كۇرەستەن الەم كۋبوگىنا قاتىساتىن بالۋاندار انىقتالدى

10-11 جەلتوقسان كۇندەرى اقش-تىڭ ايوۆا شتاتىنداعى كورالۆيلل قالاسىندا ەركىن جانە ايەلدەر كۇرەسىنەن الەم كۋبوگى جارىسى وتەدى.

بيىل Xtream Arena-دا ۇيىمداستىرىلاتىن بەلدەسۋلەردە ەرلەر مەن ايەلدەر ەركىن كۇرەستەن العاش رەت ءبىر سپورت كەشەنىندە جينالىپ، شىن مىقتىنى انىقتايدى.

سپورتتى دامىتۋ ديرەكتسياسىنىڭ ءباسپاسوز قىزمەتى مۇحيتتىڭ ارعى بەتىندەگى دودادا قازاقستان قۇراماسىنان ەكى وكىل باق سىنايتىنىن مالىمدەدى. ولار — قىزدار اراسىنداعى 72 كەلىگە دەيىنگى سالماقتاعى الەم رەيتينگىنىڭ كوشباسشىسى ءجاميلا باقبەرگەنوۆا مەن ەرلەر اراسىنداعى بيىلعى ازيا چەمپيونى ازامات داۋلەتبەكوۆ (86 كەلى).

بالۋاندار الەم قۇراماسى ساپىندا كۇرەسەدى. ءار ەلدىڭ تاڭداۋلى بوزكىلەم شەبەرلەرىنەن جاساقتالعان كوماندا ۆ توبىندا اقش جانە قىتاي قۇرامالارىمەن جارتىلاي فينال جولداماسىن ساراپقا سالادى. ال ا توبىندا جاپونيا، ۋكراينا مەن موڭعوليانىڭ بۇرىمدى بالۋاندارى ءوزارا كۇش سىناسادى.

قىتاي قۇراماسى 72 كەلىگە دەيىنگى سالماقتا ءبىر عانا بالۋان – تسيان دەگەنچاگاندى (UWW رەيتينگىندە ول 12-ورىندا تۇر) جارىسقا قاتىستىرادى. جارىس قوجايىنى اقش قىركۇيەكتە بەل­گرادتا الەم چەمپيونى اتانعان اميت ەلور مەن سكايلار ەلليسون گروتەنى تاڭداپتى.سەربيا استاناسىندا ءجاميلا فينالدا ءدال وسى اميت ەلورعا ەسە جىبەرىپ، كۇمىس جۇلدەگە يە بولعان ەدى.

ءجاميلا بيىل حالىقارالىق كۇرەس فەدەراتسياسى (UWW) بەكىتكەن بارلىق سالماقتاعى الەمدىك رەيتينگتى (72 كەلىگە دەيىنگى سالماقتا) ءبىرىنشى ورىنمەن اياقتاعانى بارشاعا ءمالىم. ونىڭ ەنشىسىندە 52 000 ۇپاي بار. UWW ەرەجەسى بويىنشا، جىلدى ءبىرىنشى ورىنمەن قورىتىندىلاعانى ءۇشىن وعان حالىقارالىق كۇرەس فەدەراتسياسى 5 000 اقش دوللارى كولەمىندە سىياقى بەرەدى. ءجاميلا بيىل بىرقاتار تولايىم تابىسقا جەتتى. ماسەلەن، ول الەم چەمپيوناتىندا كۇمىس جۇلدەگەر بولسا، ازيا بىرىنشىلىگىندە التىننان القا تاقتى. سونداي-اق بولات تۇرلىحانوۆ اتىنداعى گران-پري جارىسىندا دا دارا شىقتى. ال يسلام ويىندارىندا قولا جۇلدەنى قاناعات تۇتتى.

ال وتانداسىمىزدىڭ باستى قارسىلاسى – اميت ءبىر جىلدا جاستار، 23 جاسقا دەيىنگىلەر جانە ەرەسەكتەر اراسىندا الەم چەمپيوناتىندا توپ جارعان ءبىرىنشى امەريكالىق بالۋان.

الەم كۋبوگىندا وتانداسىمىزعا كىمدەر قارسىلاس اتانباق؟ موڭعوليا وسى سالماقتاعى بەت­كەۇستارى داۆااناسان ەنح امار مەن سارناي باياربااتاردىڭ جولىنا ۇمىتپەن قارايدى. ۋكراينا دا ءوز كوشباسشىسى اناستاسيا الپەەۆاعا سەنىم ارتادى. ول قازىر رەيتينگتە 13-ساتىدا تۇر. 21 جاستاعى بالۋان بيىل يسپانيادا 23 جاسقا دەيىنگىلەر اراسىنداعى الەم چەمپيوناتىندا قولا جۇلدەنى يەلەنگەن.

الەم كۋبوگىن جىل سايىن حالىقارالىق كۇرەس فەدەراتسياسى (United World Wrestling) ۇيىمداستىرادى. مۇندا الەم چەمپيوناتىندا جالپى ەسەپتە ۇزدىك شىققان 5 قۇراما مەن الەم قۇراماسى (وزگە قۇرامالارداعى ۇزدىك بالۋانداردان جاساقتالعان) كۇش سىناسادى.

قازاقستاندىق كۇرەس جانكۇيەرلەرى كورالۆيلل قالاسىنداعى تارتىستى بەلدەسۋلەردى حالىقارالىق كۇرەس فەدەراتسياسىنىڭ (United World Wrestling) رەسمي سايتىنىڭ تىكەلەي ەفيرىنەن كورە الادى.

داستان كەنجالين،

استانا