Qazaqstan boksshylary Olımpıadaǵa bes joldama aldy (VIDEO)

Bokstan Italııanyń Býsto-Arsııo qalasynda ótken álemdik irikteý týrnıri óz máresine jetti.

Bıylǵy dodaǵa elimizden 11 boksshy (6 er, 5 áıel) qatysyp, el namysyn qorǵady. 11 sportshynyń beseýi Olımpıadaǵa joldanany jeńip aldy.

Erler quramasyndaǵy bylǵary qolǵap sheberleri 22 ret sharshy alańǵa shyǵyp, sonyń bireýinde ǵana jeńildi. О́kinishke qaraı, 63,5 keli salmaqtaǵy Muhammedsabyr Bazarbaıuly qaryslasyna ese jiberip aldy. Al basqalary, atap aıtqanda álem chempıondary 51 kelidegi Sáken Bıbosynov, 57 kg salmaqtaǵy Mahmud Sabyrhan, 71 kelidegi Aslanbek Shymbergenov, 80 kg salmaqtaǵy Nurbek Oralbaı men 92 keli salmaqtaǵy Azııa chempıony Aıbek Oralbaı shırek fınalda qarsylastaryn jeńip, Olımpada lıenzııasyn ıelendi.

Sáken Bıbosynov ¼ fınalda Eýropa chempıonatynyń kúmis júldegeri Kıaran Makdonaldty 4:0 esebimen jeńdi. Ol eki raýndta qarsylasynan basym boldy. Odan keıin ol oıda-joqta nokdaýnǵa túsip qaldy. Biraq, sońǵy raýndta qaıta kúshine minip, Makdonaldtan aılasyn asyrdy.

Osylaısha, Sáken Bıbosynov 51 kelide Bolat Jumadilovten keıin ekinshi ret qatarynan Olımpıadaǵa baratyn boksshy bolyp otyr.  Eske salsaq, Bolat Jumadilov 1996 jyly AQSh-tyń Atlanta qalasyndaǵy Olımpıada men 2000 jyly Aýstralııanyń Sıdneı Olımpıadasyna qatysyp, ekeýinde de kúmis júldeger atanǵan bolatyn. Al Sáken Bıbosynov 2021 jyly Tokıo Olımpıadasyna qatysyp, qola medaldi alyp keldi. Endi ol Parıj Olımpıadasyna qatysady.

Mahmud Sabyrhan shırek fınalda jasóspirimder arasyndaǵy álem chempıony Asror Vahıdovty 4:1 esebimen jeńdi.

Osylaısha, 22 jastaǵy otandasymyz Olımpıadanyń joldamasyn qaltasyna basty. Ol 1/32 fınalda Iadesa Leta Fıkremarıamdy (Efıopııa) 5:0, 1/16 fınalda 22 jasqa deıingi Azııa chempıonatynyń kúmis júldegeri, taıldandtyq Saravýt Sýkzet 3:2, 1/8 fınalda Pagan Kaleb Josıe Tıradony (Pýerto-rıko) 5:0, 1/4 fınalda Asror Vohıdovty (Tájikstan) 4:1 esebimen jeńdi.

Eske salsaq, 57 keli salmaqta qazaq tarıhynda jalǵyz ǵana boksshy Olımpıadada júlde alǵan. 2000 jyly Sıdneı Olımpıadasynda Bekzat Sattarhanov chempıon atanǵan.

2004 jyly Afına Olımpıadasynda Pavlodar oblysynda týǵan Vıtalıı Taıbert Germanııa sapynda qola júlde aldy.

71 kelide álem chempıony Aslanbek Shymbergenov ázerbaıjan Varhan Alıevten 5:0 esebimen basym túsip, joldanany jeńip aldy. Ol 1/32 fınalda fın Sem Morovatıdi ekinshi raýndta tehnıkalyq nokaýtqa jiberse, 1/16 fınalda polıak Damıan Dýrkach 4:1 esebimen jeńdi. Bul boksshy Tokıo Olımpıadasyna qatysqan eken.

1/8 fınalda Baıramdýrdy Nurmuhammedovty (Túrkimenstan) 3:2 esebimen, 1/4 fınalda 2021 jylǵy álem chempıonatynyń qola júldegeri ázerbaıjan Varhan Alıevti 5:0 esebimen jeńdi.

Aslanbek Shymbergenov byltyr álem chempıony, 2022 jyly Azııa chempıony bolǵan. Endi oǵan Olımpıadanyń altyn medali jetpeı tur.

Boks týrnırinde egiz sportshylar Aıbek pen Nurbek Oralbaı da Olımpıadaǵa baratyn bolyp sheshildi. Aıbek joldamany keshe aldy. Al álem chempıony Nurbek Oralbaı 80 kelide sheshýshi aıqasta Eýropa chempıonatynyń kúmis júldegeri Kelın Kassıdıdi 4:1 esebimen jeńip, lızenııaǵa ıe boldy.

Osy jekpe-jekte Nurbek Oralbaıdyń muryny synsa da saǵy synbaı, qarsylasyn «besinshi buryshqa» tyǵyp, sabady dese bolady. Endi ol kóp uzamaı tórt jyldyq týrnırlerdiń tóresi Olımpıada oıyndaryna daıyndyqty bastaıdy.

Áıelder boksynda álem chempıonatynyń eki dúrkin júldegeri Alýa Balqybekova (50 kg) Maksı Karına Kloetzerge 2:3 esebimen jeńilse, álem chempıony Valentına Halzova da shırek fınalda Ulybrıtanııa atynan synǵa túsip jatqan Kamerýn týmasy Kındı Ngambaǵa ese jiberdi.

Osylaısha , ekeýi de Olımpıada joldamasynan qaǵyldy.  Endi mamyr aıynyń sońy men maýsym aıynyń abas kezi aralyǵynda Taılandtyń astanasy – Bangkok qalasynda taǵy bir álemdik irikteý týrnıri bolady.

Ázirshe Qazaqstan quramasynan Olımpıadaǵa joldamany 51 kelidegi Sáken Bıbosynov, 57 kg salmaqtaǵy Mahmud Sabyrhan, 71 kelidegi Aslanbek Shymbergenov, 80 kg salmaqtaǵy Nurbek Oralbaı, 92 keli salmaqtaǵy Azııa chempıony Aıbek Oralbaı, asa aýyr salmaqtaǵy Qamshybek Qońqabaev pen áıelderden 57 keli salmaqta Karına Ibragımova jeńip aldy.

Bıylǵy týrnırge 114 elden 668 sportshy qatysty.

 

Dastan KENJALIN,

ASTANA

 

View this post on Instagram

 

A post shared by Kazakhstan Boxing Federation (@boxingkazakhstan)