Qazaqstan sportshylary XX qysqy Sýrdlımpıada oıyndaryna attandy (VIDEO)

Búgin Almaty qalasynan estý qabileti zaqymdanǵan sportshylardyń ulttyq quramasy 2-12 naýryz aralyǵynda Túrkııanyń Erzýrým qalasynda ótetin XX qysqy Sýrdlımpıada oıyndaryna attandy.

Oǵan 36 memleketten 1000-ǵa jýyq sportshy qatysady. Jarysta sporttyń taý shańǵysy, snoýbord, shańǵy jarysy, shahmat, fýtzal men kerlıng túrinen 34 komplekt medal sarapqa salynady.

Qazaqstan tarapynan osy qysqy oıyndarǵa shahmat, snoýbord jáne shańǵy jarysynan  26 sportshy qatysady.

Saltanatty rásimde Dene múmkindikteri shekteýli tulǵalarǵa arnalǵan sporttyq daıarlaý ortalyǵy dırektorynyń mindetin atqarýshysy Erjan Estaev sóz sóılep, sportshylarǵa sáttilik tiledi.

Kók baıraǵymyzdy jelbiretip, halyqaralyq jarysta óner kórsetý — ár sportshy úshin teńdesi joq múmkindik. Osy sátke jetý úshin sizder kóp eńbek etip, talaı belesti baǵyndyrdyńyzdar. Jarysqa daıyndalý maqsatynda alty respýblıkalyq jarys pen toǵyz oqý-jattyǵý jıyndaryna qatystyńyzdar. Endigi jarysta laıyqty óner kórsetý óz qoldarynyzda. Biz sizderge senemiz, — dedi Erjan Esimhanuly.

Oǵan qosa, sportshylardy resmı túrde shyǵaryp salý kezinde qysqy Sýrdlımpıada oıyndarynyń ashylý saltanatyna elimizdiń týyn ustap shyǵý mártebesi shahmattan álem chempıonatynyń qola júldegeri Sultan Qojahmetovke tapsyryldy. Sportshyǵa týdy Sıdneıde ótken jazǵy Olımpııalyq oıyndardyń chempıony Ermahan Ybraıymov tabys etti.

Shahmatpen aınalysqanyma 10 jyldan astam ýaqyt boldy. Bıyl alǵash ret qysqy Sýrdlımpıada oıyndaryna qatysqaly turmyn. Bul jarysta elimizdiń týyn ustap shyǵý men úshin úlken abyroı. El úmitin aqtap, úzdikter qatarynda bolýǵa barlyq kúsh jigerimdi salamyn!, — dedi Sultan Qojahmetov.

Qazaqstan quramasy alǵash ret 2015 jyly qysqy Sýrdlımpıada oıyndaryna qatysty.  Al, 2019 jyly Italııanyń Sondrıo provınııasynda ótken Oıyndarda elimiz óziniń alǵashqy altyn medalin jeńip, jetinshi orynnan kórindi.

Quralaı ÁShIMHANOVA

 

View this post on Instagram

 

A post shared by CSP-parasport.kz (@csp_parasport.kz)