قازاقستان دۇنيەجۇزىلىك ستۋدەنتتەر ويىندارىنا قاتىسادى

قازاقستان قۇراماسىنىڭ ساپىندا 90 ستۋدەنت قىتايدا وتەتىن XXXI جازعى دۇنيەجۇزىلىك ستۋدەنتتەر ويىندارىنا قاتىسادى. بۇل تۋرالى عىلىم جانە جوعارى ءبىلىم مينيسترلىگى حابارلادى.

27 شىلدە — 8 تامىز ارالىعىندا قىتايدىڭ چەندۋ قالاسىندا XXXI جازعى دۇنيەجۇزىلىك ستۋدەنتتەر ويىندارى وتەدى. حالىقارالىق سپورتتىق ءىس-شارا — قىتايدا وتەتىن ءۇشىنشى ستۋدەنتتىك ويىندار، ازيادا وتەتىن ون بەسىنشى دۇنيەجۇزىلىك ستۋدەنتتىك ويىندار.

عىلىم جانە جوعارى ءبىلىم مينيسترلىگىنىڭ مالىمەتىنە قاراعاندا، ستۋدەنتتەرىمىز ءجۇزۋ، جەڭىل اتلەتيكا، سەمسەرلەسۋ، سپورتتىق گيمناستيكا، كوركەم گيمناستيكا، دزيۋدو، تاەكۆوندو، ۇستەل تەننيسى، ۋ-شۋ، وق اتۋ، ساداق اتۋ، دايۆينگ، سۋ پولوسى، بادمينتون، باسكەتبول، اكادەميالىق ەسۋ، ۇلكەن تەننيس، ۆولەيبول سەكىلدى 11 سپورت تۇرىنەن ءوزارا سايىسقا تۇسەدى.

ەل قۇراماسى ساپىندا 90 ستۋدەنت ونەر كورسەتەدى، سونداي-اق دەلەگاتسيا قۇرامىندا 20 جاتتىقتىرۋشى، 2 دارىگەر، 1 جۋرناليست، 3 شتاب وكىلى بار، بارلىعى – 116 ادام.

ى.التىنسارين اتىنداعى ارقالىق پەداگوگيكالىق ينستيتۋتىنىڭ دەنە شىنىقتىرۋ ماماندىعىنىڭ 3-كۋرس ستۋدەنتى، قازاقستانىڭ ءۇش دۇركىن چەمپيونى، دزيۋدو كۇرەسىنەن سپورت شەبەرى، جاستار اراسىندا ازيا چەمپيوناتىنىڭ قولا جۇلدەگەرى (تايلاند، بانكوگ) قابلان نۇرسۇلتان (07.07.2003) سالتاناتتى اشىلۋ راسىمىندەگى شەرۋدە قازاقستان قۇراماسىنىڭ كوشىن باستاپ، ەلىمىزدىڭ جالاۋىن كوتەرىپ شىعادى، — دەلىنگەن مالىمەتتە.

27 شىلدە كۇنى 20.00-دە (قىتاي ۋاقىتىمەن) سپورتشىلار قالاشىعىندا مەملەكەتتىك تۋ كوتەرۋ ءراسىمى، 28 شىلدە اشىلۋ سالتاناتى، 8 تامىز جابىلۋ سالتاناتى وتەدى. 27 شىلدەدە قازاقستان سپورتشىلارى ساداق اتۋ جارىسىمەن ستۋدەنتتىك ويىنداردى باستايدى.

ەلىمىزدىڭ قۇراماسى 26 جوعارى وقۋ ورنىنىڭ ستۋدەنتتەرىنەن جاساقتالعان.