فۋتبولدان بەلگيا مەن شۆەتسيا ماتچى كەزىندە اتىس بولىپ، ەكى ادام قازا تاپتى (ۆيدەو)

بۇگىن بريۋسسەل قالاسىندا اۆتوماتپەن قارۋلانعان بەلگىسىز ادام حالىققا وق اتقان. ول سكۋتەرگە ءمىنىپ، كوشەدە الدىنا كەزدەسكەن ادامدارعا وق جاۋدىرىپ، ەكى ەر ادامدى اتىپ تاستاپ، ءبىر ايەلدى جارالاعان.

اتىس فۋتبولدان بەلگيا مەن شۆەتسيا ەلدەرىنىڭ ۇلتتىق قۇراما كوماندالارىنىڭ ماتچى كەزىندە بولعان. قازا تاپقان ادامنىڭ ەكەۋى دە شۆەتسيا قۇراماسىنىڭ جانكۇيەرلەرى بولىپ شىقتى.

كوشەدەگى اتىسقا بايلانىستى ماتچتىڭ ءبىرىنشى تايمى عانا بولىپ، ويىنشىلار ەكىنشى تايمعا شىققان جوق. تەرروريست ءتۇنى بويى سكۋتەرىمەن كوشە ارالاپ جۇرگەن. ول تەك تاڭ اتا ءدامحانالاردىڭ بىرىندە ۇستالعان. سول جەردە پوليتسەيلەر ونىڭ كوزىن جويعان.

بەلگيا باق-نىڭ حابارلاۋىنشا، تەرروريستتىڭ جاسى 45-تە بولعان. ول قىزعىلت سارى بەشپەت كيىپ، اتىس الدىندا ءوزىن يگيل ۇيىمىنىڭ مۇشەسى ەكەنىن جانە مۇسىلماندار ءۇشىن كەك الاتىنىن ايتىپ، شۆەتسيا كومانداسىنىڭ جەيدەسىن كيگەن ەكى ەر ادامدى اتىپ تاستاعان. ءبىر ايەلدى اۋىر جارالاعان. سودان كەيىن ول وقيعا ورنىنان كەتىپ، كالاشنيكوۆ اۆتوماتىن ۇستاپ، قالا كوشەلەرىن ارالاعان. ال پوليتسيا كۇدىكتىنىڭ ىزىنە ءتۇسىپ، ونىڭ ءۇيىن تىنتكەن. بىراق ونىڭ سحاربەك كوممۋناسىنداعى ۇيىنەن قارۋ-جاراق تابىلماعان (سحاربەك – بريۋسسەل قالاسىنىڭ 19 كوممۋناسىنىڭ ءبىرى، – رەد).

تەرروريست سحاربەكتە تۇرعان.  اتى -ابدەسالەم. ول بەلگياعا زاڭسىز كەلگەن. شاماسى، تۋنيستەن كەلگەن بولۋ كەرەك، –  دەلىنگەن بەلگيا باق-دا.

لاڭكەس بۇرىن دا سوتتالعان كورىنەدى. ول تەرروريزم بابى بويىنشا باس بوستاندىعىنان ايىرىلىپ، بىرنەشە جىل تۇرمەدە وتىرىپ شىققان ەكەن.

داستان كەنجالين،

استانا