوزدەپ وتىردى. سول سەبەپتى «استانا» قورعانىسقا كوبىرەك كوڭىل ءبولىپ، الاڭ يەلەرىنە ەسەپتى ءبىرىنشى بولىپ اشۋعا مۇمكىندىك بەرەمۋگە تىرىستى. الايدا  گرۋزين فۋتبولشىلارى شابۋىلعا ءبىراز دەن قويىپ،  سونىڭ ناتيجەسىن 22-مينۋتتا كوردى. ءبىرىنشى تايمانىڭ بەل ورتاسىنا كەلگەندە «دينامونىڭ» شابۋىلشىسى ۋسمان كامارا ەسەپ اشىپ كەتتى. بىراق «استانا» كلۋبى گول جىبەرىپ السا دا وعان بولا اشۋعا بوي بەرگەن جوق. كەرىسىنشە، ىلەزدە جينالىپ، ەسەپتى تەڭەستىرۋ ءۇشىن قارسى شابۋىلعا شىعۋعا تىرىستى.

ماتچتىڭ ەكىنشى تايمىنىڭ باسىندا ويىن مۇلدەم وزگەرىپ كەتتى. «دينامونىڭ» ويىنشىلارى  1:0 دەگەن ەسەپكە بوساڭسىپ، قوناقتاردىڭ ەكى بىردەي قارسى شابۋىلىنا شارا قولدانا الماي قالدى. «استانا» كلۋبىندا ءبىرىنشى بولىپ كوپتىڭ اراسىندا كورىنە الماي جۇرگەن ابزال بەيسەبەكوۆ كوزگە ءتۇستى. ول 50-مينۋتتا گرۋزيندەردىڭ قاقپاسىنىڭ الدىندا گول سالۋعا وتە قيىن ساتتە جول تاۋىپ، ەسەپتى تەڭەستىرىپ كەتتى.  الەكس ءامانوۆيچتىڭ ايىپ دوپ الاعىنا الىستان اسىرعان پاسى ابزال بەيسەبەكوۆ ىڭعايىنا كەلىپ قالىپ، ول دوپتى وڭ اياعىمەن قاقپانىڭ سول جاق بۇرىشىنا ءدال جىبەردى.

«استانا» كلۋبىنىڭ ەكىنشى گولى، كومبيناتسيا جاعىنان الىپ قاراعاندا، تىپتەن جاقسى گول بولدى. ارادا ءبىر مينۋت وتكەندە الەكس امانوۆيچ تاعى دا ەكىنشى دوپتىڭ اسسيستەنتى بولىپ، گول سالۋعا مۇمكىندىك جاسادى. ول ءبىزدىڭ قاقپانىڭ ماڭايىنان «دينامونىڭ» الاڭىندا ەشكىمنىڭ قاراۋىنسىز قالعان دەمبو داربونى بايقاپ، الىستان پاس بەردى. داربو وسى دوپتى وڭ اياعىمەن توقتاتىپ، سوسىن گرۋزيندەردىڭ قاقپاسىنا قاراي ءىلىپ اكەتىپ،  ايىپ الاڭىنا كىرگەن بويدا قاقپانىڭ «توعىزدىعىنا» ءدال قادادى. ەسەپ – 2:1.

وسىدان كەيىن الاڭ يەلەرىنىڭ بىرنەشە رەت گول سالۋعا مۇمكىندىگى بولدى. الايدا ودان ناتيجە شىقپادى. ءسويتىپ، «استانا» بيىلعى چەمپيوندار ليگاسىنداعى العاشقى كامباگىن جاساپ، سىرت الاڭدا جەڭىسكە جەتتى.

ەندى «استانا» ىرىكتەۋ ءتۋرنيرىنىڭ ەكىنشى ساتىسىندا حورۆاتيانىڭ استاناسى – زاگرەبكە بەت الادى. مۇندا «دينامو» كلۋبىمەن كەزدەسەدى. ءبىرىنشى ويىن 25 شىلدەدە زاگرەبتە، ەكىنشى ماتچ 2 تامىزدا استانادا بولادى.

داستان كەنجالين،

استانا