جاس بالۋاندار الەم چەمپيونى اتاندى

ازەربايجاننىڭ استاناسى باكۋ قالاسىندا كۇرەستەن 17 جاسقا دەيىنگى سپورتشىلار اراسىندا ءوتىپ جاتقان الەم چەمپيوناتىندا قازاقستان قۇراماسىنىڭ بالۋاندارى ديار ءامانالى مەن باقداۋلەت اعابەك التىن جۇلدەنى جەڭىپ الدى.

تۋريزم جانە سپورت مينيسترلىگىنىڭ حابارلاۋىنشا، ەركىن كۇرەستەن 48 كيلوعا دەيىنگى سالماق دارەجەسىندە باقداۋلەت اعابەك فينالدا ءۇندىستاننىڭ وكىلى ااريان اارياندى 10:0 ەسەبىمەن  جەڭىپ، الەم چەمپيونى اتاندى. ول قارسىلاسىن تەحنيكالىق باسىمدىقپەن جەڭدى.

وعان دەيىن باقداۋلەت اعابەك بەس بەلدەسۋدىڭ بارلىعىندا جەڭىسكە جەتتى.

ىرىكتەۋ كەزەڭىندە تاجىكستان وكىلى مۋسليحيددين حودجيەۆتى (10:0)، 8/1 فينالدا بولگاريا بالۋانى ەمير دجەۆاتوۆتى (10:0) ۋاقىتىنان بۇرىن جەڭسە، شيرەك فينالدا موڭعوليانىڭ وكىلى تەمۇۇلەن ۋسۋحباياردى نەبارى 36 سەكۋندتا 10:0 ەسەبىمەن ايلاسىن اسىردى. ال جارتىلاي فينالدا 2026 جىلعى U17 ازيا چەمپيونى، وزبەكستاننىڭ وكىلى فاررۋح ماحمۋدوۆتان 7:3 ەسەبىمەن باسىم ءتۇستى.

-28 شىلدەدە قازاقستان قۇراماسىندا تاعى ءبىر التىن مەدالدى گرەك-ريم كۇرەسىنەن 55 كەلىگە دەيىنگى سالماقتا كۇش سىناسقان ديار ءامانالى جەڭىپ الدى.

ول چەمپيوناتتىڭ العاشقى بەلدەسۋىندە گرەكيانىڭ وكىلى نيكولاوس ءزينيسيستى 8:0، سودان كەيىن رەسەيلىك ەدەم پايزيەۆتى 3:1 ەسەبىمەن جەڭدى. شيرەك فينالدا گرۋزيالىق گەورگي كەدەليدزدەن 2:1، جارتىلاي فينالدا بولگاريانىڭ وكىلى دانيمير يوردانوۆتان 8:1 ەسەبىمەن باسىم ءتۇسىپ، فينالعا جولداما الدى، — دەلىنگەن مينيسترلىكتىڭ حابارلاماسىندا.

فينالدا ديار ءامانالى ماجارستاننىڭ وكىلى كەۆە كوۆاچپەن بەلدەستى. نەگىزگى ۋاقىت 1:1 ەسەبىمەن اياقتالدى. بۇل بەلدەسۋدە قازاق بالۋانى ءبىرىنشى بولىپ ناتيجەلى ءادىس ىستەدى. ءسويتىپ، ول UWW ەرەجەسىنە سايكەس، جەڭىسكە جەتتى.
وسىلاي ديار ءامانالى مەن باقداۋلەت اعابەك قازاقستان قۇراماسىنا 17 جاسقا دەيىنگى سپورتشىلار اراسىنداعى الەم چەمپيوناتىنىڭ ەكى التىن مەدالىن جەڭىپ الىپ، قۇرمەت تۇعىرىنىڭ ەڭ بيىك ساتىسىنا كوتەرىلدى.