فينليانديانى جەڭە الامىز – ماگومەد اديەۆ

بۇگىن فۋتبولدان 2024 جىلى ەۋروپا چەمپيوناتىنىڭ ىرىكتەۋ ءتۋرنيرى اياسىندا وتەتىن قازاقستان مەن فينليانديا كوماندالارىنىڭ ماتچىنىڭ قارساڭىندا ۇلتتىق قۇرامانىڭ باس جاتتىقتىرۋشىسى ماگومەد اديەۆ ويىن تۋرالى ءوز ويىن ايتتى.

ول باق وكىلدەرىنە بەرگەن شاعىن سۇحباتىندا فينليانديا قۇراماسىنىڭ باس جاتتىقتىرۋشىسىنىڭ جاقسى كوماندا جاساقتاپ العانىن، ويىنشىلارىنىڭ ءبارى سىننان سۇرىنبەي وتكەن تاجىريبەلى فۋتبولشىلار ەكەنىن اتاپ ءوتتى.

فينليانديا وڭاي قارسىلاس ەمەس. ولاردا شابۋىلدا ءۇش جاقسى وينايتىن ءۇش ويىنشى بار. فيندەردىڭ كوبىسى پۋككي ارقىلى وينايدى. وڭ قاپتالدان ويىنعا بەلسەندى كىرىسەدى. فينليانديا قورعانىستان شىعا الاتىن، شابۋىلدا جىلدام فۋتبول ويناعاندى ۇناتاتىن كوماندا. بىراق ولار پوزيتسيالىق شابۋىلدارعا نەمقۇرايلى قارايدى دەپ ايتا المايمىن. مەن قارسىلاستان كوپ تاكتيكالىق ويىن كۇتەمىن. مەنىڭ فين ارىپتەسىم جاقسى كوماندا جاساقتاپ العان ەكەن.

قارسىلاستى ۇتۋعا بولادى. ول جىگىتتەردىڭ قولىنان كەلەدى، — دەدى ول.

كەزدەسۋدە باس جاتتىقتىرۋشى ميحايل گابىشەۆ پەن باۋىرجان يسلامحاننىڭ جاراقات العانىن، ولار فينليانديامەن ماتچقا الاڭعا شىعا المايتىنىن ەسكەتتى.

ەكەۋىنىڭ جاراقات العانى ارينە، قيىن. ولارعا وتا جاسالدى. جىگىتتەرمەن سويلەستىك، قولداۋ كورسەتتىك، ولاردى الاڭدا دا، ۇلتتىق قۇرامادا دا كۇتەمىز. وڭ قاپتال جايلى ايتاتىن بولساق، گابىشەۆ جاراقات العانعا دەيىن دە مەن بۇل پوزيتسياعا باسقا ويىنشىنى قويۋدى جوسپارلاعانمىن. گابىشەۆ جاراقات الماسا دا الاڭعا العاشقى مينۋتتاردان شىقپايتىن ەدى. بىزگە بۇل ورىنعا باسقا ويىنشى كەرەك. ونىڭ كىم ەكەنىن ويىندا كورەسىزدەر.

تاپالوۆقا كەلسەك، ول سولتۇستىك يرلاندياعا قارسى الاڭعا شىعادى، — دەدى باس جاتتىقتىرۋشى.

سونىمەن بىرگ ەۇلتتىق قۇرامانىڭ باس جاتتىقتىرۋشىسى جاڭا فۋتبولشىلاردىڭ شاقىرىلعانىن، وسى جىگىتتەر ۇجىمعا تەز ءسىڭىسىپ، كوماندالاستارىنا ۇلكەن قولداۋ بولاتىنىنا سەنىم ءبىلدىرىپ، فينليانديانى جەڭە الاتىنىن ايتتى.

بۇگىن– 7 قىركۇيەكتە استانادا كەشكى ساعات 20:00-دە 2024 جىلعى ەۋروپا چەمپيوناتىنىڭ ىرىكتەۋ ءتۋرنيرى اياسىندا قازاقستان مەن فينليانديا ۇلتتىق قۇرامالارىنىڭ ماتچى باستالادى.

قازىر تۋرنير كەستەسىندە قازاقستان قۇراماسى ءتورت ويىننان كەيىن 9 ۇپايمەن فينليانديا كومانداسىنان كەيىن ەكىنشى ورىندا تۇر. سكانديناۆيا تۇبەگىنىڭ قۇراماسىندا دا 9 ۇپاي بار. بىراق دوپ ايىرماشىلىعى بويىنشا سۋومي ەلىنىڭ كورسەتكىشى جاقسى. ولار قارسىلاستار قاقپاسىنا 10 دوپ سالىپ، 3 گول جىبەرىپ العان. ال ۇلتتىق قۇراما 8 گول سالىپ، 4 دوپتى ءوز قاقپاسىنا كىرگىزگەن.

تۋرنير كەستەسىندە ءۇشىنشى جانە ءتورتىنشى ورىنداردى دانيا مەن سلوۆەنيا قۇرامالارى بولەسىپ وتىر. ولاردا دا ۇپاي سانى بىردەي. ەكەۋىندە ءتورت ماتچتان كەيىن 7 ۇپايدان بار. ال بەسىنشى جانە سوڭعى ورىندا سولتۇستىك يرلانديا مەن سان-مارينو كوماندالارى كەلەدى. بريتانيا ەلىنىڭ قۇراماسىندا 3 ۇپاي بولسا، سان-مارينو ءالى بىردە ءبىر ۇپاي العان جوق.

10 قىركۇيەكتە ەلىمىزدىڭ باس كومانداسى ءوز الاڭىندا وسى سولتۇستىك يرلانديا جاساعىمەن وينايدى.

داستان كەنجالين،

استانا