«كوپشىلىك بىلە بەرمەيتىن ءبىر دەرەك بار»: سپورت مامانى ريزابەك ايتمۇحان تۋرالى

كەشە تۇندە قازاق ەلىنە سەربيانىڭ استاناسى – بەلگراد قالاسىندا كۇرەس تۇرلەرىنەن ءوتىپ جاتقان الەم چەمپيوناتىنان قۋانىشتى حابار كەلىپ جەتتى.

بۇل دودادا ەركىن كۇرەستەن ۇلتتىق قۇراما كوماندانىڭ بالۋانى ريزابەك ايتمۇحان توپ جارىپ، كۇرەستىڭ وسى تۇرىنەن العاشقى التىن مەدالدى جەڭىپ الدى.

ەركىن كۇرەستەن 92 كگ دەيىنگى سالماقتىڭ فينالىندا ريزابەك ايتمۇحان ازەربايجان سپورتشىسى وسمان نۋرماگومەدوۆپەن كۇش سىناسىپ، 0:2 ەسەبىمەن جەڭىلىپ جاتىپ، سوڭعى سەكۋندتاردا جەڭىسكە جەتتى. ەسەپ — 5:2.

وسىلايشا، ول ەلىمىز ەگەمەندىك العاننان بەرى الەم چەمپيوناتىندا ەركىن كۇرەستەن التىن مەدال العان تۇڭعىش ءارى ەڭ جاس بالۋان اتاندى. وسى ۋاقىتقا دەيىن ۇلتتىق قۇراما 17 جۇلدەنى يەلەنگەن ەدى. ونىڭ بەسەۋى كۇمىس، 12-ءسى قولا مەدال.

قۇتتىقتاپ جاتقان قازاق ەلىنە راقمەت! الەم چەمپيونى اتانۋ ءۇشىن 9 جىل ەڭبەك ەتتىم. ەڭبەگىم اقتالدى. بۇل مەنىڭ 92 كەلى سالماقتاعى سوڭعى جارىسىمنىڭ ءبىرى. كەلەسى باسەكەدەن باستاپ وليمپيادا باعدارلاماسىنا كىرەتىن 97 كگ دەيىنگى سالماققا اۋىسامىن. ەندىگى ماقساتىم – وليمپيالىق ويىنداردا مەدال الۋ ،- دەدى 19 جاستاعى بالۋان فينالدان كەيىن سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

كەشە ريزابەك ايتمۇحان جارىستى ەكىنشى اينالىمنان باستاپ، ماجارستاندىق بالاش يۋحاش پەن تۇركيالىق فەيزۋللا اقتۇرىكتى تازا ۇتتى. سوسىن، وسى سالماقتاعى قازىرگى الەمدىك رەيتينگتىڭ كوشباسشىسى گرۋزيالىق ميرياني مايسۋرازدەدەن ايلاسىن اسىردى.

ريزابەك ايتمۇحان بيىل ءوزى قاتىسقان بارلىق جارىستا جەڭىس تۇعىرىنا كوتەرىلدى. اتاپ ايتار بولساق، جىلدىڭ باسىندا الماتىدا وتكەن كۇرەستەن قازاقستاننىڭ VI جازعى سپارتاكياداسىندا ەشكىمگە دەس بەرمەدى. سودان كەيىن كوكتەمدە استانادا وتكەن ەرەسەكتەر اراسىنداعى ازيا چەمپيوناتىندا، سونداي-اق، اممان قالاسىندا وتكەن جاستار اراسىنداعى الەم چەمپيوناتىندا كۇمىس مەدال جەڭىپ الدى.

بۇگىن كۇللى ەلىمىز ءۇشىن قۋانىشتى كۇن. ريزابەك قازاقستانعا وسىعان دەيىن ەركىن كۇرەستەن بۇيىرماي كەلە جاتقان الەم چەمپيوناتىنىڭ التىن مەدالىن جەڭىپ الدى. ريزابەك وسى ارقىلى ءبىزدىڭ بارلىق جانكۇيەردى ريزا قىلدى. سەنىڭ الار اسۋلارىڭ ءالى الدا دەگەن سەنىمدەمىن، — دەدى قازاقستان گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى داۋلەت تۇرلىحانوۆ.

ەندى ريزابەك ايتمۇحان تۋرالى بىرەر دەرەك كەلتىرسەك، بۇل جىگىت سولتۇستىك قازاقستان وبلىسى، ءۋاليحانوۆ اۋدانىنىڭ تۋماسى. كىشكەنەكول دەگەن اۋىلدا تۋعان. بۇل اۋىلدىڭ بۇرىنعى اتى — قىزىل تۋ. قازىر ول الماتى قالاسىنىڭ نامىسىن قورعاپ ءجۇر.

