Sý sportynan ACh: Qazaqstan tarıhı nátıje kórsetti

Fılıppınniń Nıý-Klark-Sıtı qalasynda sý sporty túrlerinen ár jastaǵy XI Azııa chempıonatynda júzýden jarys aıaqtaldy, dep habarlady Týrızm jáne sport mınıstrligi Sportty damytý dırekııasy.

Sońǵy jarys kúni sportshylar taǵy 6 altyn, 1 kúmis, 1 qola medal jeńip aldy.

A tobynda Ádilbek Mýsın (50 m batterflıaı), Ksenııa Ignatova (shalqalaı júzý 200 m), Sofııa Spodarenko (50 m batterflıaı) chempıon atansa, Dıana Tasjanova 200 metrge shalqalaı júzýde kúmis júldeni ıelendi.

V tobynda Egor Popov (shalqalaı júzý 200 m), Sofııa Ábýbákirova (50 m batterflıaı), Maksım Skazobov (50 m batterflıaı ádisi) altyn medal alsa, brass ádisimen 200 metrge júzýde Arsen Qojahmetov pen erkin stılde 100 metrge júzýde Danııl Cherepanov qola júldege ıe boldy.

Tórt jarys kúniniń qorytyndysy boıynsha Qazaqstan quramasynyń qorjynynda 20 altyn, 11 kúmis, 5 qola júlde bar. Bul nátıje sportshylarymyzǵa Japonııadan keıin komandalyq esepte ekinshi oryn alýǵa múmkindik berdi. Kúnshyǵys eli 36 altyn, 20 kúmis, 15 qola júldeni jeńip aldy. Sondaı-aq júzgishter Azııa chempıonatynyń 14 rekordyn jáne Qazaqstannyń 3 rekordyn jańartty.

Búgin 1 naýryzda sýǵa sekirýshiler jarysy aıaqtalady. Qazir Qazaqstan qorjynda 1 altyn, 3 kúmis men 1 qola medal bar. 2-6 naýryz aralyǵynda kórkem júzýden jarys bolady. Al 3-9 naýryz aralyǵynda sý dobynyń sheberleri baq synaıdy.