كونفەرەنتسيا ليگاسى: «توبىل» كەلەسى ىرىكتەۋ ساتىسىنا شىقتى (ۆيدەو)

فۋتبولدان قوستانايدىڭ «توبىل» كلۋبى UEFA كونفەرەنتسيا ليگاسىنىڭ ىرىكتەۋ ءتۋرنيرىنىڭ العاشقى ساتىسىندا سىرت الاڭدا فينليانديانىڭ «حونكا» كومانداسىمەن كەزدەسىپ، 0:0 ەسەبىمەن تەڭ وينادى.

ماتچتىڭ ءبىرىنشى تايمىندا كوماندالار جىلدام ويىن ورنەگىن كورسەتىپ، تەز گول سالۋعا تىرىستى. الايدا الاڭ يەلەرى دە قوناقتار دا ەسەپ اشا المادى. ەكى كوماندا دا مۇمكىندىك بولدى. اسىرەسە، «حونكا» جاساعىنىڭ شابۋىلشىلارى «توبىلدىڭ» ايىپ دوپ الاڭىن اينالشاقتاپ ءجۇرىپ، قاۋىپتى جاعدايلار جاساپ وتىردى. قوستانايدىڭ ويىنشىلارى دا قاراپ قالعان جوق. ولار دا الاڭنىڭ قوس قاپتالىنان شابۋىل جاساپ، الاڭ يەلەرىن ءبىراز ابىگەرگە ءتۇسىردى. دەگەنمەن ەكى كوماندا دا ءوز ماقساتىنا جەتە العان جوق. تابلوداعى ەسەپ وسىلايشا، وزگەرمەي ويىنشىلار ۇزىلىسكە كەتتى.

ويىننىڭ ەكىنشى تايمى دا قىزىقتى جانە تارتىستى ءوتتى. كەيبىر ساتتە ويىنشىلار نىسانانى ءدال كوزدەگەنىمەن قاقپاشىلار قاۋىپتى جاعدايدىڭ بەتىن قايتارىپ وتىردى. ءسويتىپ، 45+6 مينۋتقا جالعاسقان ەكىنشى تايمنىڭ توقەتەرىن ايتساق، قارسىلاستار ءبىر-بىرىنەن ايلاسىن اسىرا الماي، ويىندى تەڭ اياقتاۋعا ءماجبۇر بولدى.

وسى ماتچتاعى تەڭ ويىن «توبىلدىڭ» پايداسىنا شەشىلدى. قوستانايدىڭ كلۋبى ەندى ءبىرىنشى ويىنداعى جەڭىستى ەسەپكە الا وتىرىپ، UEFA كونفەرەنتسيا ليگاسىنىڭ ەكىنشى ىرىكتەۋ ساتىسىندا ويناۋعا مۇمكىندىك الدى. ەسكە سالا كەتسەك، ءبىرىنشى ماتچتا «توبىل» «حونكانى» ءوز الاڭىندا 2:1 ەسەبىمەن جەڭگەن بولاتىن.

ەندى «توبىل» ەكىنشى ىرىكتەۋ ساتىسىندا شۆەيتساريانىڭ «بازەل» كومانداسىمەن كەزدەسەدى.

سونداي-اق، كونفەرەنتسيا ليگاسىنىڭ ەكىنشى ىرىكتەۋ تۋرنيرىندە شىمكەنتتىڭ «ورداباسى» كلۋبى پولشانىڭ «لەگيا» جاساعىمەن، «اقتوبە» «ساراەۆو» (بوسنيا) جانە «تورپەدو كۋتايسي» (گرۋزيا) جۇبىنىڭ جەڭىمپازىمەن كەزدەسەدى.

ويىن 27 شىلدە جانە 3 تامىز كۇندەرى بولادى.

داستان كەنجالين،

استانا