استانادا كۇرەس تۇرلەرىنەن قازاقستان چەمپيوناتى باستالدى

استانادا تۋريزم جانە سپورت مينيسترلىگى مەن گرەك-ريم، ەركىن جانە ايەلدەر كۇرەسى فەدەراتسياسىنىڭ ۇيىمداستىرۋىمەن كۇرەس تۇرلەرىنەن قازاقستان چەمپيوناتى باستالدى. چەمپيونات 1-5 اقپان ارالىعىندا جاقسىلىق ۇشكەمپىروۆ اتانداعى جەكپە-جەك سارايىندا بولادى.

ەل چەمپيوناتى وليمپيالىق ويىندارعا ەنگىزىلگەن كۇرەس تۇرلەرىن تانىمال ەتۋ، ونىڭ بەدەلىن ارتتىرۋ مەن كۇرەس تۇرلەرىنەن ۇلتتىق قۇرامانى ىرىكتەۋ ماقساتىندا وتكىزىلەدى.

قازاقستان چەمپيوناتىنىڭ جۇلدەسىنە تالاساتىن بالۋاندار اراسىندا ۇلتتىق قۇراما ۇزدىكتەرى دە بار.

اتاپ ايتار بولساق، يسحار قۇرباەۆ، ايدوس سۇلتانعالي، سۇلتان اسەت ۇلى، المات كەبىسپاەۆ، مەيىرجان شەرماحانبەت، دەمەۋ جادىراەۆ، ازات سادىقوۆ، ماقسات ەرەجەپوۆ، ءالىمحان سىزدىقوۆ مياقتى الەمدىك جارىستاردىڭ جەڭىمپازدارى مەن جۇلدەگەرلەرى كۇش سىناسادى.

چەمپيونات قورىتىندىسى بويىنشا ءساۋىر ايىندا قىرعىزستاندا وتەتىن وليمپياداعا ىرىكتەۋ تۋرنيرىنە قاتىساتىن سپورتشىلار انىقتالادى.

بۇگىن كەشكى ساعات 17:30-دا جارىس سالتاناتتى جاعدايدا اشىلادى. ال بەلدەسۋلەر ساعات 10:30-دا باستالدى. ءبىرىنشى جانە ءۇشىنشى ورىنعا بەلدەسۋلەر مەن ماراپاتتاۋ ءراسىمى كۇن سايىن ساعات 18:00-دە بولادى.

بۇگىن جانە ەرتەڭ گرەك-ريم كۇرەسىنىڭ شەبەرلەرى كىلەمگە شىعادى. ولار 1 اقپاندا 55، 63، 72، 82، 97 كگ سالماقتا، ەرتەڭ 60، 67، 77، 87، 130 كەلى سالماق دارەجەسىندە كۇرەسەدى.

3 اقپاندا ايەلدەر كۇرەسى بولادى. ايەلدەر 50، 53، 55، 57، 59، 62، 65، 68، 72، 76 كەلىدە كۇش سىناسادى.

4 اقپاندا ەركىن كۇرەس شەبەرلەرى 57، 65، 74، 86، 92 كگ سالماقتا بەلدەسەدى. ال چەمپيوناتتىڭ سوڭعى كۇنى، ياعني 5 اقپاندا كىلەمگە تاعى دا ەركىن كۇرەس بالۋاندارى شىعىپ، 61، 70، 79، 97، 125 كەلىدە شىن مىقتىنى انىقتايدى.

داستان كەنجالين،

استانا