«الماتى تۋرى – 2017» ۆەلوجارىسى ەلۋ ەلدە كورسەتىلەدى

ەرتەڭ، ياعني 30 قىركۇيەك كۇنى الماتى قالاسىندا ءداستۇرلى حالىقارالىق «الماتى تۋرى – 2017» كوپكۇندىك ۆەلوجارىسى باستالادى.

بيىل ايتۋلى جارىس قارقىن الىپ، كوپكۇندىك پىشىندە وتەتىن بولدى. «الماتى تۋرىنا» الەمنىڭ 17 مەملەكەتىنەن 20 كوماندا قاتىسادى. قازاقستان نامىسىن ادەتتەگىدەي Astana Pro Team كومانداسى قورعايدى. وسىعان دەيىن وتكەن ءتورت جارىستىڭ بارىندە ءدال وسى ەلوردالىق ۇجىم جەڭىسكە جەتكەن بولاتىن.

بۇگىن ايتۋلى جارىسقا قاتىساتىن كوماندالاردىڭ تانىستىرىلۋ ءراسىمى ءوتتى. سالتاناتتى شارا كەزىندە جاڭا «Apple Team» كومانداسى قۇرىلعانى حابارلاندى.

جيىندا الماتى قالاسىنىڭ اكىمى باۋىرجان بايبەك بارلىق كومانداعا ساتتىلىك تىلەدى. ول سونداي-اق، ءوز سوزىندە مۇنداي ايتۋلى دودا قالا تۇرعىندارىنىڭ سپورتقا دەگەن قىزىعۋشىلىقتارىن ارتتىرا تۇسەتىنىن مالىمدەدى.

«قۇرمەتتى، قالا تۇرعىندارى مەن قوناقتارى! بەسىنشى حالىقارالىق «الماتى تۋرى» ۆەلوجارىسىنا قوش كەلدىڭىزدەر! وسى ۋاقىت ارالىعىندا جارىس الەمدىك دەڭگەيگە دەيىن كوتەرىلدى. «الماتى تۋرىن» الەمنىڭ ەلۋدەن استام مەملەكەتى تاماشالايتىن بولادى. بۇل ءوز كەزەگىندە شەتەلدىكتەردىڭ ەلىمىزگە دەگەن قىزىعۋشىلىعىن ارتتىرا تۇسپەك. ءبىز الماتىنىڭ قۇرلىقتىق «Apple team» كومانداسى قۇرىلعانىنا قۋانىشتىمىز. بۇل ۇجىم ءتۇرلى جارىستاردا قالامىزدىڭ نامىسىن قورعايتىن بولادى. مەملەكەت باسشىسى نۇرسۇلتان نازارباەۆتىڭ قولداۋىنىڭ ارقاسىندا الماتى بۇگىندە الەمدىك دەڭگەيدەگى سپورت جارىستارىن وتكىزە الاتىن، زاماناۋي سپورتتىق ينفراقۇرىلىمى بار ورتالىققا اينالدى. ال قالامىزدىڭ دامۋ ستراتەگياسىندا ۆەلوسپورت ەرەكشە ورىن الادى. «الماتى تۋرى» قازاقستاننىڭ سپورتتىق ومىرىندەگى ماڭىزدى وقيعا بولىپ ەسەپتەلەدى. ءوز كەزەگىندە بۇل سپورتتىڭ دامۋىنا جانە جاستاردى سالاۋاتتى ءومىر سالتىن ۇستانۋعا قۇلشىندىرا تۇسەرى ءسوزسىز»، دەدى الماتى قالاسىنىڭ اكىمى باۋىرجان بايبەك.

ۆەلودوداعا قاتىسۋشىلاردىڭ باسىم بولىگى قۇرلىقتىق كوماندالار. ازەربايجاننىڭ «Synergy Baku Cycling Project» ۇجىمى جوبا قۇرىلعان كەزدەن بەرى قاتىسىپ كەلەدى. بيىلعى مەرەيتويلىق، ياعني بەسىنشى نۇسقاسىنا مالايزيادان، قىتايدان، ۋكراينادان جانە يراننان كوماندالار قاتىسپاق. قۇرلىقتىق كوماندالاردىڭ اراسىندا اقش، ۇلىبريتانيا، گەرمانيا، بەلارۋس، شۆەيتساريا جانە جاپونيا ەلدەرىنەن كەلگەندەر دە بار.

«الماتى تۋرىنا» يتاليادان «Wilier Triestina Selle Italia» كاسىپقوي قۇرلىقتىق كومانداسى تۇڭعىش رەت كەلىپ وتىر. ال وزبەكستان ۇلتتىق قۇراماسىنىڭ ۆەلوشاباندوزدارى «الماتى تۋرىنا» وسىمەن ءتورتىنشى رەت قاتىسپاق.