Alǵa, XIX Azıadaǵa!

Búgin Almatyǵa taıaý ornalasqan Keshendi Olımpıadalyq daıarlaý ortalyǵynda Qazaqstan ulttyq qurama komandasyn Qytaıdyń HANChJOÝ qalasynda ótetin XIX jazǵy Azııa oıyndaryna saltanatty shyǵaryp salý rásimi ótti. 

Qazaqstannan Azıada tarıhynda eń kóp sportshy — 525 atlet baratyn bul jolǵy saltanatty shyǵaryp salýǵa taıaýda ǵana taǵaıyndalǵan týrızm jáne sport mınıstri Ermek Boranbaıuly Marjyqbaev arnaýly kelip,sportshylarymyzǵa aq jol men jeńis tiledi.  Bul sharaǵa Qazaq sportynyń ańyzy, dańqty jelaıaq Ámın aǵa Tuıaqov, Olımpıada chempıondary — Ermahan Ibraımov, Olga Shıshıgına, Serik Sápıev, Olga Rypakova, Aleksandr Vınokýrov, kúmis júldeger Islam Baıramýkov jáne basqalar qatysty.

Dańqty sportshylar óz izbasarlaryna jeńisti jol tilep, óz tájrıbelerimen bólisti.  Saltanatty jıynda kópti kórgen sport jýrnalısi retinde maǵan da sóz berildi.  Men Qazaqstan táýelsizdik alǵannan keıin 1994 jyly Japonııanyń Hırosıma qalasynda ótken tuńǵysh Azııa oıyndarynyń kýágerimin.  Odan beri onnan asatyn Azııa oıyndary, Shyǵys Azııa oıyndaryna kýá boldym. Oǵan qosa, 11 Olımpıadalyq oıyndarǵa baryp,reportajdar jazdym. Olardy toptastyryp, bes tomdyq «Olımpııskıı marshrýt» degen kitap jazyp, jarııaladym.  Men Azıadaǵa attanatyn sportshylarǵa arnalǵan sózimdi qalamdas baýyr Almas Ahmetbekovtiń «Kók týdyń jelbiregeni» degen ǵalamat óleńiniń eki jolymen bitirdim: «…TALASQA TÚSSE JAN men TÝ, JAN EMES MAǴAN KEREGI, KО́K TÝDYŃ JELBIREGENI!!!» deıdi Otanyn súıgen aqyn júrek. Sender de jan berseńder de qasıetti KО́K TÝYMYZDY basqalardyń bárinen bıikte jelbiretip oralyńdar, aınalaıyndar!», dedim.

Búginde qart qurlyq Azııada sporttyń damýy qaryshtap ósken.  Onyń ústine,  qarsylastaryń Azıadany bylaı qoıyp,Olımpıadalarda top jaryp júrgen Qytaı, Japonııa, Ońtústik Koreıa, sporty erekshe damyp otyrǵan Avstralııa, Iran, Úndistan sekildi memleketter bolsa, bosańsýǵa haqymyz joq.

Bul keshendi jarysqa 500-den asa sportshy jiberip otyrǵan Qazaqstan top jarmasa da osy toptyń mańdaı aldyndaǵylardyń biri bolsa degen arman da jospar da bar.  Bul bizdiń ǵana emes, birtutas Qazaqstan halqynyń arman-muraty.  Alǵa, XIX Azıadaǵa, Qazaqstan sportshylary!  Jeńil baryp, aýyr qaıtyńdar!  Sender jeńip alǵan medaldardan, Qudaı qoldap, qaıtarda ushyp keletin ushaqtaryńnyń beli qaıysatyn bolsyn!!!

Nesip JÚNISBAIULY,

sport jýrnalısi, jazýshy, sport qaıratkeri

FOTO: Týrızm jáne sport mınıstrligi

ALMATY

 

View this post on Instagram

 

A post shared by House of olympic sports of Kazakhstan (@qaz_olympics)