ەركىن كۇرەستەن قازاق ەلىنەن شىققان سوڭعى الەم چەمپيونى قاجىمۇقان مۇڭايتپاسوۆ دەسەك، قاتەلەسپەيتىن شىعارمىز. XX عاسىردىڭ باسىندا حالىقارالىق دودالاردا اڭىز بابامىز ۇنەمى توپ جارىپ ءجۇردى.

ەندى، 120 جىلدان كەيىن، اتاقتى بالۋاننىڭ ەرلىگىن، تاۋەلسىز قازاقستاننىڭ جاس باتىرى جالعاستىرىپ، ءىزىن باسىپ كەلەدى، — دەيدى استاناداعى قاجىمۇقان مۇنايتپاسوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى ديرەكتورىنىڭ كەڭەسشىسى ارداق توعىموۆ.

ونىڭ ايتۋىنشا، ريزابەك ايتمۇحان 2018 جىلدىڭ 24 تامىزىندا قاجىمۇقان مەكتەبىنە وقۋعا تۇسكەن. ول وسىندا ءبىر جىل وقىپ، كەيىن الماتىعا كوشىپ، وقۋىن جالعاستىرعان.

تالانتتى بالۋاندى ءوز قاناتىنىڭ استىنا مەكەمەنىڭ جاس تا بولسا، بىلىكتى مامانى، جاتتىقتىرۋشىسى   سامات جاقىپوۆ قاراماعىنا الدى. ساكەڭ بالانى ءوزى ىزدەپ، تاۋىپ قول استىنا العاننان كەيىن ريزابەك 2018 جىلى ەمتيحان تاپسىرىپ، 9 سىنىپتا وقۋعا ءتۇستى. سوسىن  2019 جىلى 10 سىنىپتا وقىپ ءجۇرىپ الماتىعا كەتتى.

ريزابەك ءبىر جارىم جىل وسى وقۋ-سپورتتىق ورداسىندا ءتالىم-تاربيە الىپ، شىنىعىپ، جاتتىقتى، — دەدى سپورت مامانى.

ونىڭ ايتۋىنشا، جاس بالۋان 2018-2019، 2019-2020 وقۋ جىلدارى استانادا كوپتەگەن جەتىستىكتەرگە جەتتى. تاعى ءبىر كوپشىلىك بىلە بەرمەيتىن ءبىر دەرەك، 2019 جىلى استانادا وتكەن الەم چەمپيوناتىندا 15 جاسار بالا ەرىكتى بولىپ جۇمىس ىستەپ، ۇلتتىق قۇراما سپورتشىلارىنا كومەگىن تيگىزدى.

ق. مۇڭايتپاسوۆ سپورت مەكتەبىندە وقىپ جۇرگەندە ريزابەك كىشى جاسوسپىرىمدەر اراسىندا ازيا چەمپيوناتىنىڭ جانە بۇكىلالەمدىك دۇنيەجۇزىلىك ويىندارىنىڭ قولا جۇلدەگەرى اتانادى.

وسىنداي تالانتتى، دارىندى، جىگەرلى بالامىزدى شىن جۇرەكتەن قۇتتىقتايمىز! قۋان قازاق! بورىكتەرىڭىزدى اسپانعا اتا بەرىڭىزدەر!، — دەدى ول.

ەركىن كۇرەس شەبەرىنىڭ ەلىمىزگە العاش رەت التىن مەدال الىپ بەرگەنىنە بايلانىستى مەملەكەت باسشىسى قاسىم-جومارت توقاەۆ تا ءوزىنىڭ قۇتتىقتاۋ حاتىن جولدادى.

ەركىن كۇرەس شەبەرى ريزابەك ايتمۇقاندى بەلگرادتا وتكەن كۇرەس تۇرلەرىنەن الەم چەمپيوناتىندا التىن مەدال يەلەنۋىمەن قۇتتىقتايمىن! ول قازاق بالۋاندارى اراسىندا تۇڭعىش رەت الەم چەمپيونى اتاندى. بۇل – تاريحي جەتىستىك. ريزابەك ايتمۇقاننىڭ جارقىن جەڭىسى جاس بۋىننىڭ سپورتقا قۇلشىنىسىن ارتتىرادى دەپ سەنەمىن، – دەدى پرەزيدەنت.

قازىر ماديار قۇرامىسوۆ جاتتىقتىراتىن ەركىن كۇرەستەن قازاقستان قۇراماسىنىڭ قورجىنىندا بەلگرادتاعى باسەكەنىڭ ەكى جۇلدەسى بار.

17 قىركۇيەكتە ازامات داۋلەتبەكوۆ (86 كگ) قولا مەدالمەن بىرگە پاريج وليمپياداسىنىڭ جولداماسىن العان بولاتىن. كەشە قولا مەدال جولىندا ازامات قارتباي (57 كگ) مەن بولات ساقاەۆ (79 كگ) قارسىلاستارىنان جەڭىلدى. 92 كگ دەيىنگى سالماق وليمپيادا باعدارلاماسىنا كىرمەيدى.

 

داستان كەنجالين،

استانا