SportPress.kz قازاقستان سپورت جاڭالىقتارى
بۇگىن الماتىعا تاياۋ ورنالاسقان كەشەندى وليمپيادالىق دايارلاۋ ورتالىعىندا قازاقستان ۇلتتىق قۇراما كومانداسىن قىتايدىڭ حانچجوۋ قالاسىندا وتەتىن XIX جازعى ازيا ويىندارىنا سالتاناتتى شىعارىپ سالۋ ءراسىمى ءوتتى.
قازاقستاننان ازيادا تاريحىندا ەڭ كوپ سپورتشى — 525 اتلەت باراتىن بۇل جولعى سالتاناتتى شىعارىپ سالۋعا تاياۋدا عانا تاعايىندالعان تۋريزم جانە سپورت ءمينيسترى ەرمەك بورانباي ۇلى مارجىقباەۆ ارناۋلى كەلىپ،سپورتشىلارىمىزعا اق جول مەن جەڭىس تىلەدى. بۇل شاراعا قازاق سپورتىنىڭ اڭىزى، داڭقتى جەلاياق ءامين اعا تۇياقوۆ، وليمپيادا چەمپيوندارى — ەرماحان يبرايموۆ، ولگا شيشيگينا، سەرىك ساپيەۆ، ولگا رىپاكوۆا، الەكساندر ۆينوكۋروۆ، كۇمىس جۇلدەگەر يسلام بايرامۋكوۆ جانە باسقالار قاتىستى.
داڭقتى سپورتشىلار ءوز ءىزباسارلارىنا جەڭىستى جول تىلەپ، ءوز تاجريبەلەرىمەن ءبولىستى. سالتاناتتى جيىندا كوپتى كورگەن سپورت ءجۋرناليسى رەتىندە ماعان دا ءسوز بەرىلدى. مەن قازاقستان تاۋەلسىزدىك العاننان كەيىن 1994 جىلى جاپونيانىڭ حيروسيما قالاسىندا وتكەن تۇڭعىش ازيا ويىندارىنىڭ كۋاگەرىمىن. ودان بەرى وننان اساتىن ازيا ويىندارى، شىعىس ازيا ويىندارىنا كۋا بولدىم. وعان قوسا، 11 وليمپيادالىق ويىندارعا بارىپ،رەپورتاجدار جازدىم. ولاردى توپتاستىرىپ، بەس تومدىق «وليمپيسكي مارشرۋت» دەگەن كىتاپ جازىپ، جاريالادىم. مەن ازياداعا اتتاناتىن سپورتشىلارعا ارنالعان ءسوزىمدى قالامداس باۋىر الماس احمەتبەكوۆتىڭ «كوك تۋدىڭ جەلبىرەگەنى» دەگەن عالامات ولەڭىنىڭ ەكى جولىمەن ءبىتىردىم: «…تالاسقا تۇسسە جان مەن تۋ، جان ەمەس ماعان كەرەگى، كوك تۋدىڭ جەلبىرەگەنى!!!» دەيدى وتانىن سۇيگەن اقىن جۇرەك. سەندەر دە جان بەرسەڭدەر دە قاسيەتتى كوك تۋىمىزدى باسقالاردىڭ بارىنەن بيىكتە جەلبىرەتىپ ورالىڭدار، اينالايىندار!»، دەدىم.
بۇگىندە قارت قۇرلىق ازيادا سپورتتىڭ دامۋى قارىشتاپ وسكەن. ونىڭ ۇستىنە، قارسىلاستارىڭ ازيادانى بىلاي قويىپ،وليمپيادالاردا توپ جارىپ جۇرگەن قىتاي، جاپونيا، وڭتۇستىك كورەيا، سپورتى ەرەكشە دامىپ وتىرعان اۆستراليا، يران، ءۇندىستان سەكىلدى مەملەكەتتەر بولسا، بوساڭسۋعا حاقىمىز جوق.
بۇل كەشەندى جارىسقا 500-دەن اسا سپورتشى جىبەرىپ وتىرعان قازاقستان توپ جارماسا دا وسى توپتىڭ ماڭداي الدىنداعىلاردىڭ ءبىرى بولسا دەگەن ارمان دا جوسپار دا بار. بۇل ءبىزدىڭ عانا ەمەس، ءبىرتۇتاس قازاقستان حالقىنىڭ ارمان-مۇراتى. العا، XIX ازياداعا، قازاقستان سپورتشىلارى! جەڭىل بارىپ، اۋىر قايتىڭدار! سەندەر جەڭىپ العان مەدالداردان، قۇداي قولداپ، قايتاردا ۇشىپ كەلەتىن ۇشاقتارىڭنىڭ بەلى قايىساتىن بولسىن!!!
نەسىپ جۇنىسباي ۇلى،
سپورت ءجۋرناليسى، جازۋشى، سپورت قايراتكەرى
فوتو: تۋريزم جانە سپورت مينيسترلىگى
الماتى
View this post on Instagram
