«كرەششەنيە» كەزىندەگى شومىلۋ: استانانىڭ قۇتقارۋشىلارى ساقتىق شارانى ەسكەرتتى

18-19 قاڭتاردا «كرەششەنيە» پراۆوسلاۆيە مەرەكەسى  شىركەۋلەردە اتالىپ وتەدى. بيىلعى جاپپاي شومىلۋ كەزىندە استانا قالاسى تۇرعىندارىنىڭ قاۋىپسىزدىگىن قامتاماسىز ەتۋ تۋرالى قالالىق توتەنشە جاعدايلار دەپارتامەنتى ازاماتتىق قورعانىس باسقارماسىنىڭ اعا وفيتسەرى ازامات جۇمەكەشوۆ ايتتى، دەپ حابارلادى قالالىق اكىمدىكتىڭ رەسمي سايتى.

بيىلعى «كرەششەنيەگە» وراي ەلوردادا ەسىل وزەنىنىڭ سول جاعالاۋىندا، «استانالىق» ساياباعىنىڭ جاعالاۋىندا (ورتالىق جاعاجايدىڭ جانىندا) جاپپاي شومىلۋعا ارنالعان ويىقتار ورناتىلدى.

سۋعا شومىلاتىن ورىندار 18 قاڭتاردا ساعات 20:00-دەن باستاپ سۋدى تازارتقاننان كەيىن 19 قاڭتار ساعات 02:00-گە دەيىن اشىق بولادى.
جاپپاي شومىلۋ 19 قاڭتاردا تاڭعى ساعات 08:00-دەن تۇنگى 23:00-گە دەيىن جالعاسادى.

جاپپاي شومىلۋعا قاتىساتىن استانا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا «كرەششەنيە» كەزىندە شومىلۋ ءراسىمى وتەتىن ورىنداردا استانا تجد، جەدەل-قۇتقارۋ جاساعى مەن اپاتتار مەديتسيناسى ورتالىعى قىزمەتكەرلەرىنىڭ كەزەكشىلىگى ۇيىمداستىرىلادى. ءىس-شاراعا جەكە قۇرامنىڭ 38 ادامى جانە 4 بىرلىك تەحنيكا جۇمىلدىرىلادى. بۇل جەردە شومىلۋدى ۇيىمداستىرۋشىلار مەن سۋعا تۇسۋشەلەر ءۇشىن قوسىمشا نۇسقاما وتكىزىلەدى، — دەدى ول.

ول سونداي-اق قالا تۇرعىندارىنا شومىلۋ كەزىندەگى ساقتىق شارالارىن ەسكە سالدى.

ماسەلەن، قاجەت بولعان جاعدايدا ۋاقتىلى بىلىكتى كومەك كورسەتە الاتىن ارنايى جابدىقتالعان جانە كۇزەتىلەتىن ورىنداردا عانا شومىلۋ قاجەت. وسى ماقساتتا ەسىل وزەنىندە تۇران داڭعىلى 8/2 مەكەنجايىنداعى قالالىق جاعاجايدا ءبىر ۋچاسكەگە ادامنىڭ مۇز استىنا كەتۋىنە جول بەرمەۋ ءۇشىن اعاش جانە مەتالل تورلاردى قولداناتىن قاۋىپسىزدىك قۇرالدارىمەن جابدىقتالعان 4 ورىن جاسالدى.

ويىققا كىرگەندە تەرەڭ دەم الىپ بارىپ، سۋعا ءتۇسۋ كەرەك. سۋعا تۇسكەن كىسى شىققان كەزدە ونى ءىر ادام سۇلگىمەن جانە حالاتپەن كۇتىپ الۋ كەرەك. سۋعا تۇسكەن كەزدە رەزىڭكە اياق كيىم كيۋ كەرەك.

شومىلۋدان بۇرىن دەنەنى قىزدىرىپ، ازداعان جاتتىعۋ جاساپ، جەڭىل جۇگىرىڭىز.سۋعا تەك تايعاق ەمەس، ارنايى جابدىقتالعان ورىنعا شومىلۋ كەرەك.

شومىلاتىن ورىنعا جەتكەنشە قىسقى اياق كيىمدى كيگەن دۇرىس، ارنايى رەزەڭكە اياق كيىمدى دە كيۋگە بولادى. ويىققا جەتكەنشە جول تايعاق بولۋى مۇمكىن. سوندىقتان اسىقپاي، ءار قادامدى نىق باسىپ ءجۇرىڭىز، — دەدى ازامات جۇمەكەشوۆ.

ونىڭ ايتۋىنشا، قۇتقارۋشىلار سۋعا تۇسەتىن باسپالداقتىڭ تايعاق بولماۋىن قامتاماسىز ەتۋگە كەڭەس بەرەدى.

ەشبىر جاعدايدا سەكىرۋگە جانە العا قاراي تەسىككە سۇڭگۋگە بولمايدى. ويتكەنى، ادامنىڭ دەنە قىزۋى كوتەرىلىپ، سۋىق ءتيۋى مۇمكىن.

سۋدا ءبىر مينۋتتان ارتىق بولماۋ كەرەك. ماس ادامعا مۇزدى سۋعا شومىلۋعا بولمايدى.

ەگەر سىزبەن بىرگە بالا نەمەسە قارت ادام بولسا، ونى شومىلۋ كەزىندە مۇقيات قاداعالاڭىز.
قورىققان كەزدە بالا جۇزە الاتىنىن ءاپ-ساتتە ۇمىتىپ قالۋى مۇمكىن.

شومىلعاننان كەيىن سۇلگىمەن ءسۇرتىنىپ، قۇرعاق جىلى كيىم كيىپ، ىستىق شاي ءىشۋ كەرەك، — دەدى ول.

سونىمەن بىرگە ول بالالار مەن قارت كىسىلەرگە، دەنەسى شىنىقپاعان، سۋىق سۋعا شومىلۋدان تاجىريبەسى جوق جانە جۇرەك-قان تامىرلارى اۋرۋلارى بار ادامدارعا سۋعا شومىلۋدان باس تارتۋدى ەسكەرتتى.