مەملەكەت باسشىسى فۋتزالدان قازاقستان-نيدەرلاند ماتچىن تاماشالايدى  — قفف

بۇگىن استاناداعى جاقسىلىق ۇشكەمپىروۆ اتىنداعى جەكپە-جەك سارايىندا 2024 جىلعى فۋتزالدان الەم چەمپيوناتىنىڭ ەليتالىق ىرىكتەۋ ءتۋرنيرى اياسىندا قازاقستان مەن نيدەرلاند قۇرامالارىنىڭ  ماتچى بولادى. ماتچ ساعات 20:30-دا باستالادى.

قازاقستان فۋتبول فەدەراتسياسىنىڭ حابارلاۋىنشا، ماتچتى تاماشالاۋعا مەملەكەت باسشىسى قاسىم-جومارت توقاەۆ بارادى.

بۇعان دەيىن فۋتبولدان قازاقستان مەن سان-مارينو كوماندالارىنىڭ اراسىنداعى ويىندا فۋتزالدان ۇلتتىق قۇرامانىڭ باس جاتتىقتىرۋشىسى پاۋلو ريكاردو كاكا پرەزيدەنت قاسىم-جومارت توقاەۆپەن كەزدەسىپ، ونى فۋتزالدان ەلىمىزدىڭ باس كومانداسىنىڭ ويىنىنا شاقىرعان ەدى.

قاسىم-جومارت كەمەل ۇلىمەن كەزدەسۋدە ول ماعان فۋتزالدىڭ وتە جاقسى دامىپ جاتقانىن،  ۇلتتىق قۇرامانىڭ ويىنىن ارەنادا وتىرىپ تاماشالاعىسى كەلەتىنىن ايتتى. مەن 14 جەلتوقساندا نيدەرلاندپەن ماتچ بولادى دەپ جاۋاپ بەردىم. پرەزيدەنت ەگەر كەستەدە ۋاقىت بولسا، ءبىزدىڭ ويىنعا مىندەتتى تۇردە كەلەتىنىن ەسكەرتتى، — دەدى كاكا.

قازاقستان فۋتزال فەدەراتسياسىنىڭ ۆيتسە-پرەزيدەنتى نۇرسۇلتان قۇرماننىڭ ايتۋىنشا، بۇگىن پرەزيدەنت ماتچقا كەلەدى. ويتكەنى، ءبارى كەلىسىلىپ قويىلدى.

قازاقستان قۇراماسىنىڭ ويىنشىسى ءابدىراسۋل ءابدىماناپ ۇلىنىڭ ايتۋىنشا، ۇلتتىق قۇرامانىڭ باس جاتتىقتىرۋشىسى كاكا ويىنشىلارعا اقىلىن ايتىپ، موتيۆاتسيا بەرىپ جاتىر.

بۇل ويىننىڭ جاۋاپكەرشىلىگىن سەزىنەمىز. الەم چەمپيوناتىنا بارىپ، ەلىمىزدىڭ اتىن شىعارعىمىز كەلەدى، — دەدى ول.

ال قازاقستان قۇراماسىنىڭ قاقپاشىسى لەو يگيتا كوماندانىڭ ماتچقا اسا جاۋاپكەرشىلىكپەن دايىندالىپ جاتقانىن ايتتى.

نيدەرلاند قۇراماسى كەيىنگى ءۇش جىلدا جاقسى دامىپ كەلەدى. جاڭا جاتتىقتىرۋشى كەلدى. ولار ادەمى ويىن ورنەگىن كورسەتۋدە. الاڭدا جاقسى قوزعالادى. ءبىرىن-ءبىرى تۇسىنەدى. ماتچقا جاۋاپكەرشىلىكپەن دايىندالىپ جاتىرمىز. بۇل ماتچ قىزىقتى دا تارتىستى بولادى. ويتكەنى، ءبىز دە ادەمى ويىن ورنەگىن كورسەتەمىز. دەسە دە ويىن وڭاي بولمايدى. نيدەرلاندتىقتار دا الەم چەمپيوناتىنا بارعىسى كەلەدى. مۇمكىندىكتى پايدالانۋعا تىرىسادى، — دەدى ول.

سونىمەن بىرگە ول الاڭدا 100 پايىزعا بەرىلىپ وينايتىنىن ايتتى.

وسى ويىنمەن، وسى سپورتپەن ءومىر سۇرەمىن. قازاقستان قۇراماسىمەن الەم چەمپيوناتىنىڭ التىن جۇلدەسىن جەڭىپ العىم كەلەدى. ويتكەنى، بۇل ەلدە ماعان مۇمكىندىك بەرىلىپ، ءومىرىمدى وزگەرتتى، — دەدى قاقپاشى.

قازاقستان قۇراماسى الەم چەمپيوناتىنا ىرىكتەۋ تۋرنيرىندە رۋمىنيا، ازەربايجان جانە نيدەرلاند قۇرامالارىمەن بىرگە ا توبىندا ويناپ جاتىر. قازىر فۋتزالدان ەلىمىزدىڭ باس كومانداسى ءتورت ويىننان كەيىن 12 ۇپايمەن كوش باستاپ كەلەدى. ال قورجىنىندا 1 ۇپايى بار نيدەرلاند قۇراماسى 4-ورىندا تۇر.

ەندى وسى ماتچتا قازاقستان قۇراماسى جەڭىسكە جەتسە، كەلەسى جىلى بولاتىن الەم چەمپيوناتىنا جولداما الادى. ال مۋنديال 2024 جىلعى 14 قىركۇيەك پەن 6 قازان ارالىعىندا وزبەكستاننىڭ تاشكەنت قالاسىندا بولادى.

فۋتزالدان الەم چەمپيوناتى ەليتالى ءتۋرنيرى 20 جەلتوقساندا اياقتالادى. 14 جانە 20 جەلتوقساندا الەم چەمپيوناتىنا  قاتىساتىن 7 كوماندانىڭ بەسەۋى انىقتالادى.

ەليتالى راۋندتاعى بەس توپتىڭ جەڭىمپازدارى الەمدىك دوداعا تىكەلەي جولداما الادى. ال 2-ورىن العان ءتورت ۇزدىك كوماندا پلەي-وفف ماتچتارىندا وينايدى. ولاردىڭ جەرەبەسى 2024 جىلى 25 قاڭتاردا تارتىلادى. ال ءاچ جولداماسى ءۇشىن قالعان ەكى ماتچ 2024 جىلدىڭ 8-17 ساۋىرىنە جوسپارلانعان.

داستان كەنجالين،

استانا