«Almaty týry – 2017» velojarysy elý elde kórsetiledi

Erteń, ıaǵnı 30 qyrkúıek kúni Almaty qalasynda dástúrli halyqaralyq «Almaty týry – 2017» kópkúndik velojarysy bastalady.

Bıyl aıtýly jarys qarqyn alyp, kópkúndik pishinde ótetin boldy. «Almaty týryna» álemniń 17 memleketinen 20 komanda qatysady. Qazaqstan namysyn ádettegideı Astana Pro Team komandasy qorǵaıdy. Osyǵan deıin ótken tórt jarystyń bárinde dál osy elordalyq ujym jeńiske jetken bolatyn.

Búgin aıtýly jarysqa qatysatyn komandalardyń tanystyrylý rásimi ótti. Saltanatty shara kezinde jańa «Apple Team» komandasy qurylǵany habarlandy.

Jıynda Almaty qalasynyń ákimi Baýyrjan Baıbek barlyq komandaǵa sáttilik tiledi. Ol sondaı-aq, óz sózinde mundaı aıtýly doda qala turǵyndarynyń sportqa degen qyzyǵýshylyqtaryn arttyra túsetinin málimdedi.

«Qurmetti, qala turǵyndary men qonaqtary! Besinshi halyqaralyq «Almaty týry» velojarysyna qosh keldińizder! Osy ýaqyt aralyǵynda jarys álemdik deńgeıge deıin kóterildi. «Almaty týryn» álemniń elýden astam memleketi tamashalaıtyn bolady. Bul óz kezeginde sheteldikterdiń elimizge degen qyzyǵýshylyǵyn arttyra túspek. Biz Almatynyń qurlyqtyq «Apple team» komandasy qurylǵanyna qýanyshtymyz. Bul ujym túrli jarystarda qalamyzdyń namysyn qorǵaıtyn bolady. Memleket basshysy Nursultan Nazarbaevtyń qoldaýynyń arqasynda Almaty búginde álemdik deńgeıdegi sport jarystaryn ótkize alatyn, zamanaýı sporttyq ınfraqurylymy bar ortalyqqa aınaldy. Al qalamyzdyń damý strategııasynda velosport erekshe oryn alady. «Almaty týry» Qazaqstannyń sporttyq ómirindegi mańyzdy oqıǵa bolyp esepteledi. О́z kezeginde bul sporttyń damýyna jáne jastardy salaýatty ómir saltyn ustanýǵa qulshyndyra túseri sózsiz», dedi Almaty qalasynyń ákimi Baýyrjan Baıbek.

Velododaǵa qatysýshylardyń basym bóligi qurlyqtyq komandalar. Ázerbaıjannyń «Synergy Baku Cycling Project» ujymy joba qurylǵan kezden beri qatysyp keledi. Bıylǵy mereıtoılyq, ıaǵnı besinshi nusqasyna Malaızııadan, Qytaıdan, Ýkraınadan jáne Irannan komandalar qatyspaq. Qurlyqtyq komandalardyń arasynda AQSh, Ulybrıtanııa, Germanııa, Belarýs, Shveıarııa jáne Japonııa elderinen kelgender de bar.

«Almaty týryna» Italııadan «Wilier Triestina Selle Italia» kásipqoı qurlyqtyq komandasy tuńǵysh ret kelip otyr. Al О́zbekstan ulttyq quramasynyń veloshabandozdary «Almaty týryna» osymen tórtinshi ret qatyspaq.