«Dala qyrandary» týrnıriniń jalaýy jelbireıdi

17 jeltoqsanynda Astana qalasyndaǵy Jaqsylyq Úshkempirov atyndaǵy Jekpe-jek saraıynda «Dala qyrandary» respýblıkalyq týrnıri ótedi, dep habarlady Týrızm jáne sport mınıstrligi.

Týrnır 2021 jyldan beri ótkizilip keledi. Búginderi bul jarys qazaq kúresi álemindegi eń mańyzdy oqıǵalardyń birine aınalyp úlgerdi. Jarys tek úzdik balýandardy bir kilemde jınap qana qoımaı, sonymen qatar ulttyq dástúrimizdi biriktirý arqyly qazaq kúresiniń ulylyǵy men tereńdigin kórsetedi.

Bıylǵy týrnır 17 jeltoqsan kúni ótedi. Dál osy týrnırde jyl boıy ótken 5 reıtıngtik jarysta joǵary upaı jınaǵan 64 balýan beldesip, óz salmaǵynyń úzdigin anyqtaıdy. Dodanyń qorytyndysy boıynsha 8 sportshy óz salmaq dárejesiniń «Bas balýany» atanyp, «Dala qyrany» tıtýlyna ıe bolady. Sondaı-aq, 8 úzdiktiń árqaısysyna 4,5 mln teńge qomaqty syıaqy tabys etiledi.

Qazaqy bolmys, turmys-tirshiligimiz, salt-sanamyz jáne ádet-ǵuryp sııaqty ulttyq tárbıeniń negizgi kategorııalary – osynyń barlyǵy qazaq kúresinde bar. Sebebi, qazaq kúresi – jas urpaqtyń oı-órisin damytýmen birge óz halqynyń asyl muralaryn boıyna sińirip, keıingi urpaqqa jetkizýdiń birden-bir joly. Sol sebepti de barlyq salmaqty qamtyǵan bul týrnırdiń qazaq kúresi úshin mańyzy zor. Ol qazaq halqynyń ulttyq kúresi mazmuny tereńdigimen qosa, jas urpaqtyń boıyna batyrlyq, tózimdilik, alǵyrlyq syndy izgi qasıetterdi qalyptastyratyndyǵymen qundy.

Barlyqtaryńyzdy týrnırde kútemiz!

Mekenjaıy: J.Úshkempirov atyndaǵy Jekpe-jek saraıy, Astana qalasy.

Ýaqyty: 2023 jylǵy 17 jeltoqsan, bastalýy – saǵat 11.00, saltanatty ashylýy – saǵat 16.00.