ءجۇزۋدىڭ جۇيرىكتەرى!

سۋ سپورتى تۇرلەرىنەن وتەتىن الەمدىك جارىستاردا قازاقستان سپورتشىلارى التىن تۇعىرعا كوتەرىلىپ كورمەپ ەدى. وسى ءبىر ولقىلىقتىڭ ورنىن جۋىردا قازاقستاندىق سپورتشىلار تولتىرىپ، الەم چەمپيوناتىندا توپ جاردى.

ناقتىراق ايتساق، سۋ سپورتى تۇرلەرىنەن قازاقستان قۇراماسى الەم چەمپيوناتىندا العاشقى التىن مەدالدى جەڭىپ الدى. مۇنداي تولعاي تابىسقا جەتكەن قوس سپورتشىمىزدىڭ تاريحي جەڭىسىن ەلگە سۇيىنشىلەپ ايتۋعا بولادى. تاريحي ناتيجەنى قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ تۇلەكتەرى ەدۋارد كيم مەن نارگيزا بولاتوۆا يەلەندى. كاتاردىڭ استاناسى — دوحا قالاسىندا وتكەن الەم چەمپيوناتىندا جۇپتىق سىندا تەحنيكالىق باعدارلامادا ۇكىلەپ قوسقان قوس تالانات ەل سەنىمىن اقتاپ، چەمپيون اتاندى.

سونىمەن قاتار 2024 جىلدىڭ 21-24 اقپان ارالىعىندا تەمىرتاۋ قالاسىندا جۇزۋدەن جاسوسپىرىمدەر اراسىندا قازاقستان چەمپيوناتى وتكەن بولاتىن. سپورت مەكتەپ-ينتەرنات-كوللەدجدىڭ جۇزۋشىلەرى بۇل چەمپيوناتتا دا جاقسى ناتيجە كورسەتتى. جارىس ناتيجەسى بويىنشا: قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجىندە سۋ سپورتىندا جاتتىعاتىن سپورتشىلار براسس، ارالاس ەستافەتا، ەستافەتا ەركىن ستيل، كومپلەكس جانە شالقالاپ ءجۇزۋ ادىستەرى بويىنشا 3 التىن، 9 كۇمىس جانە 3 قولا مەدال جەڭىپ العان.

جەڭىستىڭ باس تۇعىرىندا اننا پۋپكو، سەرگەي ماتۆەەۆ، ەۆا ميلينينا التىن جۇلدەگە يە بولىپ، مەكتەپ-ينتەرناتتىڭ اتىن ەلگە ايان ەتتى. «قولى ۇستا ادامنىڭ قوينىندا التىنى بار»-دەمەكشى، بۇل ورايدا شاكىرتتەرىن جاتتىقتىرۋدا تولاسساز ەڭبەك ەتكەن باپكەرلەرىنىڭ جۇمىسىنىڭ جەمىسىن كورىپ وتىرمىز. باپكەردىڭ قويعان ۇستانىمىن دۇرىس قولدانا بىلگەن جالىندا جاستار التىن القالارىن مويىندارىنا تاقتى. ايتۋلى قاركەن احمەتوۆ اتىنداعى وليپيادالىق رەزەرۆىنىڭ ارنايى رەسپۋبليكالىق مامانداندىرىلعان مەكتەپ-ينتەرنات كوللەدجىندە وقىپ، جاتتىعىپ جۇرگەن ءجاسوسپىرىم ساڭلاقتاردىڭ وزگە سپورت تۇرلەرىندە دە الەم جارىستارىندا ولجا سالىپ جۇرگەنىن جاقسى بىلەمىز. «التىن شىققان جەردى بەلدەن قاز» دەمەكشى، ۇلعاتتى ۇستازدار مەن بىلكتى باپكەرلەر توعىسقان كيەلى شاڭىراقتا تالاي تالانتتاردىڭ كوزىن اشىپ ءدۇبىرلى جارىستارعا قوسىپ جاتقان بۇل مەكتەپ-ينتەرناتتى كوپكە ۇلگى ەتىپ ايتۋعا تولىقتاي بولادى.

اقىن ورداباي ۇلى،

الماتى