Júzýdiń júırikteri!

Sý sporty túrlerinen ótetin álemdik jarystarda Qazaqstan sportshylary altyn tuǵyrǵa kóterilip kórmep edi. Osy bir olqylyqtyń ornyn jýyrda qazaqstandyq sportshylar toltyryp, álem chempıonatynda top jardy.

Naqtyraq aıtsaq, sý sporty túrlerinen Qazaqstan quramasy álem chempıonatynda alǵashqy altyn medaldi jeńip aldy. Mundaı tolǵaı tabysqa jetken qos sportshymyzdyń tarıhı jeńisin elge súıinshilep aıtýǵa bolady. Tarıhı nátıjeni Qarken Ahmetov atyndaǵy Olıpıadalyq rezerviniń arnaıy respýblıkalyq mamandandyrylǵan mektep-ınternat kolledjiniń túlekteri Edýard Kım men Nargıza Bolatova ıelendi. Katardyń astanasy — Doha qalasynda ótken álem chempıonatynda juptyq synda tehnıkalyq baǵdarlamada úkilep qosqan qos talanat el senimin aqtap, chempıon atandy.

Sonymen qatar 2024 jyldyń 21-24 aqpan aralyǵynda Temirtaý qalasynda júzýden jasóspirimder arasynda Qazaqstan chempıonaty ótken bolatyn. Sport mektep-ınternat-kolledjdiń júzýshileri bul chempıonatta da jaqsy nátıje kórsetti. Jarys nátıjesi boıynsha: Qarken Ahmetov atyndaǵy Olıpıadalyq rezerviniń arnaıy respýblıkalyq mamandandyrylǵan mektep-ınternat kolledjinde sý sportynda jattyǵatyn sportshylar brass, aralas estafeta, estafeta erkin stıl, kompleks jáne shalqalap júzý ádisteri boıynsha 3 altyn, 9 kúmis jáne 3 qola medal jeńip alǵan.

Jeńistiń bas tuǵyrynda Anna Pýpko, Sergeı Matveev, Eva Mılınına altyn júldege ıe bolyp, mektep-ınternattyń atyn elge aıan etti. «Qoly usta adamnyń qoınynda altyny bar»-demekshi, bul oraıda shákirtterin jattyqtyrýda tolassaz eńbek etken bapkerleriniń jumysynyń jemisin kórip otyrmyz. Bapkerdiń qoıǵan ustanymyn durys qoldana bilgen jalynda jastar altyn alqalaryn moıyndaryna taqty. Aıtýly Qarken Ahmetov atyndaǵy Olıpıadalyq rezerviniń arnaıy respýblıkalyq mamandandyrylǵan mektep-ınternat kolledjinde oqyp, jattyǵyp júrgen jasóspirim sańlaqtardyń ózge sport túrlerinde de álem jarystarynda olja salyp júrgenin jaqsy bilemiz. «Altyn shyqqan jerdi belden qaz» demekshi, ulǵatty ustazdar men bilkti bapkerler toǵysqan kıeli shańyraqta talaı talanttardyń kózin ashyp dúbirli jarystarǵa qosyp jatqan bul mektep-ınternatty kópke úlgi etip aıtýǵa tolyqtaı bolady.

Aqyn ORDABAIULY,

ALMATY