قازاقستان سپورتشىلارى 31 التىن مەدال جەڭىپ الدى

قازاقستان سپورتشىلارى بىرنەشە ەلدە سپورتتىڭ 8 تۇرىنەن وتكەن الەم چەمپيوناتى، الەم كۋبوگى ءۇشىن تۋرنيرلەر مەن باسقا دا حالىقارالىق جارىستارعا قاتىسىپ، 31 التىن مەدال جەڭىپ الدى.

تۋريزم جانە سپورت مينيسترلىگىنىڭ مالىمەتىنە قاراعاندا، سپورتشىلار كاراتە، ايەلدەر كۇرەسى، گرەك-ريم كۇرەسى، كاسىپقوي بوكس، سپورتتىڭ قىسقى تۇرلەرى سانالاتىن كونكيمەن جۇگىرۋ، مانەرلەپ سىرعاناۋ، شورت-ترەك پەن فرايستايل-اكروباتيكادان وتكەن جارىستاردا كۇش سىناستى.

كاراتە: كيوكۋشينكاي-كان كاراتەدەن الماتىدا ۇيىمداستىرىلعان الەم چەمپيوناتىندا قازاقستان قۇراماسىنىڭ سپورتشىلارى 115 مەدال جەڭىپ الىپ، ەڭ ۇزدىك ناتيجە كورسەتتى. جاسوسپىرىمدەر، جاستار، ەرەسەكتەر، ارداگەرلەر اراسىنداعى «كاتا» مەن «كۋميتە» جارىسىن قوسا ەسەپتەگەندە قازاقستان قۇراماسى 29 التىن، 25 كۇمىس، 61 قولا مەدالمەن جالپى ەسەپتە توپ جاردى. ەكىنشى ورىندى رەسەي (24 التىن، 26 كۇمىس، 47 قولا) قۇراماسى يەلەنسە، جاپونيا ۇزدىك ۇشتىكتى تۇيىندەدى (10 التىن، 7 كۇمىس، 2 قولا).

كونكيمەن جۇگىرۋ: يتاليانىڭ كوللالبو قالاسىندا مارەسىنە جەتكەن جاستار اراسىنداعى الەم كۋبوگىنىڭ ەكىنشى كەزەڭىندە قازاقستان ۇلتتىق قۇراماسىنىڭ سپورتشىلارى ەكى جۇلدەنى جەڭىپ الدى. اتاپ ايتقاندا، ينەسسا شۋمەكوۆا (1:22:34 سەكۋند) 1000 مەتر قاشىقتىقتا التىننان القا تاقسا، ارينا يلياششەنكو (1:22:61 سەكۋند) كۇمىس مەدالمەن كۇپتەلدى.

مانەرلەپ سىرعاناۋ: مانەرلەپ سىرعاناۋ شەبەرى راحات برالين تۇركيانىڭ ىستامبۇل قالاسىندا وتكەن Bosphorus Cup-2023 دوداسىندا قولا جۇلدەگە يە بولدى. وتانداسىمىز قوس جاتتىعۋدىڭ ناتيجەسىندە 203.40 ۇپاي جيناپ، جارىستى ءۇشىنشى ورىنمەن اياقتادى.

باس جۇلدە ازەربايجان سپورتشىسى ۆلاديمير ليتۆينتسەۆكە (221.10 ۇپاي) بۇيىرسا، ءۇشىنشى ورىنعا تۇركيانىڭ سپورتشىسى بۋراك دەميربوگا (211.02 ۇپاي) ورنالاستى.

شورت-ترەك: نيدەرلاندتىڭ لەەۆاردەن قالاسىندا الاۋى تۇتانعان شورت-ترەكتەن جاسوسپىرىمدەر اراسىنداعى الەم كۋبوگىنىڭ ەكىنشى كەزەڭىندە قازاقستاننىڭ قىزدار قۇراماسى قولا جۇلدەنى يەلەندى.

ايەلدەر ەستافەتاسىنداعى (3000 م) باسەكەدە ەل قۇراماسى ساپىنان الينا اجىعاليەۆا، زەينەپ قۇمارحان، اناستاسيا استراحانتسەۆا، گۇلدانا جالمۇحان، پولينا ومەلچۋك باق سىنادى. ءبىرىنشى ورىندى كورەيا قۇراماسى يەلەنسە، ەكىنشى ساتىعا نيدەرلاندتىڭ ايەلدەر قۇراماسى كوتەرىلدى.

ايەلدەر كۇرەسى: بەلارۋستىڭ استاناسى — مينسكىدە ءۇش دۇركىن وليمپيادا چەمپيونى الەكساندر مەدۆەدتى ەسكە تۇسىرۋگە ارنالعان كۇرەستەن گران-پري جارىسىندا ەكى وتانداسىمىز ۇزدىكتەر قاتارىنان كورىندى. 65 كەلىدە باق سىناعان يرينا كازيۋلينا مەن 76 كەلىدە بەلدەسكەن ەلميرا سىزدىقوۆا ءتۋرنيردىڭ قولا جۇلدەگەرى اتاندى.

گرەك-ريم كۇرەسى: امانعالي بەكبولاتوۆ ءازىربايجاننىڭ باس قالاسى – باكۋدە وتكەن گرەك-ريم كۇرەسىنەن اسكەريلەر اراسىندا ۇيىمداستىرىلعان الەم چەمپيوناتىندا 55 كگ سالماق دارەجەسىندە توپ جاردى.

كاسىپقوي بوكس: بەكمان سويلىباەۆ (17-1، 8 كو) تۇركيانىڭ ترابزون قالاسىندا وتكەن كاسىپقوي بوكس كەشىندە وزبەكستاندىق ميرزامۋحامماد حيكماتۋللاەۆپەن جۇدىرىقتاسىپ، قارسىلاسىنان تەحنيكالىق نوكاۋتپەن باسىم ءتۇستى.

فريستايل-اكروباتيكا: فينليانديانىڭ رۋكا قالاسىندا وتكەن فريستايل-اكروباتيكادان الەم كۋبوگىنىڭ ءبىرىنشى كەزەڭىندە جانبوتا الدابەرگەنوۆا (77،43 ۇپاي) قولا جۇلدەگەر اتاندى.

ءبىرىنشى ورىندى كانادالىق مارياننا تينو (99،05 ۇپاي) يەلەنسە، كۇمىس جۇلدەنى اۆستراليالىق دانيەل سكوتت (88،47 ۇپاي) جەڭىپ الدى.