SportPress.kz Qazaqstan sport jańalyqtary
Qazaqstan sportshylary birneshe elde sporttyń 8 túrinen ótken álem chempıonaty, Álem kýbogy úshin týrnırler men basqa da halyqaralyq jarystarǵa qatysyp, 31 altyn medal jeńip aldy.
Týrızm jáne sport mınıstrliginiń málimetine qaraǵanda, sportshylar karate, áıelder kúresi, grek-rım kúresi, kásipqoı boks, sporttyń qysqy túrleri sanalatyn konkımen júgirý, mánerlep syrǵanaý, short-trek pen fraıstaıl-akrobatıkadan ótken jarystarda kúsh synasty.
Karate: Kıokýshınkaı-kan karateden Almatyda uıymdastyrylǵan álem chempıonatynda Qazaqstan quramasynyń sportshylary 115 medal jeńip alyp, eń úzdik nátıje kórsetti. Jasóspirimder, jastar, eresekter, ardagerler arasyndaǵy «kata» men «kýmıte» jarysyn qosa eseptegende Qazaqstan quramasy 29 altyn, 25 kúmis, 61 qola medalmen jalpy esepte top jardy. Ekinshi oryndy Reseı (24 altyn, 26 kúmis, 47 qola) quramasy ıelense, Japonııa úzdik úshtikti túıindedi (10 altyn, 7 kúmis, 2 qola).
Konkımen júgirý: Italııanyń Kollalbo qalasynda máresine jetken jastar arasyndaǵy Álem kýbogynyń ekinshi kezeńinde Qazaqstan ulttyq quramasynyń sportshylary eki júldeni jeńip aldy. Atap aıtqanda, Inessa Shýmekova (1:22:34 sekýnd) 1000 metr qashyqtyqta altynnan alqa taqsa, Arına Ilıaщenko (1:22:61 sekýnd) kúmis medalmen kúpteldi.
Mánerlep syrǵanaý: Mánerlep syrǵanaý sheberi Rahat Bralın Túrkııanyń Ystambul qalasynda ótken Bosphorus Cup-2023 dodasynda qola júldege ıe boldy. Otandasymyz qos jattyǵýdyń nátıjesinde 203.40 upaı jınap, jarysty úshinshi orynmen aıaqtady.
Bas júlde Ázerbaıjan sportshysy Vladımır Lıtvınevke (221.10 upaı) buıyrsa, úshinshi orynǵa Túrkııanyń sportshysy Býrak Demırboga (211.02 upaı) ornalasty.
Short-trek: Nıderlandtyń Leevarden qalasynda alaýy tutanǵan short-trekten jasóspirimder arasyndaǵy Álem kýbogynyń ekinshi kezeńinde Qazaqstannyń qyzdar quramasy qola júldeni ıelendi.
Áıelder estafetasyndaǵy (3000 m) básekede el quramasy sapynan Alına Ájiǵalıeva, Zeınep Qumarhan, Anastasııa Astrahaneva, Gúldana Jalmuhan, Polına Omelchýk baq synady. Birinshi oryndy Koreıa quramasy ıelense, ekinshi satyǵa Nıderlandtyń áıelder quramasy kóterildi.
Áıelder kúresi: Belarýstiń astanasy — Mınskide úsh dúrkin Olımpıada chempıony Aleksandr Medvedti eske túsirýge arnalǵan kúresten Gran-prı jarysynda eki otandasymyz úzdikter qatarynan kórindi. 65 kelide baq synaǵan Irına Kazıýlına men 76 kelide beldesken Elmıra Syzdyqova týrnırdiń qola júldegeri atandy.
Grek-rım kúresi: Amanǵalı Bekbolatov Ázirbaıjannyń bas qalasy – Bakýde ótken grek-rım kúresinen áskerıler arasynda uıymdastyrylǵan álem chempıonatynda 55 kg salmaq dárejesinde top jardy.
Kásipqoı boks: Bekman Soılybaev (17-1, 8 KO) Túrkııanyń Trabzon qalasynda ótken kásipqoı boks keshinde ózbekstandyq Mırzamýhammad Hıkmatýllaevpen judyryqtasyp, qarsylasynan tehnıkalyq nokaýtpen basym tústi.
Frıstaıl-akrobatıka: Fınlıandııanyń Rýka qalasynda ótken frıstaıl-akrobatıkadan Álem kýbogynyń birinshi kezeńinde Janbota Aldabergenova (77,43 upaı) qola júldeger atandy.
Birinshi oryndy kanadalyq Marıanna Tıno (99,05 upaı) ıelense, kúmis júldeni avstralııalyq Danıel Skott (88,47 upaı) jeńip aldy.
