قازاقستان سپورتشىلارىنىڭ وتكەن اپتاداعى جۇلدەلەرى

تۋريزم جانە سپورت مينيسترلىگى حابارلاعانداي، وتكەن اپتادا قازاقستان سپورتشىلارى بىرنەشە جارىسقا قاتىسىپ، جۇلدەنى جەڭىپ الدى.

وڭتۇستىك كورەيانىڭ چانگۆون قالاسىندا نىسانا كوزدەۋ جانە ستەند اتۋدان وتكەن ليتسەنزيالىق ازيا چەمپيوناتىندا قازاقستان ۇلتتىق قۇراماسىنىڭ سپورتشىلارى 33 مەدال، ونىڭ ىشىندە 8 التىن، 11 كۇمىس جانە 14 قولا جۇلدە (نىسانا كوزدەۋ – 7-7-9; ستەند اتۋ – 1-5-4) يەلەندى. بۇل جارىسقا ازيانىڭ 32 ەلىنەن 800-دەن اسا مەرگەن قاتىستى.

استانادا بوكستان جاستار مەن جاسوسپىرىمدەر اراسىندا وتكەن ازيا چەمپيوناتىندا وتانداستارىمىز 15 التىن، 11 كۇمىس جانە 15 قولا مەدال جەڭىپ الدى. وعان 400-دەن اسا جاس دارىندى بوكسشى قاتىسىپ، كۇش سىناستى.

ءۇندىستاننىڭ كەرالا قالاسىندا وتكەن ماۋنتينبايكتان ازيا چەمپيوناتىنا ەل سپورتشىلارى ەكى جۇلدەگە يە بولدى. كروسس-كانتريدەن (وليمپيك) 23 جاسقا دەيىنگى ۆەلوشاباندوزدار اراسىندا ەگور كاراسەۆ چەمپيون اتاندى. ونىڭ ۋاقىت كورسەتكىشى – 1:21:27.650 سەكۋند (3،5 شاقىرىمنان 6 اينالىم). سونداي-اق، كروسس-كانتري ەستافەتاسىندا الماس ساعىندىقوۆ، دەنيس سەرگيەنكو، ەگور كاراسەۆ، الەكسەي فەفەلوۆ، الينا ساركۋلوۆا قولا جۇلدەگە يە بولدى.

ساۋد ارابياسىنىڭ باس شاھارى – ار-ريادتا الاۋى تۇتانعان V بۇكىلالەمدىك جاۋىنگەرلىك ونەر ويىندارىندا قازاقستان دەلەگاتسياسى 12 التىن، 13 كۇمىس پەن 23 قولا مەدال جەڭىپ الىپ، جالپى ەسەپتە ءۇشىنشى ورىننان كورىندى. ەكى اپتاعا جۋىق جالعاسقان دوداعا 16 سپورت تۇرىنەن 1500-دەن استام اتلەت قاتىسىپ، 954 مەدالدى ءوزارا ساراپقا سالدى.

تەننيسشى جىبەك قۇلامباەۆا ءتۋنيستىڭ موناستير قالاسىندا وتكەن ITF W25 ءتۋرنيرىنىڭ جۇپتىق باسەكەسىندە ۇزدىك شىقتى. ول افريكا قۇرلىعىنداعى جارىستا قىتايلىق گاو سينيۋيمەن جۇپ قۇراپ، فينالدا الەنا فالەي (بەلارۋس) – پولينا ياتسەنكو (رەسەي) جۇبىنان ءۇش سەتتە – 6:0، 2:6، 10:7 ەسەبىمەن باسىم ءتۇستى.

سونداي-اق ەرلەر اراسىنداعى الەمدىك رەيتينگتە 247-ساتىدا تۇرعان بەيبىت جۇقاەۆ اقش-تىڭ شارلوتسۆيلل قالاسىندا اياقتالعان «چەللەندجەر» ءتۋرنيرىنىڭ جەڭىمپازى اتاندى. ول فينالدا دۇنيەجۇزىلىك رەيتينگتە 376-ورىندا تۇرعان امەريكالىق ەيدان مەيونى ەكى سەتتە 6:3، 6:4 ەسەبىمەن جەڭدى. وسى جەڭىسىنىڭ ارقاسىندا وتانداسىمىز توپ 200 تەننيسشىنىڭ قاتارىنا قوسىلىپ (195-ورىن)، قازاقستاننىڭ ەكىنشى راكەتكاسى اتاندى.

كيريلل گەراسيمەنكو ۇستەل تەننيسىنەن سلوۆەنيانىڭ وتوچەتس قالاسىندا وتكەن «WTT Feeder Otocec 2023» حالىقارالىق ءتۋرنيرىنىڭ جەڭىمپازى اتاندى.

5 قاراشادا پاكىستاننىڭ استاناسى — يسلامابادتا تاەكۆوندودان G2 ساناتىندا وتكەن Asian Open Championship حالىقارالىق تۋرنيرىندە سپورتشىلارىمىز 13 مەدال الدى.

التىن مەدالدى  نۇراي قۇسايىنوۆا (67 كگ)، نارگيز قويشىبەكوۆا (46 كگ)، ماريا سەۆوستيانوۆا (57 كگ)، جاۆوحيرحان يسلاموۆ (58 كگ)، جانسەل دەنيز (+73 كگ) جەڭىپ السا، كۇمىس جۇلدەنى ايدانا ەدىلباەۆا (46 كگ)، قولا مەدالدى بەكسۇلتان مۇساحان (68 كگ)، ەلدار ءبىرىمباي (68 كگ)، نۇربول ەرسايىنوۆ (87 كگ)، ارايلىم اسقاروۆا (57 كگ)، ديانا ابسەنوۆا (73 كگ)، جادىرا حايرۋللينا (67 كگ) مەن ساميرحون اباباكيروۆ (58 كگ) يەلەندى.

جالپى ەسەپتە قازاقستان əيەلدەر قۇراماسى ءبىرىنشى، ەرلەر كومانداسى ءۇشىنشى ورىن الدى. تۋرنيرگە 21 مەملەكەتتەن 350 تاەكۆوندوشى قاتىستى.

فوتو: تۋريزم جانە سپورت مينيسترلىگى سپورتتى دامىتۋ ديرەكتسياسى