SportPress.kz قازاقستان سپورت جاڭالىقتارى
بۇگىن الماتى قالاسىنان ەستۋ قابىلەتى زاقىمدانعان سپورتشىلاردىڭ ۇلتتىق قۇراماسى 2-12 ناۋرىز ارالىعىندا تۇركيانىڭ ەرزۋرۋم قالاسىندا وتەتىن XX قىسقى سۋردليمپيادا ويىندارىنا اتتاندى.
وعان 36 مەملەكەتتەن 1000-عا جۋىق سپورتشى قاتىسادى. جارىستا سپورتتىڭ تاۋ شاڭعىسى، سنوۋبورد، شاڭعى جارىسى، شاحمات، فۋتزال مەن كەرلينگ تۇرىنەن 34 كومپلەكت مەدال ساراپقا سالىنادى.
قازاقستان تاراپىنان وسى قىسقى ويىندارعا شاحمات، سنوۋبورد جانە شاڭعى جارىسىنان 26 سپورتشى قاتىسادى.
سالتاناتتى راسىمدە دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى ديرەكتورىنىڭ مىندەتىن اتقارۋشىسى ەرجان ەستاەۆ ءسوز سويلەپ، سپورتشىلارعا ساتتىلىك تىلەدى.
كوك بايراعىمىزدى جەلبىرەتىپ، حالىقارالىق جارىستا ونەر كورسەتۋ — ءار سپورتشى ءۇشىن تەڭدەسى جوق مۇمكىندىك. وسى ساتكە جەتۋ ءۇشىن سىزدەر كوپ ەڭبەك ەتىپ، تالاي بەلەستى باعىندىردىڭىزدار. جارىسقا دايىندالۋ ماقساتىندا التى رەسپۋبليكالىق جارىس پەن توعىز وقۋ-جاتتىعۋ جيىندارىنا قاتىستىڭىزدار. ەندىگى جارىستا لايىقتى ونەر كورسەتۋ ءوز قولدارىنىزدا. ءبىز سىزدەرگە سەنەمىز، — دەدى ەرجان ەسىمحان ۇلى.
وعان قوسا، سپورتشىلاردى رەسمي تۇردە شىعارىپ سالۋ كەزىندە قىسقى سۋردليمپيادا ويىندارىنىڭ اشىلۋ سالتاناتىنا ەلىمىزدىڭ تۋىن ۇستاپ شىعۋ مارتەبەسى شاحماتتان الەم چەمپيوناتىنىڭ قولا جۇلدەگەرى سۇلتان قوجاحمەتوۆكە تاپسىرىلدى. سپورتشىعا تۋدى سيدنەيدە وتكەن جازعى وليمپيالىق ويىنداردىڭ چەمپيونى ەرماحان ىبرايىموۆ تابىس ەتتى.
شاحماتپەن اينالىسقانىما 10 جىلدان استام ۋاقىت بولدى. بيىل العاش رەت قىسقى سۋردليمپيادا ويىندارىنا قاتىسقالى تۇرمىن. بۇل جارىستا ەلىمىزدىڭ تۋىن ۇستاپ شىعۋ مەن ءۇشىن ۇلكەن ابىروي. ەل ءۇمىتىن اقتاپ، ۇزدىكتەر قاتارىندا بولۋعا بارلىق كۇش جىگەرىمدى سالامىن!، — دەدى سۇلتان قوجاحمەتوۆ.
قازاقستان قۇراماسى العاش رەت 2015 جىلى قىسقى سۋردليمپيادا ويىندارىنا قاتىستى. ال، 2019 جىلى يتاليانىڭ سوندريو پروۆينتسياسىندا وتكەن ويىنداردا ەلىمىز ءوزىنىڭ العاشقى التىن مەدالىن جەڭىپ، جەتىنشى ورىننان كورىندى.
قۇرالاي ءاشىمحانوۆا
View this post on Instagram
