«دالا قىراندارى» ءتۋرنيرىنىڭ جالاۋى جەلبىرەيدى

17 جەلتوقسانىندا استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا «دالا قىراندارى» رەسپۋبليكالىق ءتۋرنيرى وتەدى، دەپ حابارلادى تۋريزم جانە سپورت مينيسترلىگى.

تۋرنير 2021 جىلدان بەرى وتكىزىلىپ كەلەدى. بۇگىندەرى بۇل جارىس قازاق كۇرەسى الەمىندەگى ەڭ ماڭىزدى وقيعالاردىڭ بىرىنە اينالىپ ۇلگەردى. جارىس تەك ۇزدىك بالۋانداردى ءبىر كىلەمدە جيناپ قانا قويماي، سونىمەن قاتار ۇلتتىق ءداستۇرىمىزدى بىرىكتىرۋ ارقىلى قازاق كۇرەسىنىڭ ۇلىلىعى مەن تەرەڭدىگىن كورسەتەدى.

بيىلعى تۋرنير 17 جەلتوقسان كۇنى وتەدى. ءدال وسى تۋرنيردە جىل بويى وتكەن 5 رەيتينگتىك جارىستا جوعارى ۇپاي جيناعان 64 بالۋان بەلدەسىپ، ءوز سالماعىنىڭ ۇزدىگىن انىقتايدى. دودانىڭ قورىتىندىسى بويىنشا 8 سپورتشى ءوز سالماق دارەجەسىنىڭ «باس بالۋانى» اتانىپ، «دالا قىرانى» تيتۋلىنا يە بولادى. سونداي-اق، 8 ۇزدىكتىڭ ارقايسىسىنا 4،5 ملن تەڭگە قوماقتى سىياقى تابىس ەتىلەدى.

قازاقى بولمىس، تۇرمىس-تىرشىلىگىمىز، سالت-سانامىز جانە ادەت-عۇرىپ سياقتى ۇلتتىق تاربيەنىڭ نەگىزگى كاتەگوريالارى – وسىنىڭ بارلىعى قازاق كۇرەسىندە بار. سەبەبى، قازاق كۇرەسى – جاس ۇرپاقتىڭ وي-ءورىسىن دامىتۋمەن بىرگە ءوز حالقىنىڭ اسىل مۇرالارىن بويىنا ءسىڭىرىپ، كەيىنگى ۇرپاققا جەتكىزۋدىڭ بىردەن-ءبىر جولى. سول سەبەپتى دە بارلىق سالماقتى قامتىعان بۇل ءتۋرنيردىڭ قازاق كۇرەسى ءۇشىن ماڭىزى زور. ول قازاق حالقىنىڭ ۇلتتىق كۇرەسى مازمۇنى تەرەڭدىگىمەن قوسا، جاس ۇرپاقتىڭ بويىنا باتىرلىق، توزىمدىلىك، العىرلىق سىندى ىزگى قاسيەتتەردى قالىپتاستىراتىندىعىمەن قۇندى.

بارلىقتارىڭىزدى تۋرنيردە كۇتەمىز!

مەكەنجايى: ج.ۇشكەمپىروۆ اتىنداعى جەكپە-جەك سارايى، استانا قالاسى.

ۋاقىتى: 2023 جىلعى 17 جەلتوقسان، باستالۋى – ساعات 11.00، سالتاناتتى اشىلۋى – ساعات 16.00.