XIX ازيادا: قازاقستان بوكسشىلارى تاعى بەس كۇن دايىندالادى (ۆيدەو)

بۇگىن بوكستان قازاقستاننىڭ ۇلتتىق قۇراما كومانداسى الماتى حالىقارالىق اۋەجايىنان قىتايدىڭ حانچجوۋ قالاسىنا XIX جازعى ازيا ويىندارىنا قاتىسۋ ءۇشىن ءبىرىنشى چارتەرلىك رەيسپەن ۇشىپ بارادى.

تۇسكە دەيىن بوكس فەدەراتسياسىنىڭ پرەزيدەنتى، مەتسەنات كەڭەس راقىشەۆ اەروپورتقا قۇراما كوماندانى شىعارىپ سالۋعا بارىپ، بوكسشىلار مەن جاتتىقتىرۋشىلارعا ساتتىلىك تىلەدى.

قازاقستان دەلەگاتسياسىنىڭ باستى ءۇمىتى — بوكسشىلار — حانچجوۋداعى جازعى ازيا ويىندارىنا اتتاندى. باس جاتتىقتىرۋشى مىرزاعالي ايتجانوۆتىڭ شاكىرتتەرى ءبىرىنشى چارتەرلىك رەيسپەن ۇشىپ بارادى. وسىلايشا بوكسشىلاردىڭ جەرگىلىكتى اۋا-رايىنا بەيىمدەلۋ ءۇشىن بەس كۇندەي ۋاقىتى بولادى، — دەدى ول سپورتشىلاردى شىعارىپ سالعان سوڭ.

كەڭەس راقىشەۆ وسىدان ەكى اپتا بۇرىن ايەلدەر قۇراماسىن الىس جولعا شىعارىپ سالعان بولاتىن. ەندى مىنە، ەرلەر كومانداسىنا اق جول تىلەۋ ءۇشىن الماتىنىڭ حالىقارالىق اۋەجايىنا بارىپ، ۇلتتىق قۇرامانىڭ مۇشەلەرىنىڭ قولدارىن قىسىپ، ساتتىلىك تىلەپ قايتتى.

فەدەراتسيا باسشىسى بىلعارى قولعاپ شەبەرلەرىنە جىلى لەبىزدەرىن ءبىلدىرىپ، الداعى ماقسات-جوسپارلاردى دا ايتىپ بەردى. ويتكەنى، ەلىمىزدىڭ كوك بايراعىن بيىككە كوتەرۋ — زور مارتەبە ءارى ۇلكەن جاۋاپكەرشىلىك! سوندىقتان جۇلدەلەر مەن ليتسەنزيالاردى جەڭىپ الۋ باستى مىندەت.

اۋەجايعا بوكسشىلاردى شىعارىپ سالۋعا سيدنەي وليمپياداسىنىڭ چەمپيونى ەرماحان يبرايموۆ تا كەلدىۇ ول سپورتشىلارعا باتاسىن بەرىپ، اق تىلەكتەرىن جەتكىزدى.

بيىلعى ازيادان كەيىن قبف پرەزيدەنتىنىڭ جەكە قاراجاتىنان سىياقىلار بەرىلەدى. التىن مەدال ءۇشىن چەمپيوندار 50 مىڭ اقش دوللارىن، كۇمىس جۇلدەگەرلەر  30 مىڭ اقش دوللارىن، قولا مەدال ءۇشىن  10 مىڭ اقش دوللارىن الادى.

قىتاي شارشى الاڭىندا ەل نامىسىن قورعايتىن بوكسشىلار:

51 كگ. ساكەن بيبوسىنوۆ

57 كگ. ماحمۇد سابىرحان

63.5 كگ. ەرتۋعان زەينۋلينوۆ

71 كگ. اسلانبەك شىمبەرگەنوۆ

80 كگ. نۇربەك ورالباي

92 كگ. ساعىندىق توعامباي

+ 92 كگ. قامشىبەك قونقاباەۆ

XIX جازعى ازيا ويىندارى 23 قىركۇيەك پەن 8 قازان ارالىعىندا قىتايدىڭ حانچجوۋ قالاسىندا وتەدى. قازاقستان قۇراماسىنان 500-دەن استام سپورتشى سپورتتىڭ 30 تۇرىنەن سىنعا تۇسەدى. تاريحتا العاش رەت ازيا ويىنداردا وليمپيادا ليتسەنزيالارى ساراپقا سالىنادى.

بوكسشىلاردىڭ باسەكەسى 25 قىركۇيەكتە باستالادى.

 

داستان كەنجالين،

استانا

 

 

View this post on Instagram

 

A post shared by Kazakhstan Boxing Federation (@boxingkazakhstan)