شاحماتتان ءاچ: ءبيبىسارا اساۋباەۆا ءۇشىنشى رەت جەڭىسكە جەتتى (فوتو)

وزبەكستاننىڭ سامارقان قالاسىندا راپيد پەن بليتس شاحماتتان ءوتىپ جاتقان الەم چەمپيوناتىنىڭ  ەكىنشى كۇنى اياقتالدى.

تۋريزم جانە سپورت مينيسترلىگى سپورتتى دامىتۋ ديرەكتسياسىنىڭ حابارلاۋىنشا، كەشە ەرلەر مەن ايەلدەر راپيدتە 4 تۋردان وينادى. سەسسياداعى العاشقى ءجۇرىستى 1-تاقتادا FIDE باسقارما توراعاسىنىڭ ورىنباسارى دانا رەيزنيەتسە-وزولا جاسادى. بارلىعى راپيد تۇرىندە 270-كە جۋىق ويىنشى تىركەلگەن.

ۇلتتىق قۇراما كوشباسشىسى ءبيبىسارا اساۋباەۆا ءتورت ويىننىڭ ۇشەۋىندە جەڭىسكە جەتىپ، ۇپاي سانىن 5،5-كە جەتكىزدى. قازىر ءبىرىنشى ورىندا تۇرعان اناستاسيا بوندارۋكتىڭ (FIDE) ەنشىسىندە 7 بالل. بۇگىنگى شەشۋشى 3 تۋردا جاعداي تۇبەگەيلى وزگەرۋى مۇمكىن.

تاعى ءبىر ۇلتتىق قۇراما ويىنشىسى زارينا نۇرعاليەۆا، نازەركە نۇرعالي، كسەنيا بالاباەۆا مەن اسەل سەرىكبايدا 5 ۇپايدان بار.

الەم چەمپيوناتى لايىقتى ءوتىپ جاتىر. بارلىق قارسىلاسىم جاقسى ويىن كورسەتتى. مەنى تاجىريبە جيناۋ ءۇشىن وسىندا الىپ كەلگەن قازاقستان شاحمات فەدەراتسياسىنا العىس ايتامىن. الەمدىك دودادا ويناپ جاتقانىما قۋانىشتىمىن. الەم چەمپيوناتىنا قاتىسۋ بارلىق شاحماتشىنىڭ ارمانى. ەندى قالعان 3 تۋردا بارىمدى سالامىن، — دەدى بيىل U-12 ساناتىندا الەم چەمپيونى اتانعان ايارۋ التىنبەك.

ەرلەر اراسىندا قازىرگى الەم چەمپيونى ماگنۋس كارلسەن كەشەگى باسىمدىعىن ساقتاپ قالدى. نورۆەگ گروسسمەيستەرى بىلتىر الماتىداعى جەتىستىگىن قايتالاۋدان ابدەن دامەلى كورىنەدى. قازىر 9 تۋردان كەيىن ونىڭ ەنشىسىندە 7 ۇپاي بار. دەسە دە ودان كەيىن تۇرعان ۆلاديمير فەدوسەەۆ (سلوۆەنيا) پەن يانگ يۋ (قىتاي) 7 رەت قارسىلاستارىن جەڭگەن. سوندىقتان ولار نورۆەگ شاحماتشىسىنا جەتىپ قالۋى مۇمكىن.

مۇندا قازاقستان شاحماتشىلارىنان ەڭ جاقسى كورسەتكىش دەنيس ماحنەۆتە (5 ۇپاي). ودان سوڭ دانيال ساپەنوۆ (4،5) پەن جىلدام شاحماتتان الەم چەمپيونى يان نەپومنياششيمەن تەڭ تۇسكەن ەرنۇر امانگەلدى (4،5 بالل) كەلە جاتىر.

وسى تۇستا 10 جاستاعى دانيس قۋاندىق ۇلىنىڭ 4 ۇپايدى يەلەنگەنىن ايتا كەتكەن ءجون. كەشە ەرەسەكتەر اراسىندا العاش رەت ويناپ جاتقان دانيس وزىنەن الدەقايدا رەيتينگى جوعارى 3 قارسىلاسىن جەڭدى. تەك سوڭعى تۋردا وتانداسى دەنيس ماحنەۆتىڭ مىقتى ەكەنىن مويىندادى.

بۇگىن ەرلەر اراسىندا سوڭعى 4 تۋر وتەدى.

سامارقان قالاسىنا ۇلتتىق قۇراما ساپىندا 23 شاحماتشى كەلدى. اراسىندا تاجىريبەلى شاكىرتتەرىمىزبەن قاتار جاس ويىنشىلار دا جەتەرلىك. مۇنداعى ماقساتىمىز – ولاردىڭ تاجىريبە جيناۋىنا جاعداي جاساۋ. مىسالى، ەرنۇر امانگەلدى الدىڭعى كۇنى كوپشىلىك جاقسى بىلەتىن يان نەپومنياششيمەن تەڭ وينادى. ال 10 جاستاعى دانيس قۋاندىق ۇلى كەشە قاتارىنان 3 تۋردا جەڭىسكە جەتتى. كوماندا كوشباسشىسى ءبيبىسارادان جاقسى ناتيجە كۇتەمىز. جالپى، بارلىق ويىنشىمىز ءوز دەڭگەيىندە ونەر كورسەتىپ جاتىر، — دەدى شاحماتتان مەملەكەتتىك جاتتىقتىرۋشى داستان قاپاەۆ سپورتتى دامىتۋ ديرەكتسياسىنىڭ ءباسپاسوز قىزمەتىنە بەرگەن سۇحباتىندا.

بيىلعى چەمپيوناتتىڭ جالپى جۇلدە قورى – 1 ميلليون اقش دوللارى. ونىڭ 700 مىڭ دوللارى ەرلەر اراسىنداعى اشىق باسەكەدە، قالعان 300 مىڭ دوللار ايەلدەر اراسىنداعى ءتۋرنيردىڭ جۇلدەگەرلەرىنە ۇلەستىرىلەدى. شاحماتشىلار 26-28 جەلتوقسان كۇندەرى راپيدتەن سىنعا تۇسسە، 29-30 جەلتوقساندا بليتس شاحماتتان مىقتىلار انىقتالادى.

الەم چەمپيوناتى جايلى بارلىق اقپاراتتى FIDE مەن سپورتتى دامىتۋ ديرەكتسياسىنىڭ سايتىنان بىلە الا الاسىزدار. فيدە-ءنىڭ YouTube ارناسىندا تىكەلەي ەفيردە ويىنداردى الەم چەمپيونى ۆيشۆاناتان اناند پەن شاحمات ءجۋرناليسى اناستاسيا كارلوۆيچ جۇرگىزىپ جاتىر.

راپيد پەن بليتستەن بىلتىرعى الەم چەمپيوناتى تۋرا وسى ۋاقىتتا الماتى قالاسىندا ءوتىپ، راپيدتە دينارا سادۋاقاسوۆا كۇمىس جۇلدەگەر اتانسا، بليتستەن سوڭعى تۋردا ءبيبىسارا اساۋباەۆا التىن جۇلدە العان. ال ەرلەر اراسىندا ەكى سىندا دا ماگنۋس كارلسەن قارسىلاس شاق كەلتىرگەن جوق.